۹ یاشیده بولگن عبدالرووف ۲ یریم آی آلدین آدم اوغیرلاوچی‌لر تامانیدن اوغیرلنگن و آدم اوغیرلاوچی‌لر اونینگ قوییب یوباریلیشی‌گه قرشی ۱ میلیون و ۷ یوز مینگ دالر ایسته‌گن. بوگون “چهارشنبه” عبدالرووف نینگ عایله‌سی نینگ مزارشریف ده ایتیشیچه، کمیده ۱ یریم آی دن بویان بلخ حاکمی دفتری نینگ برابریده تحصن خیمه‌سی قورگن‌لر، بیراق حکومت هیچ‌قنده‌ی دقت قیلمه‌گن.
عبدالرووف نینگ آته‌سی محمد نبی نینگ آگاه‌لنتیریشیچه، نیچه کون جریانیده عبدالرووف آزاد ایتیلمه‌گن صورتده، طالبان گروهی‌گه مراجعت قیلیب اوشبو گروه دن یاردم ایسته‌ش‌لری ممکن. عبدالرووف نینگ عایله‌سی اونینک اوغیرلنیشی‌گه سیاسی سیمالرنینگ قول‌لری بارلیگی‌نی بیلدیریب و کیلهجک “یکشنبه” کونگه‌قدر اوغلی آزاد ایتیلمه‌گن صورتده، مذکور سیاسی سیمالرنی فاش قیلیش‌لرینی ایتگنلر.
اولرنینگ ایتیش‌لریچه، حکومت تعیین‌لنگن زمانده عبدالرووف نی اوغیرلاوچی‌لر نظارتیدن آزاد قیلمه‌گن صورتده، اعتراض‌لرینی کینگی‌تیریب و شمال ولایت‌لری نینگ قتناو یوللرینی باغله‌یدیلر.
بیراق، بلخ حاکمی فرهاد عظیمی نینگ ایتیشیچه، اوشبو باله‌نی اوغیرلاوچی‌لر نظارتیدن آزاد قیلیش اوچون سعی و حرکت‌لرنی دوامی بار. اونینگ ایتیشیچه، اوغیرلاوچی‌لر کوچلی بیر شبکه گه تیگیشلی و عبدالرووف‌گه آلیب باره‌دیگن بیر سرنخ تاپیلمه‌گن.
۹ یاشیده بولگن عبدالرووف ۷۶ کون آلدین مزارشریف شهریده مکتب باره‌دیگن بیرچاغده، حربی کییم‌لی آدم اوغیرلاوچی‌لر تامانیدن اوغیرلنگن ایدی.
