بیرلشگن ملتلر تشکیلاتی نینگ افغانستان اوچون اورین باسرلیک هیاتی (یوناما) ایکی ییل‌لیک ینگی استراتیژیسینی شریک قیلدی، مذکور تشکیلات نینگ استراتیژیسی اساسیده، کیله‌سی ایکی ییل گچه افغانستان ده فعالیت‌لرینی دوام بیره‌دی.
اوشبو استراتیژی اساسیده، یوناما افغانستان ده انسان پرورلیک یاردم‌لری و انسان حق‌لریدن مدافعه قیلیش نی اوستون قرار بیره‌دی.
یوناما نینگ ینگی استراتیژیسی ده، عیاللر، باله‌لر قاچقینچیلر و آزچیلیک قوم‌لر کبی ضعیف گروه‌لر نینگ قینچیلیک‌لرینی حل قیلیش اوستون قرار بیریلیشی عنوان قیلینگن.
اسلام امیرلیگی، بیرلشگن ملتلر تشکیلاتی نینگ انسان پرورلیک فعالیت‌لرینی خوش قرشی‌لسه ده، بیراق افغانستان ایچکی مسئله‌لری گه اره‌لشمسلیک اوستیده تأکید ایته‌دی.
بیزلرنینگ فیسبوک صحیفه‌میزگه باش اورینگ!
سرپرست حکومت، بیرلشگن ملتلر تشکیلاتی بوندن کیین ترقیاتی بولیم‌لرده انسان پرورلیک فعالیت‌لری گه دوام بیریشینی ایسته‌یدی.
اسلام امیرلیگی سوزلاوچیسی نینگ اورین باسرلریدن بلال کریمی نینگ سلام‌وطندار گه ایتیشیچه: «افغانستان نینگ ایچکی مسئله‌لرینی نظر گه آلیب فعالیت‌لری گه دوام بیرسین‌لر، او زمان اسلام امیرلیگی برچه تامان‌لر بیلن همکارلیگی گه دوام بیره‌دی.»
برچه‌سی بیلن، سیاسی ایش بیلرمان‌لر افغانستانده‌گی کیسکین‌لیکلردن قوتیلیش اوچون یوناما نینگ فعالیت‌لریدن تنقید ایته‌دیلر.
اولر نینگ ایشانچی گه کوره، بیرلشگن ملتلر تشکیلاتی و افغانستان ده مذکور نهاد نماینده‌لیگی، اوتگن ایکی ییل ده افغانستان نینگ سیاسی قیینچیلیگی حلی اوچون یخشی رول اوینه‌ی آلمه‌گن.
سیاسی ایش بیلرمان عبدالجبار اکبری نینگ ایتیشیچه: «یوناما بیرلشگن ملتلر تشکیلاتی نینگ سیاسی نماینده‌سی دیر کابل ده حضوری و فعالیتی بار، اوشبو نهاد اساسی قیینچیلیک قییرده و قرشی نقطه‌لر باره‌سیده اسلام امیرلیگی بیلن مذاکره قیلیش اوچون حاضرگچه سیاسی ایش‌لر گه قوشیلمه‌گن.»
بیزلرنینگ توییترده هم تعقیب قیلینگ!
سیاسی ایش بیلرمان‌لردن باشقه بیری سیدضیا حسینی گه کوره: «بولر سیاسی ایش‌لر گه اره‌لشیش اورنیده انسان پرورلیک ساحه‌سیده کوپراق فعالیت قیله‌دی. حکومتدارلیک یا که افغانستان نینگ سیاسی و اقتصادی وقعیتی اوزگریشی اوچون اساسی ماستر پلان اوزه‌تیشمه‌گن.»
ایتیش کیره‌ک که، اوتگن ایکی ییل ده بیرلشگن ملتلر تشکیلاتی ییغیلیش‌لر یولگه قوییب و بیانیه‌لر صادر قیلیش بیلن، ایستک‌لرینی عملگه آشیریش اوچون سرپرست حکومت نی قانیقتیره آلمه‌گن.
