قندهار ولایتیدن بیر منبع نینگ سلام‌وطندارگه ایتیشیچه، طالبان گروهی اوتگن کیچه کمیده ۳۰۰ کیشی‌نی اوی‌لریدن چیقاریب نامعلوم جای‌گه انتقال بیرگن.
منبع گه کوره، طالبان گروهی سپینبولدک تومنی‌نی تصرف قیلگنیدن سونگ، اوشبو کیشی‌لرنی حکومت گه یاردم بیریش عیبی بیلن قولگه آلگن و حاضرگه‌قدر اولردن بیرقطاری نینگ جسدلری تاپیلگن
قندهار ولایتی کینگش عضوی فدامحمد افغان نینگ شاه‌محمود و محمدخان نام‌لی ایکی اوغلی هم طالبان تامانیدن اولدیریلگن‌لر جمله‌سیدن دیر.
قندهار ولایتی کینگش اوشبو عضوی نینگ سلام‌وطندارگه ایتیشیچه، سپینبولدک که قتل عام صورت تاپگن و حاضرده طالبان گروهی بیرقطار کیشی‌لرنی تورلی بهانه‌لر بیلن آلیب کیته‌دی و نیچه مدت‌دن سونگ، جسدلری تاپیله‌دی.
عین‌حالده، طالبان سوزلاوچیسی ذبیح‌الله مجاهد نینگ صوتی بیر پیام ده تینچ اهالی‌نی طالبان تامانیدن قولگه آلینیشی‌نی رد قیلیب ایتیشیچه، قندهار ولایتی کینگش عضوی نینگ اوغلی‌لری شخصی خصومت‌لر سبب، اولدیریلگن و بو واقعه عامل‌لرینی قولگه آلیش اوچون سعی وحرکت‌لر باشلنگن.
سپینبولدک چیککه‌سیده، قندهار مرکزی، دند، پنجوایی و باشقه بیرقطار تومن‌لر یشاوچیلری نینگ ایتیش‌لریچه، طالبان جنگریلری بیرقطار کیشی‌لرنی اوزلری بیلن آلیب کیته‌دی و بیر مدت دن سونگ، جسدلری تاپیله‌دی.
بونده‌ی واقعه‌لر قندهار یشاوچی‌لرینی خواطرلنتیرگن و اولر خلق ارا جماعه‌سی و انسان حقلری نهادلریدن بوتوغریده دقت قیلیش‌لرینی سوره‌گنلر. اولرنینگ ایتیش‌لریچه، بونده‌ی قتل‌لرنینگ رقمی کون اوتیش بیلن کوپه‌یب بارماقده.
ایتیلیشیچه، بوگون “جمعه” فیسبوک فعال‌لریدن بیری قندهار پولیس قومندانلیگی ده وظیفه انجام بیره‌ریدی، لیکن دند تومنیده ناتانیش قوراللی کیشی‌لر تامانیدن اوغیرلنگنیدن سونگ، جسدی تاپیلگن.
طالبان گروهی حاضرگه‌قدر بوتوغریده فکر بیلدیرمه‌گن.
