مین نقیب صدیقی، ژورنالیست فاکولتهسیدن فارغ بولگن من. حاضر گرافیک دیزاینر صفتیده ایشلهی من. صنعی هوش بیلن تنیشوویم اجتماعی ترماقلرده اونینگ کېنگ ترقهلیشی و اۉزیمدهگی قیزیقووچیلیک حسیدن باشلندی. اوشه پیتده همه ینگی بیر حادثه – صنعی هوشنینگ تاپیلیشی و او انسانلر حیاتیگه تکنالوژیلر عصریده کیلتیرگن قولیلیکلر حقیده گپیرردی. گرچی فایدهلنووچیلرنینگ صنعی هوش بیلن ایشلش و اونی اورگهنیش حقیدهگی حکایهلری تورلیچه بولسهده، مین اوچون بو حادثهنینگ تاپیلیشی صاف بیر معجزه اېدی.
دستلب بو حادثهنینگ افغانستان اخبارات مکانیگه کیریب کیلیشی بیلن صنعی هوشنی تنیش و قوللش کېنگ ترقلمهگن اېدی – یاشلر و فایدهلنووچیلرنینگ آز قسمی اوندن فایدهلنردی. امریکادهگی تکنالوژی کمپنیهسی اوشبو حادثهنی تقدیم ایتگنیدن سۉنگ بو مینگه نهایتده هیجانلی توییلدی. چونکه صنعی هوشنینگ معلوماتلرنی قیته ایشلشدهگی ثمرهدارلیگی و قدرتی تکنالوژی فنلری تاریخیده مثلی کوریلمهگن اېدی. صنعی هوش ایلک بار تاپیلیشی کونلرده اوندن فایدهلنیش همه گه ممکن اېمسدی – اونگه کیریش اوچون حساب یرهتیش و فقط معلوم شرایط گه ایگه مملکتلرده تولاو قیلیش طلب ایتیلردی. انه شو چېکلاولر سببلی افغانستانده اوندن کم فایدهلنیلگن.
تنیشوو «هیجانی»
صنعی هوش یا که چتجیپیتینینگ تنیشتیریلیشی و اونینگ ثمرهدارلیگی مین اوچون جوده قیزیقرلی بولدی – هیجانلنیب کیتدیم. بو جوده ینگی و نهایتده عجایب امکانیتلر گه ایگه حادثه اېدی. چونکه دستلب اوندن فایدهلنیش کېنگ ترقلمهگن، فقط مخصوص شرایط گه ایگه مملکتلرده حساب آچیش آرقهلی فایدهلنیش ممکن اېدی. شو سببلی، بیرآز وقت اوتیب، حرکت قیلیب، حساب آچدیم و تکنالوژی عالمی گه کیریب باردیم.
صنعی هوش بیلن تنیشوویم توصیفلب بولمس هیجان و عجایبلنیشلر گه توله اېدی. او جوده قیسقه وقت ایچیده فایدهلنیووچیلر گه کېنگ قمراولی و کوپ قتلملی معلوماتلرنی تقدیم اېتدی. صنعی هوش یرهتووچیلری فایدهلنووچیلرنینگ کوپچیلیگی اوچون بیپول فایدهلنیش امکانینی بیرووچی باغلنیش تیزیملرینی یرهتیشدی.
مین اوچون صنعی هوش بوتونلی ینگی بیر عالم اېدی. سیز بو مکانده جوده کېنگ معلوماتلر بیلن یوزلشهسیز. صنعی هوشدن فایدهلنگنینگیزده اېندی گوگلده ایزلش ضرورتی قالمهیدی، چونکه او سیز گه کېرهکلی نرسهلرنی جوده قیسقه وقت ایچیده ترتیبلنگن معلوماتلر شکلیده تقدیم اېتهدی.
صنعی هوش گه بیرینچی بار سوال بیرگنیمده، مین تکنالوژی انقلابی بیلن یوزمه-یوز تورگنیمنی انگلهدیم. دستلبکی تصوریمچه، صنعی هوش گوگل یا که باشقه پلتفرملر گه اوخشش ایشلهیدی دیب اویلهگن اېدیم، بیراق اوندن فایدهلنگنیمده اونینگ معلومات حجمی و تیزکارلیگینی کوریب، حیرتده قالدیم – بو ایشانیب بولمس درجهده اېدی.
ضرورت و خواطر
صنعی هوش حیاتنینگ برچه جبههلریده کېنگهیب باریشی انکار ایتیب بولمهیدیگن بیر ضرورت دیر. تکنالوژی عصریده بو حادثهنینگ رواجلنیشینی توختهتیب بولمهیدی. چونکه زمانهوی حیات بیر قطار احتیاجلر و ضروریتلر بیلن چمبرچس باغلنگن- اولردن بیری هم صنعی هوش دیر.
بیز صنعی هوش و باشقه تکنالوژی پلتفرملردن فایدهلنیشگه قرشی چیقمسلیگیمیز کېرهک، چونکه بو واسطهلر حاضرگی کونده حیاتنینگ اجرهلمس حقیقتی گه ایلنگن. شو بیلن بیرگه، احتیاطکارلیکنی و اونگه عاید خواطرلرنی هم اونیتیلمسلیگی ضرور. صنعی هوشدن فایدهلنیشده تولیق خبردارلیک و آگاهلیک بیلن یاندهشیش لازم.
صنعتی هوش بارهسیدهگی تشویشلر هم آز اېمس. مثلاً گرافیک دیزاینر یا که شو ساحه بیلن باغلیق کسبلرده ایشلاوچی آدملر اوچون اساسی خواطر – بو کسبنینگ استه-سیکین صنعی هوش تامانیدن ایگللهنیشی احتمالی دیر. صنعی هوش شو تیزلیکده رواجلنهویرسه، کېلهجکده کوپلب کسب و ساحهلرنی انسانلردن آلیب قوییشی ممکن.
شونگه قرهمی، انسان یرهتووچنلیگی بیلن صنعی هوش محصولاتلری اورتهسیده سیزیلرلی فرقلر موجود. ینگی اولاد و یقینده صنعی هوشدن فایدهلنیشنی باشلهگن فایدهلنووچیلر احتیاطکارلیک و موازنتنی سقلشلری کېرهک. اولر اوندن فایده آلیش مقصدیده، آنگلی و مسئولیتلی طرزده فایدهلنیشلری لازم.
صنعی هوش – بو بیر وقتنینگ اوزیده هم کتته امکانیت، هم کتته تهدید دیر.
