آمریکا اطلاعاتی نهادلری نینگ ایتیش‌لریچه، مذکور مملکت حربی‌لری افغانستان دن چیقیشی بیلن، بو مملکت طالبان نظارتی گه اوتیش احتمالی موجود.
آمریکا اطلاعاتی نهادلری مذکور مملکت جمهوررئیسی جوبایدن نینگ آگاه‌لنتیریشیچه، تینچلیک کیلیشووی و اوروش تامان‌لری (افغانستان دولتی و طالبان) آره‌سیده قدرت تقسیم بولمه‌سدن آمریکا حربی‌لری افغانستان دن چیققن صورتده، طالبان جنگریلری ۲ الی ۳ ییل آره‌سیده، افغانستان نی نظارت گه آلیش احتمالی بار.
عین حالده، آتی فاش ایتیلیشی نی ایستمه‌گن آمریکالیک رسمیلرنینگ نیورک تایمز کونده‌لیگی گه ایتیش‌لریچه، بو ایش صورت تاپگن صورتده، القاعده ترماغی گه ساختاری نی قیته قوریش اوچون فرصت بیریلیشی ممکن.
بوندن آلدین آمریکا جمهور رییسی جو بایدن (پنجشنبه کونی ۵- حمل) بیرینچی خبری ییغینیده ایتیشیچه، آمریکا حربی‌لری نینگ تعیین‌لنگن مهلت ده افغانستاندن چیقیشی فنی نقطه‌نظردن زور دیر. بیراق طالبان گروهی تعیین‌لنگن مهلت دن سونگ چیت‌ایللیک کوچلرنینگ افغانستانده قالیشی‌نی خطرلی عنون قیلگن.
قویاش ۱۳۹۸- ییل حوت آیی ده امضالنگن دوحه کیلیشوونامه‌سی اساسیده، بو مملکت حربی‌لری جاری ییل بیرینچی می آیی گچه افغانستان دن چیقیش‌لری کیره‌ک.
شونده‌ی بیرحالده، آلمان دولتی نینگ ینگی ریجه‌سی اوشبو مملکت فدرال پارلمانی‌ده تصویب ایتیلگن و مذکور ریجه اساسیگه، آلمان حربی‌لری نینگ افغانستانده‌گی ماموریتی کیله‌سی ۱۰ آی گچه تمدید قیلینگن. آلمان فدرال پارلمانی اوتگن “پنجشنبه” کونی دولت ینگی ریجه‌سینی تصدیق‌لب و اوشبو مملکت اردوسیگه ۱ مینگ و ۳۰۰ حربیسینی ۲۰۲۲- ییل ۳۱ جنوری گچه افغانستانده سقلشی اوچون رخصت بیرگن.
آلمان حربی‌لری نینگ افغانستانده‌گی ماموریتی جاری میلادی ییل ۳۱ مارچ ده یکونلنه‌دی. آلمان افغانستانده‌گی ماموریتی‌نی تمدید قیلگن ناتو نینگ بیرینچی عضوی دیر. آلمان دولتی نینگ آگاه‌لنتیریشیچه، ناتو کوچلری نینگ تیزلیک‌که افغانستاندن چیقشی تینچلیک سوزلشوولرینی خطر بیلن دوچ قیلیشی ممکن.
عین حالده، طالبان اوتگن کون بیر اعلامیه ترقه‌تیب آگاه‌لنتیریشیچه، چیت‌ایللیک کوچلر دوحه کیلیشوونامه‌سیگه تعیین‌لنگن زمان گچه افغانستان دن چیقمه‌گن صورتده، اونینگ مسئولیتی آمریکا گه تیگیشلی دیر. طالبان نینگ ایتیشیچه، اولر دین و مملکت‌لریدن مدافعه قیلیش گه زورله‌نیب و مملکت‌لرینی قوتقریش اوچون اشغالچی کوچلر برابریده جهاد و قوراللی کوره‌ش گه ادامه بیریشه‌دی.
