افغانستان بوییچه بیرلشگن ملت‌لر تشکیلاتی نینگ اورین باسرلیک هیاتی یا-ده یوناما، افغانستان حکومتی و طالبان گروهی نینگ مذاکره قیلووچی هیات‌لرینی قطر باشکنتی دوحه‌گه بارگنی‌نی خوش قرشی‌لب و سوزلشوولر تیزلیککه باشله‌نیشیدن امیدوارلیک بیلدیرگن.
بوگون “سه‌شنبه” اوشبو نهاد تامانیدن میدیالرگه یوباریلگن اعلامیه‌ده ایتیلیشیچه، اوروش‌نی یکونلنتیریش و تینچلیک تامین‌لنیشی اوچون سوزلشوولرنینگ باشله‌نیشی اونملی دیر.
اعلامیه‌گه کوره، مذاکره قیلووچی هیات‌لر بیرقطار قیین‌چیلیکلر بیلن روپه‌ره بولگن و کوپ قطار ایشلر قالگن، بیراق ایکی تامان سوزلشوولر باشله‌نیشیگه یخشی همکارلیک قیلگن‌لر و نهایتده نتیجه هم بیرگن.
یوناما تامانیدن نشر قیلینگن اعلامیه‌ده ایتیلیشیچه، مذاکره قیلووچی هیات‌لر ۲۰ کو‌ن‌لیک وقفه ده رهبرلری بیلن صحبت قیلیب و ایش شیوه‌سی خصوصیده فکر بیلدیرگن‌لر.
بیرلشگن ملت‌لر تشکیلانی نینگ افغانستان بوییچه خاص نماینده‌سی دیبرا لاینز ایتیشیچه، تینچلیک مذاکره‌سینی آلغه آلیب باره‌دیگن ایکی تامان هم اوشبو فرصت دن استفاده قیلیب، افغانستان یشاوچیلری اولیمی نینگ اونگینی آلیش و زوروانلیک‌لرنی آزه‌یتیریش و سیاسی ثبات اورتگه آلیب کیلیش خصوصیده تلاش قیله‌دیلر.
خانم لاینز نینگ ایتیشیچه: «اوروش توخته‌تیلیشی، تینچلیک مذاکره‌سی اوچون یخشی فضا یره‌ته‌دی، خلق نی امیدلنتیره‌دی و یاردم سیور نهادلر بوتون افغانستان گه قیش‌لیک یاردملرنی توزیع قیلیش ده یخشی زمینه یره‌ته‌دی.»
یوناما تامانیدن ترقهتیلگن گزارش گه کوره، یوناما تینچلیک مذاکره‌سینی آلغه آلیب باره‌دیگن ایکی تامان بیلن هم یقیندن سوزلشیشی ممکن و تینچلیک مذاکره‌سی نینگ بیرینچی دوری باشلنگن پیتده هم بیرلشگن ملت‌لر تشکیلاتی نینگ باش کاتبی سپتمبر آیی ده لازم بولگن حالده یاردم بیریشده تیارلیگی نی بیلدیرگن ایدی.
شونینگدیک، شمالی آتلانتیک تشکیلاتی یا-ده ناتو افغانستان‌لیکلر ارا سوزلشوولرنینگ ایکینچی دوری باشله‌نیشینی خوش قرشی‌لب و اوشبو تشکیلات ۲۰۰۱- ییلدن بویان بولگن یوتوقلر سقلنهدیگن و افغانستان یشاوچیلری منفعتی‌گه بولگن سیاسی کیلیشوودن حمایت قیلیشینی بیلدیرگن.
افغانستان حکومتی نینگ مذاکره قیلووچی هیاتی، سوزلشوولر ایکینچی دوری باشله‌نیشی اوچون قطر باشکنتی دوحه‌گه سفر قیلگن.
