قندوز مملکت نینگ شمالشرق تامانیده جایلشگن ولایتلردن دیر که باشقه ولایتلر گه قرهگنده کوپراق قالین ایشلب چیقارهدی.
قالین صنعتی مملکت نینگ اینگ ایسکی و درآمدلی صناعتلردن حسابلنهدی. قالین نینگ تورلی تیپ و دیزانی بار که اولر نینگ نقشهلری محلی دیزاینرلر تامانیدن تیارلنیب و توقووچیلر گه ارایه بولهدی. شونینگدیک قندوز ده محلی قالینلر نینگ تیپلریدن اینگ مشهوری وزیرلی، بشیری، بخارایی، پتنوس گل و تیتانیک دیر که مملکتده یخشی بازاری بار.
بیزلرنینگ فیسبوک صحیفهمیزگه باش اورینگ!
توقووچیلر و قالین ساتووچیلر نینگ ایتیشلریچه، اوتمیشده قالین صناعتی نینگ یخشی بازاری بار ایکن، لیکن حاضر ایسه اوشبو صنعت حقیقی شکلده رشد بیریلمهگن.
قندوز شهریده قالین ساتووچیلردن بیری حاجی عبدالرحیم نینگ ایتیشیچه، مملکتده یوز بیرگن سونگی اوزگریشلردن کیین، اولر کوپینچه قیینچیلیک بیلن روپهره بولگنلر. اونینگ کوپهیتیریشیچه، اوشبو صناعت سوداگرلری مملکت نی ترک قیلگنلر و کون اوتیشی بیلن شونینگدیک توقووچیلر سانی هم کمهیگن دیر.
اونینگ اورغولشیچه، اسلامی امارت بو توغریده درست توجه قیلمهگنی صورتده، اهالی اوشبو صنعت نینگ تووقیشدن قول تارتیشلری ممکن. اونگه کوره: «قریب ۶ یا-ده ۷ رقم قالینیمیز بار. کلوخ و بغچه، چهاردره، امام صاحب، قلعه زار، ینگی آرق و آق تیپه کبی هر تومن اوزی گه خاص قالینی بار. قالین نی قشاق عایلهلر تووقهدیلر، حاضر هم تار قیمت بولگن، اوچ متره قالین نی ایکی کیشی ایکی آیده تیارلهیدیلر و تیارلنگن قالین ۱۰ مینگ افغانی گه ساتیلهدی.»
قندوز شهریده ۳۵ ییلدن بویان قالین تووقیش ایشلری بیلن شغلنگن عبدالشکور نینگ ایتیشیچه، اولر حاضرگی وضعیتده کوپینچه مالی زیانلر بیلن روپهره بولگنلر. اونینگ کوپهیتیریشیچه، اوشبو صناعت صادرات بازاری سقوط قیلماقده و شونینگدیک سوداگرلیک وزیرلیگی مسئوللری بو توغریده توجه قیلمهیدیلر. اونگه کوره، اوتمیشده امام صاحب تومنی نینگ بیر مترهلیک قالینی، ۶۰ دالر گه ساتیلهر ایدی، بیراق حاضر ایسه اونینگ قیمتی ۳ دالر گه ییتیشگن دیر.
«قالین ساتیش حاضر ایسه تاوان بیر تاوان دیر. ایکی ییل آلدین یوزمینگ گه قالین آلگن ایدیک، حاضر ۳۰مینگ گه هم هیچ کیم آلمهیدی. واردات و صادرات یوق، شونینگدیک نه سوداگرلیک وزیرلیگی و نه سوداگرلیک اتاقی بو توغریده توجه قیلهدی. بیخی قالین ساتیش بازاری سقوط قیلگن دیر.»
شمال شرق زون قالین ساتووچیلر بیرلشمه ریاست رئیسی عبدالله کلانتری نینگ ایتیشیچه، اوشبو ولایتده ۲۰ تیپ قالین ایشلب چیقاریلهدی، لیکن اوشبو صناعت خصوصیده سوداگرلیک کملیگی اولر نی خواطرلنتیرگن دیر.
جناب کلانتری گه کوره، دولتی و خصوصی ادارهلری تشقی تولیدلر نی ایشلب چیقاریش اورنیده، اوز مملکتیمیز نینگ قالینلریدن قوللنیشلری کیرهک.
باشقه بیر تاماندن، قندوز سوداگرلیک و صناعت اتاق ریاست رئیسی غلامعلی عیدیزاده نینگ ایتیشیچه، ولایتده قالین ایشلب چیقاریلیشی یخشی دیر، لیکن اونینگ صادراتی کمهیگن.
اونینگ کوپهیتیریشیچه، افغانستان قالینلریدن کوپینچهسی پاکستان بندلری آرقهلی صادر بولیب و مذکور ییرده پاکستان نامی گه ساتیلهدی.
بیزلرنینگ توییترده هم تعقیب قیلینگ!
«الحمدالله قندوز ولایتیده قول صناعت ایشلب چیقاریلیشی کوپ یخشی دیر، لیکن صادرات آز دیر. تشقی مملکتلر گه صادراتیمیز بولمهگنی باعث، بیر قطاری قالینلریمیز تورخم یولی آرقهلی پاکستان گه وارد بولهدی. اوز مملکتیمیز نینگ تولیدلری باشقه ممکلتلر نینگ نامی گه ساتیلهدی.»
شونینگدیک بوندن آلدین هم مملکتده مسگرلیک، کلاللیک و قرهقل تیریسی صناعتی نینگ رکود قیلگنی خصوصیده خواطرلر بیان بولگنیدن کیین، حاضر ایسه قندوز ده قالین صناعتی ایشی نینگ کمهیشی توغریسیده خواطرلر بیان بولگن.