کندز و بغلان ولایت‌لریدن امنیتی منبع‌لری نینگ ایتیش‌لریچه، طالبان گروهی نینگ هجوم‌لری نتیجه‌سیده امنیتی کوچلردن ۱۶ ته‌سی هلاک و ۶ ته‌سی یره‌لنگن.
قندوز ولایتیدن امنیتی بیر منبع نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، طالبان گروهی اوتگن کیچه ساعت ۱۰ اطرافیده اوشبو ولایت نینگ چهاردره تومنی‌نی «عرب‌ها» منطقه‌سیده‌گی پولیس کوچلری نینگ ایکی پوسته‌سی اوستیگه هجوم قیلگن.
منبع گه کوره، امنیتی کوچلر بیلن طالبان گروهی آره‌سیده یوز بیرگن آتیشمه ساعت‌لرچه دوام قیلگن و چهاردره تومنی نینگ پولیس قومندانی یاردم اوچون باره‌دیگن بیرچاغده، اوشبو تومن نینگ «دوبندی» منطقه‌سیده طالبان گروهی نینگ کمینی بیلن دوچ کیلگن.
منبع نینگ کوپه‌یتیریشیچه، طالبان گروهی نینگ اوشبو هجومیده چهاردره پولیس قوماندانی محمد عمر صالح و بلوک قوماندانی شامل ۱۰ کیشی هلاک و باشقه ۴ کیشی یره‌لنگن.
منبع گه کوره، طالبان گروهی «عرب‌ها» منطقه‌سیده‌گی پولیس کوچلری نینگ ایکی پوسته‌سینی نظارت گه آلیب و امنیتی کوچلردن ۶ ته‌سی‌نی اسیر و بوتون قورال و اوق‌لرنی اوزلری بیلن آلیب کیتگنلر.
قندوز پولیس قومندانلیگی سوزلاوچیسی انعام‌الدین رحمانی نینگ بو خبرنی تصدیق‌لب ایتیشیچه، طالبان نینگ چهاردره تومنی‌نی «دوبندی» منطقه‌سیده‌گی هجومی کیین‌گه اوریلگن.
اونینگ ایتیشیچه، مذکور آتیشمه‌ده امنیتی کوچلردن ۲ ته‌سی هلاک و باشقه ۳ ته‌سی یره‌لنگن و طالبان جنگریلریدن ۵ ته‌سی هلاک و باشقه ۳ ته‌سی یره‌لنگن.
عین‌حالده، ایچکی ایشلر وزیرلیگی سوزلاوچیسی طارق آرین، قندوز ولایتیده طالبان تامانیدن اویوشتیریلگن هجومی تصدیق‌لگن، لیکن تلفات خصوصیده معلومات بیرمه‌گن.
شونینگدیک، بغلان ولایتیدن بیرقطار امنیتی منبع نینگ سلام‌وطندارگه ایتیش‌لریچه، طالبان جنگریلری اوتگن کیچه اوشبو ولایت نینگ بغلان مرکزی تومنی‌نی «غلام‌بای» منطقه‌سیده پولیس پوسته‌لریدن ۳ ته‌سی اوستیگه هجوم قیلگن.
منبع گه کوره، مذکور هجومده امنیتی کوچلردن ۵ ته‌سی هلاک و باشقه ۲ ته‌سی یره‌لنگن.
منبع نینگ کوپه‌یتیریشیچه، پولیس پوسته‌لریدن بیری طالبان قولیگه سقوط قیلگن، بیراق نیچه ساعت آتیشمه‌دن سونگ، مذکور پوسته قیته‌دن امنیتی کوچلر قولیگه توشگن.
عین‌حالده، نهرین تومنی ولسوالی فضل‌الدین مرادی نینگ ایتیشیچه، اوشبو تومن نینگ قطار بولیم‌لریده امنیتی کوچلر و طالبان آره‌سیده یوز بیرگن آتیشمه عاقبتیده، پولیس کوچلریدن ۱ ته‌سی هلاک و باشقه ایکی ته‌سی یره‌لنگن.
مذکور هجوم‌لر مسوولیتینی طالبان گروهی بوینیگه آلگن.
