پروان محلی منبع‌لری، کابل و شمالی تومن‌لرده باره‌دیگن برق پایه‌لرینی پارتله‌تیش و تخریب قیلینیشی‌گه توسیق بولیش اوچون ینگی ریجه‌لر تیارلنگنیدن خبر بیرگن‌لر.
پروان ده برشنا شرکتی باشلیغی روح‌الله ساجد نینگ سلام‌وطندارگه ایتیشیچه، جمهورلیک ریاستی نینگ بیرینچی اورین باسری برق پایه‌لرینی تخریب ایتیلیشی‌گه توسیق بولیش خصوصیده بولگن ریجه‌لر جمله‌سیدن هر پایه‌ده قوروقچی استخدام قیلیش ریجه‌نی تصدیق‌لگن.
جناب ساجد نینگ ایتیشیچه، هر بیر پایه‌ده ایکی قوروقچی اسخدام ایتیلیشی ممکن و هر آی‌ده ۵ مینگ افغانی حقوق بیریلیشی‌گه قرار قیلینگن.
سالنگ تومنی ولسوالی آغاشیرین ندیم نینگ ایتیشیچه، اولرگه ییتیشگن رهنمودگه کوره، پایه‌لردن محافظت قیلووچی قوروقچی‌لرنی تومن‌لرنینگ پولیس قومندانلیگی استخدام قیله‌دی و اولر امنیتی نهادلرنینگ کشف بولیمی تامانیدن مدیریت ایتیله‌دی. جناب ندیم گه کوره، حاضرگه‌قدر سالنگ ده ۸۱ پایه اوچون ۱۶۲ قوروقچی استخدام ایتیلگن.
برق پایه‌لردن حفاظت قیلیش اوچون قوروقچی استخدام ایتیلیشی‌نی حل یول‌لردن بیری عنوان ایتیلگن، بیراق سالنگ تومنیده قوروقچی استخدام قیلیش جریانی باشلنگنیدن سونگ، ایکی پایه تخریب قیلینگن.
مسوول‌لر منبع‌لرنینگ معلوماتی‌گه کوره، کابل شهری نینگ خیرخانه کوتلی‌دن باشلب جنوبی سالنگ گچه ۱۸۴ برق پایه‌سی موجود دیر.
