قندوز محلی مسوول‌لری نینگ ایتیش‌لریچه، اوشبو ولایتده طالبان جنگریلری نینگ ملی اردو بیر پوسته‌سی اوستیگه اویوشتیرگن هجوم نتیجه‌سیده، ایکی پولیس شامل ۱۲ حربی هلاک ایتیلگن.
قندوز ولایتی کینگش عضوی امرالدین ولی نینگ سلام‌وطندارگه ایتیشیچه، طالبان جنگریلری اوتگن کیچه ساعت ۱۰ اطرافیده قندوز شهری نینگ «سرحوض» منطقه‌سیده بیر پوسته اوستیگه هجوم قیلگن‌لر.
اونینگ ایتیشیچه، نیچه ساعت آتیشمه‌دن سونگ مذکور پوسته طالبان قولیگه سقوط قیلیب و ملی اردو کوچلریدن ۱۰ ته‌سی هلاک ایتیلگن.
جناب ولی نینگ کوپه‌یتیریشیچه، آتیشمه جریانیده پولیس کوچلری یاردم اوچون یولگه چیقگن، بیراق طالبان کمینی بیلن دوچ کیلیب ایکی پولیس هلاک ایتیلگن.
قندوز ولایتی کینگش اوشبو اعضاسی‌گه کوره، مذکور واقعه‌ده بیر پولیس شامل ۵ حربی طالبان قولیگه اسیر بولگن.
پامیر ۲۱۷- قول اردو قومندانلیگی و قندوز امنیتی مسوول‌لری فکرینی آلیش اوچون سعی و حرکت قیلدیک، لیکن موفق بولمه‌دیک.
بو هجوم مسوولیتی‌نی طالبان گروهی بوینیگه آلگن. طالبان سوزلاوچی‌لریدن بولمیش ذبیح‌الله مجاهد نینگ توییتر صحیفه‌سیده یازیشیچه، اوشبو گروه جنگریلری اوتگن کیچه قندوز-خانآباد قتناو یولیده جایلشگن بیر پوسته اوستیگه هجوم قیلگن.
اونینگ کوپه‌یتیریشیچه، مذکور هجوم نتیجه‌سیده امنیتی کوچلردن ۷ ته‌سی هلاک و «امان و مجید» نام‌لی ایکی قومندان شامل ۹ حربی اسیر بولگن.
