اوچ کوندن بویان جوزجان-بلخ قتناو یولی نی باغله‌گن جوزجان یشاوچی‌لریدن یوزلرچه‌سی بوگون (شنبه ۲۵- دلو) بلخ محلی مسئوللری نینگ استعفا بیریشی نی سوره‌شگن.
اعتراضچیلر اعتراض‌لری نینگ اوچینچی کونیده جوزجان ولایتی آقچه تومنی نینگ اوچ یولیده آگاه‌لنتیریش‌لریچه، بو توغریده‌گی توجه‌سیزلیکلر دوام تاپگن صورتده، موترلرنی اوت بیریب و نافرمانلیکلرگه دوام بیره‌دیلر.
افغانستان ترکمن‌لری نینگ اسلامی بیرلشیک کینگش باشلیغی محمدموسی قرقین نینگ سلام‌وطندارگه ایتیشیچه، ۹ یاشر عبدالرووف نینگ اوغیرلنگنیدن ۱۰۰ کوندن آرتیق اوتماقده؛ بیراق حکومت اونینگ قوییب یوباریلیشی اوچون هیچ قنده‌ی حرکت قیلمه‌گن. اونگه کوره، مرکزی حکومت بو توغریده بوندن کوپراق توجه‌سیزلیک قیلگن صورتده، مدنی نافرمانلیکلرگه قول اوره‌دیلر.
جناب قرقین نینگ کوپه‌یتیریشیچه، افغانستان ترکمن‌لری بلخ محلی رسمی‌لری نینگ استعفا بیریشی و عبدالرووف نینگ قوییب یوباریلیشی نی سوره‌یدی. جوزجان ولایتی آقچه تومنی محلی مسئوللری، جوزجان-بلخ قتناو یولی، اعتراضچیلر آرقه‌لی باغلنگنی نی تصدیقله‌گن.
باشقه بیر تاماندن یوزلرچه موتر ایرته ساعت ۷ دن بویان جاده نینگ ایکی تامانیده بند قالگن و کیلیب-کیتیش اوچون اولرگه رخصت بیریلمه‌گن.
شونده‌ی بیرحالده، فاریاب ترکمن‌لریدن هم بیر قطاری عبدالرووف نینگ قوییب یوباریلمه‌گنی اوچون اعتراض بیلدیریب و آقینه بندری نینگ قتناو یولی نی باغله‌گنلر.
فاریاب ولایتی اندخوی تومن یشاوچی‌لریدن بیری سردارمحمد نینگ ایتیشیچه، عبدالرووف آدم اوغیرلاوچیلرنینگ قولیدن قوییب یوباریلگونگه قدر بو قتناو یول آچیلمه‌یدی. اونگه کوره، حکومت عبدالرووف نی تیزلیککه آدم اوغیرلاوچیلرنینگ قولیدن آزاد قیلیب و عایله‌سیگه تسلیم بیریشی کیره‌ک، بولمه‌گنده اعتراض‌لریگه دوام بیره‌دیلر.
