کیچه پیتی ساعت ۱۲دن اوتگن و شهر سکوت ایچیده بولگنی بیرحالده، پروان مرکزی چاریکار شهرینینگ کوچه و پسکوچهلرینی دَیدِی ایتلرنینگ آوازی آلگن؛ مذکور ایتلر شاوقینی بالهلرنینگ تینچلیک و اویقوسینی بوزگن.
چاریکار شهری یشاوچیسی نجیبالله عزیزینینگ ایتشیچه، دَیدِی ایتلر حضوری سبب، کیچه تامان شهر ایچیده باریب-کیلیشده قیینچیلیک بیلن روپهره بولگنلر. «بیران کیشی شامدن کیین تشقریگه چیقماقچین یا-ده کسلخانه گه بارماقچین بولگنی پیتده، ایتلر اولرنی کوپ اذیت قیلهدی. موتری بولمهگن کیشیلر هم تشقریگه چیققنیده ایتلر توپلم شکلده سیس و شاوقین چیقرهدی. بو ایسه بالهلر و کسل کیشینی کوپ اذیت قیلهدی. جدی بیر قیینچیلیک دیر و بو توغریده مسئول ادارهلرنینگ همکارلیک قیلیشی کیرهک، چونکه اوشبو ایتلر آرهسیده ویروسگه چلینگن ایتلرنینگ بارلیگی ممکن.»
بیزلرنینگ فیسبوک صحیفهمیزگه باش اورینگ!
چاریکار شهری یشاوچیلریدن باشقه بیری غلام نبینینگ ایتیشیچه، شهر ایچیده دَیدِی ایتلر حضوری نهفقط یشاوچیلرنینگ کیچه تامان باریب-کیلیشلرینی خوف بیلن روپهره قیلهدی، بلکیم شونینگدیک بالهلرنینگ اویقو و تینچلیگینی هم اورتهدن کیتگزهدی.
غلام نبینینگ کوپهیتیریشیچه: «کیچهلر ساعت ۱ یا-ده ۲ده ایتلرنینگ سیسی جودهیم بیزلرنی اذیت قیلهدی و حتا ایرتنگگچه اویقو گه قویمهدی. کیچه تامان بیران کسللیک اورته گه کیلسه یا-ده بیران قیینچیلیک چیقیب و تشقریگه چیقیس کیرهک بولگنیده، ایتلر یوزیمیزگه توشهدی. بو قیینچیلیکدن قوتیلیش ایستهیمیز.»
شهرنینگ قرانغو و تار کوچهلریده، یالغیز ایتلرنینگ چاپیشی و سیسی قولاققه کیلهدی که بو سیسلر، بالهلرنینگ قورقیشی و اوخله آلمسلیگیگه سبب بولهدی. چاریکار شهری یشاوچیسی نوریه ساداتنینگ ایتیشیچه، دَیدِی ایتلر سیسیدن قورقیش طفیلی کوپینچه پیت بالهلری اویقودن اویغهنیب و ایرتنگچه اوخله آلمهیدی. «کیچهلر ۱۲-۱ ده کوچهلرگه ایتلر چیقهدی و کوپ سیس و شاوقین قیلهدیلر. اولرنینگ سیسیدن بالهلر اویقودن قورقیب اویغنهدی و ییغلهیدیلر، حتا قیته اوخله آلمهیدیلر. دولتدن بو توغریده توجه قیلیشینی ایستهیمیز.»
بیزلرنینگ «ایکس» ترماغی ده هم تعقیب قیلینگ!
چاریکار یشاوچیلری شهر ده دَیدِی ایتلر کوپهیگنیدن شکایت قیلگنلری بیرحالده، چاریکار بلدیهسی رازمحمدنینگ سلاموطندار گه ایتیشیچه، بو قیینچیلیکنی حل قیلیش اوچون بیر کمیته آچیلیب و عملی ییچیم یوللر تاپیلیشی توغریسیده سعیوحرکت بولماقده. «دَیدِی ایتلر توغریسیده ساغلیقنی سقلش، اطراف-محیط و بلدیه ریاستلری نمایندهلری شامل اوچ کیشیلیک بیر کمیته تشکیل بولیب و بو موضوع توغریسیده ایشلنماقده. بو توغریده بحث قیلماقدهمیز که بیران ییچیم یولنی تاپیب و عملگه آشیرسهک. بو مسئله اوچون یشاوچیلرنینگ تشویشی درست و بیزلر ولایت رسمیلری بیلن مصلحت قیلماقدهمیز.»
چاریکار شهریده ینه بیر کون یکونلنماقده و دَیدِی ایتلر اوزلری اوچون خوفسیزراق محیط تاپهدیلر و عایلهلر ایسه بالهلرینینگ راحت بیر شکلده اوخلهشی و کیچه تامان تشقریگه چیققنلریده بیران خطر تهدید قیلمسلیگی مقصد، کوچهلرده ایتلرنینگ کمهیشینی کوتهدیلر.
