اسلامی امارت سوزلاوچیسی و معلومات و مدنیت وزیرلیگی نینگ معینی ذبیح الله مجاهد، پاکستان باش وزیری عمران خان نینگ افغانستان گه متخصص کدر جونه‌تیشیگه عکس العمل کورسه‌تیب، بو مملکت تشقی ایشلاوچیلرگه احتیاجی یوق‌لیگینی ایتگن.
ذبیح الله مجاهد میدیالر بیلن اوتکزگن صحبتیده ایتیشیچه، پاکستان نینگ اوشبو قراری‌دن تشکرلیک قیله‌دی، بیراق افغانستان ده ییترلیچه ملَکه‌لی و تحصیل قیلگن کدرلر موجود. جناب مجاهد اسلامی امارت نینگ قطرده‌گی دفتری سوزلاوچیسی محمد نعیم وردک تامانیدن ترقه‌لگن صوتی صحبتیده تاکیدلشیچه، افغانستان نینگ وزارت خانه‌لری ده ایشلش اوچون تحصیل قیلگن یاشلر موجود و تشقی ایشلاوچیلرگه احتیاج‌لری یوق.
بیزلرنینگ فیسبوک صحیفه‌میزگه باش اورینگ!
جناب مجاهد نینگ اورغولشیچه، نیاز بولگن تقدیرده خارج دن ایشلاوچی کدرلرنی چقیره‌دیلر و بیرقطار مملکتلر بو توغریده افغانستان گه تکلیف قیلگن، لیکن افغانستان کدر و ملَکه‌لی لحاظ دن بای بیر مملکت.
شونینگدیک اسلامی امارت سوزلاوچیسی، اقتصاد و سوداگرلیک بوییچه افغانستان ده احتیاج بارلیگینی تصدیقلب ایتیشیچه، مملکت بوییچه بانک‌لرده تاپیلگن قیینچیلیکلر حل ایتیلیشی اوچون یاردم بیریلیشی کیره‌ک.
ینگی‌لیکده پاکستان باش وزیری عمران خان، افغانستانده‌گی بشری انقراض نی آلدینی آلیش اوچون طبیات، تکنالوژی، مالیه‌وی و حسابات بوییچه اوشبو مملکت گه بشری کوچ جونه‌تیلیشی باره‌سیده پاکستان رسمی‌لری گه بویروغ بیرگن. عمران خان اوشبو بیاناتی افغانستان ایچیده ایریم عکس العمل‌لرگه یوزمه‌یوز بولگن.
مملکت سابق جمهور باشلیغی حامد کرزی عمران خان نینگ بیاناتی گه عکس‌العمل کورسه‌تیب ایتیشیچه، تشقریدن ایش کوچلری نینگ کیلیشی گه هیچ قنده‌ی احتیاج یوق.