بدخشان ولایتی نینگ واخان تومنیده قیش فصلی تیز ییتیب کیلگنی باعث، اوشبو تومن یشاوچیلری زراعتی محصول‌لرینی توپلشده فرصت قولگه کیلتیره آلمگنلر.
واخان تومنی قطار دهقان‌لری نینگ ایتیش‌لریچه، قیش فصلی تیز ییتیب کیلگنی اوچون، زراعتی محصول‌لرینی توپلشده قادر بولمگنلر . اوشبو کیشی‌لر نینگ سوزیگه کوره، قار یاغگن صورتده بوتون محصول‌لری اورته دن کیتیشی ممکن.
واخان تومنی یشاوچیلریگه کوره، اگرده قار دواملی صورتده یاغگن حالده زراعتی محصول‌لرینی توپلشده قادر بولمه‌یدیلر و شونینگ دیک قیش فصلیده آذیق اوقات آزلیگی بیلن روپه‌ره بولیش‌لری ممکن.
واخان تومنی نینگ بیر یشاوچیسی، اوشبو تومن یشاوچیلری نینگ برچه زراعتی محصول‌لری قار آستیده قالگنیدن خبیر بیریب و هوا وضعیتی مناسب لشمگن حالده بوتون زراعتی محصول‌لر قار آستیده قالیب اورته دن کیشی ممکن دیگن.
اونینگ سلام‌وطندارگه ایتیشیچه، اولر سیس‌لرینی اوشبو رادیو آرقه‌لی مسؤل کیشی‌لرگه ایشتیریب و مسؤل کیشی‌لردن بدخشان نینگ اوزاق منطقه‌لریده یشه‌یدیگن یشاوچیلرگه توجه قیلیشی نی سوره‌یدیلر.
او منه بولرنی ایته‌دی” اوتگن کیچه قار یاغگنی باعث، بوتون زراعتی محصول‌لریمیز قار آستیده قالدی و لیکن بیز محصولاتیمیزنی توپلشده قادر بولمه‌دیک؛ چونکه بیزنی قولیمیزده زمانوی ماشین تریشل یوق و انه شو سببدن سنتی روشده خرمنی میزنی توپله‌یمیز”
بدخشان ولایت کینگش عضوی طلب‌الدین قادری نینگ ایتیشیچه، واخان تومنی گه نیچه کوندن بویان یاغیش یاغه‌دی و سونگی کون‌لرده ۲۰ سانتی قار یاغگنی باعث واخان نینگ ایریم منطقه‌سیده بوتون زراعتی محصول‌لر قارنی آستیده قالگن.
جناب طلب‌الدین گه کوره، واخان تومنی قطار قشلاق‌لری نینگ یشاوچیلری زراعتی محصول‌لرینی توپلشده قادر بولمگن، اگرده وضعیت شوندی دوام ایتگن حالده اوشبو یشاوچیلر آذیق اوقات آزلیگی تهدیدی بیلن دوچ کیله‌دی و محلی مسؤل‌لر اوشبو خصوصده توجه قیلیشی کیره‌ک.
بدخشان ولایت حاکمی نینگ سوزلاوچیسی نیک محمد نظری گه کوره، هر ییل قیش فصلی ییتیب کیلیشی بیلن بدخشان ولایتی قطار تومن‌لری نینگ یشاوچیلری ایریم قیین‌چیلیک بیلن روپه‌ره بوله‌دی، لیکن جاری ییلده‌گی یاغیش‌لر یشاوچیلرنی کوپینچه قیین‌چیلیک بیلن روپه‌ره قیلگن.
جناب نظری گه کوره، بدخشان ولایتی نینگ محلی اداره سی واخان تومنی یشاوچی لری آذیق اوقات آزلیگی بیلن دوچ کیلمس لیگی خصوصده لازم بولگن چاره و تدبیرلرنی آلگن.
بدخشان طبیعی آفت‌لر گه قرشی کوره‌شیش ریاستی نینگ باشلیغی فرید نیک پور گه کوره، احتیاطی تدبیرلر آلینگن، احتیاج بولگن حالده تاجیکستان طریقی بیلن بدخشان نینگ ۹ تومنی گه آذیق اوقات اوزه‌ته میز.
انه شوحالده بدخشان ولایتی کینگش اعضالری، اگرده حکومت شو حاضردن چاره و تدبیر کورمگن حالده، قیش فصلیده قتناو یول‌لر باغلنیشی ممکن دیدیلر.
