سونگی ایکی آی جریانیده خبرچی‌لر برابریده‌گی ترور و هدف‌لی قتل‌لر کوپه‌یگنی اوچون، خبرچی‌لر و مدنی فعال‌لر توییتر صحیفه‌سی آرقه‌لی «خبرچی‌لردن حفاظت قیلینگ» آتیده بیر کمپاین یولگه قویگنلر.
اوشبو کمپاین‌نی یولگه قویگن کیشی‌لرنینگ ایتیش‌لریچه، سونگی ایکی آیده خبرچی‌لر برابریده‌گی ترور و هدف‌لی قتل‌لر کوزگه کورینرلی شکلده کوپه‌یگن و اوتمیش زمان‌لرگه قره‌گنده، خبرچی‌لر کوپراق تهدید بوله‌دیلر.
کمپاین‌نی یولگه قویگن کیشی‌لر، خبرچی‌لر و مدنی فعال‌لرنینگ خوفسیزلیگی تأمین ایتیلیشی‌نی سوره‌یدیلر.
اوشبو کمپاین باشله‌تیلگنیدن کیین شمالی آتلانتیک بیرلشمه‌‌سی یا-ده ناتو تشکیلاتی هم، افغانستانده‌گی خبرچی‌لر برابریده‌گی زوروانلیک‌لر توخته‌تیلیشی اوستیده تأکید ایتگن.
ناتو نینگ افغانستانده‌گی ملکی نماینده‌سی استیفانو پونتیکورور نینگ توییتر صحیفه‌سیده یازیشیچه، خبرچی‌لیک جنایت ایمس و خبرچی‌لرنی هدف آله‌دیگن کیشی‌لر جزالنتیریلیشی لازم دیر.
یونسکو هم اوشبو کمپاین دن حمایت قیلیب، معافیت – کیچیریم فرهنگی اورته دن کیتیشی اوستیگه تاکید قیلگن.
چیگره‌سیز خبرچی‌لر تشکیلاتی ییل‌لیک گزارشیده، افغانستان خبرچی‌لر اوچون اینگ اولیم‌لی بولگن بیش مملکت ایچیده بولگنی‌نی بیلدیرگن. مکزیک، افغانستان، عراق، پاکستان و هند اولکه‌لری میلادی ۲۰۲۰- ییلده خبرچی‌لر اوچون اینگ اولیم‌لی اولکه‌لر بولگن.
مملکت ایچکی ایشلر وزیرلیگی تامانیدن ترقه‌تیلگن گزارش‌گه کوره، اوتگن ۱۹ ییل جریانیده افغانستانده ۱۳۱ خبرچی اولدیریلگن و مذکور قتل‌لر ۶۷ ته‌سی نینگ عاملی طالبان گروهی بولگن.
سونگی ایکی آی جریانیده عیال‌لر حق‌لریدن دفاع قیلووچی فرشته کوهستانی، افغانستان عادلانه و ایرکین سیلاو کمیسیونی اجرائیه باشلیغی محمد یوسف رشید، غزنی ولایتی خبرچی‌لر بیرلشمه سی نینگ باشلیغی رحمت الله نیکزاد، آریانا تلویزیونی نینگ نطاقی فردین امینی، ننگرهارده فعالیت قیله‌دیگن انعکاس تلویزیونی نینگ نطاقی ملالی میوند، آزادی رادیو نینگ هلمند ولایتی‌ده‌گی خبر چی‌سی الیاس داعی، طلوع تلویزیونی نینگ سابق ایشلاوچیسی یما سیاووش و خورشید تلویزیونی نینگ اجرایی باشلیغی رفیع الله صدیقی اولدیریلگن.