غزنی ده بیر جمغرمه آرقهلی بوگون (۳۱-سرطان، چهارشنبه)، ۱۲ ییگیتنینگ توپلم توی مراسمی اوتکزیلگن.
«مسیر سعادت» جمغرمهسی مسئولی محمدغوث کاوشنینگ ایتیشیچه، اوشبو مراسم جمعیتده قولی شکلده توی قیلیش فرهنگی رواجلنیشی و ناتوغری عرف-عادتلر اورتهدن کیتیشی مقصد اوتکزیلگن. اونینگ کوپهیتیریشیچه: «قشاقلیککه قرشی کورهشماقچینمیز. اهالیمیز کمبغل دیر و بیزلر قشاقلیککه و شونیندیک ناتوغری عرف-عادتلرگه قرشی کورهشیشنی ایستهدیک.»
باشقه بیرتاماندن، بوگون توپلم شکلده توی مراسملری اوتکزیلگن یاشلردن قطارینینگ ایتیشلریچه، اقتصادی قیینچیلیکلر سبب نیچه ییل نامزاد قالیب و تویلرینی اوتکزه آلمهگن ایکنلر.
بو تویدهگی کییاولردن ذبیحاللهنینگ ایتیشیچه، اوچ ییلدن بیری نامزد قالیب و بو مدتده اقتصادی قیینچیلیکلر سبب توینی اوتکزه آلمهگن ایکن. «ایشچیمین، اقتصادیمیز ضعیف دیر؛ جمغرمهلرنی خدا خیر بیرسین که توی قیله آلیشیمیز توغریسیده بیزلرگه یاردم بیردیلر.»
کییاولردن باشقه بیری نعیمنینگ ایتیشیچه: «اوزیم و عایلهم ایستهگی بیلن توییمیزنی توپلم شکلده اوتکزدیک. کمبغل بولگن یاشلر بو دستورلرگه شرکت قیله آلهدیلر.»
شونینگدیک کییاولردن محمود، یاشلردن اقتصادی قیینچیلیکلر اوچون تویلرینینگ توپلم شکلده اوتکزیشلرینی سورهگن. «اقتصادی ضعیف بولگن هر بیر ییگیت، بو تور دستورلرگه شرکت قیلسینلر. بو دستورلر کمبغل یاشلر اوچون دیر.»
شونینگدیک دین عالملردن قطارینینگ ایتیشلریچه، توینینگ قولی و کوپینچه صرف-خرهجت بولمسدن اوتکزیلیشی کیرهک. دین عالملریدن دینمحمد حقیارنینگ ایتیشیچه: «قیغو بیلن تویدهگی عرف-عادتلر نتیجهسیده، مسلمانلر باسیم آستیگه دیر؛ توی صرف-خرهجتینی تولدیریش اوچون ییگیتلر مملکتدن تشقیگه کیتدیلر و دریالرگه چوکیب کیتدیلر.»
سونگی ییللرده، کمبغللیک گرافی یوقاری بولگنی، عایلهلر آرهسیده قلین و توینینگ یوقاری صرف-خرهجتلری سبب، یاشلردن قطاری تویلرینی توپلم شکلده اوتکزگنلر.
