سپتامبر آیی گچه چیت‌ایللیک کوچلرنینگ افغانستان دن چیقیشی اعلام ایتیلگنیدن کیین، ایکی کون آلدین آمریکا تشقی ایشلر وزیری آنتونی بلینکن کابل کیلیب و افغانستان‌لیک رسمیلر بیلن اوچره‌شگن.
آمریکا تشقی ایشلر وزیری دولتی رسمیلر بیلن اوتکزگن سوزلشوویده اورغولشیچه، آمریکا حربیلری نینگ افغانستان چیقیشی، ایکی ممکلت آره‌سیده استراتیژی علاقه‌لرنینگ کوچ‌سیزلیگی گه سبب بولمه‌یدی. شونینگدیک اونینگ ایتیشیچه، آمریکا افغانستان نینگ خصوصیده بیرگن وعده‌لریگه پابند قاله‌دی.
بیراق سیاسی ایش بیلرمان‌لردن قطاری نینگ ایتیش‌لریچه، آمریکا تشقی ایشلر وزیری سیاسی رهبرلرنینگ خرسندلیگی اوچون بونده‌ی بیانات بیرگن. سیاسی ایش بیلرمان‌لردن بیری مصطفی علی‌زاده نینگ ایتیشیچه: «آمریکانینگ افغانستان یشاوچی‌لری و انسان حقلریدن سقلش توغریسیده بیرگن وعده‌لری یالغیز سوز گه قاله‌دی و عمل گه بونده‌ی بیر نرسه کورمه‌یمیز. آمریکا تشقی ایشلر وزیرلیگی سیاسی رهبرلرنینگ خرسندلیگی اوچون بونده‌ی بیانات بیرگن.»
عین حالده، سیاسی ایش بیلرمان‌لردن باشقه بیر قطاری نینگ ایشانچی گه کوره، آمریکا بوتونلی افغانستان دن چیقمه‌یدی؛ بلکیم بو مملکتده حضوری نینگ روشی نی اوزگرتیره‌دی.
سیاسی ایش بیلرمان جعفر مهدوی نینگ ایتیشیچه: «آمریکا افغانستان نی ترک قیلمه‌گن و ترک قیلمه‌یشی هم ممکن، بلکیم حضوری نینگ طریقه‌سینی اوزگرتیره‌دی و او بو که افغانستان ده توغری حضوری نینگ خره‌جتی نی صفر گه قویی کیلتیره‌دی. بیراق اونینگ استخباراتی کوچلری نی کینگ شکلده حضوری بار و افغانستان ده آمریکا نینگ سیاسی حضوری کینگ و کوچلی بولیشی ممکن.»
شونده‌ی بیرحالده، اوتگن هفته چهارشنبه کونی آمریکا جمهوررئیسی جو بایدن، رسمی شکلده حربیلری نینگ افغانستان دن چیقیش تاریخی نی اعلام قیلدی. عین حالده، ناتو هم آمریکا حربیلری بیلن بیرگه بو تشکیلات حربیلری هم افغانستان نی ترک قیلیشی ممکن دیدی.
آمریکا جمهوررئیسی جو بایدن نینگ ایتیشیچه، آمریکالیک حربیلر نینگ افغانستان دن چیقیشی می آیی گه باشله‌نیب و ۱۱- سپتمبر آیی گچه یکونلنه‌دی کیم بو تاریخ القاعده نینگ نیویورک برج‌لری اوستیگه اویوشتیرگن هجومی نینگ ۲۰ ییل‌لیگی گه ماس کیله‌دی.
عین حالده، طالبان آمریکا نینگ دوحه کیلیشوونامه‌سینی نقض قیلیش گه عیبله‌ب ایتیش‌لریچه، اونینگ عاقبتی آمریکا نینگ بویینیگه دیر.
