آمریکا جمهوررئیسی نینگ ایتیشیچه، اونینگ رهبرلیگیده‌گی دولت افغانستان اوروشی نی یکونلنتیریش اوچون جاری دیپلماتیک پروسه‌دن جدی حمایت قیله‌دی.
اوتگن کون (جمعه ۱- حوت) آمریکا جمهوررئیسی جوبایدن، مونیخ امنیتی ییغینیده آنلاین شکلده بیانات بیریب ایتیشیچه، شونینگدیک افغانستان ینه بیر مرته آمریکا و اونینگ بیرلشیک‌لریگه قرشی ترورچیلیک گروه‌لرنینگ فعالیتی اوچون تینچ بیر اویه گه اوزگرمه‌سلیگی توغریسیده ایشانچ قولگه کیلتیریش‌لری کیره‌ک.
آمریکا جمهوررئیسی گه کوره، اونینگ مملکتی افغانستان تینچلیک پروسه‌سی خصوصیده بیرلشیک‌لری بیلن مصلحت قیلیش اوچون متعهد دیر. جناب بایدن آمریکا جمهوررئیسی صفتیده تنلنگندن کیین بو بیرینچی مرته کیم افغانستان تینچلیک پروسه‌سی حقیده بیانات بیره‌دی.
مذکور پروسه دونالد ترامپ رهبرلیگیده‌گی دولت زمانیده باشلنگن و آمریکا و طالبان گروهی آره‌سیده اوزون سوزلشوولر اوتکزیلگنیدن کیین، اوتگن ییل ۱۰- حوت گه بیر کیلیشوونامه امضاله‌دیلر.
حاضر بایدن دولتی ایکی تامان بو کیلیشوونامه گه قنچه‌لیک عملی قیلگنی نی بیللی قیلیش اوچون مذکور کیلیشوونامه نی تیکشیرماقده. اوشبو کیلیشوونامه اساسیده چیت‌ایللیک کوچلر جاری ییل می آیی گه افغانستان دن چیقیش‌لری کیره‌ک.
ناتو مدافعه وزیرلری اوتگن هفته چهارشنبه و پنج‌شنه کونی اوتکزگن ایکی کونلیک ییغین‌لریده بو حقده قرار آلمه‌گنلر. عین حالده، آمریکا مدافعه وزیری لوید آستین نینگ ایتیشیچه، مملکتی شاشیلینچ و ترتیب‌سیز شکلده افغانستاندن چیقمه‌یدی.