بلخ محلی مسووللری، ۹ یاشیده بولگن عبدالرووف نینگ اوغیرلنیشیگه قوللری بولگنی سبب، ۱۱ کیشی نینگ پولیس تامانیدن قولگه آلینگنیدن خبر بیرگنلر.
بوگون “دوشنبه” بلخ حاکمی فرهاد عظیمی نینگ خبری ییغین اوتکزیب ایتیشیچه، بلخ ولایتی نینگ مرکزی مزارشریف شهریدن ایکی آی آلدین ناتانیش قورالی کیشیلر تامانیدن اوغیرلنگن عبدالرووف نی آزاد ایتیلیشی اوچون بیرقطار حربی عملیات اوتکزیلگن و نتیجهده ۱۱ کیشی قولگه آلینگن.
بلخ حاکمی گه کوره، قولگه آلینگن ۱۱ کیشی جملهسیدن ۳ تهسی تدقیقات اوچون کابلگه انتقال بیریلگن.
جناب عظیمی نینگ کوپهیتیریشیچه، اوتگن بیر آی جریانیده اوتکزیلگن ایریم عملیاتلر نتیجهسیده ۳ کیشی آدم اوغیرلاوچیلر قولیدن آزاد ایتیلگن.
لیکن، بلخ ولایتی نینگ کوپینچه یشاوچیلری، محلی حکومت ایشلریدن تنقید قیلیب ایتیشلریچه، هر کون اوتیشی بیلن ترور، قتل و اوغیرلاوچیلیک واقعهلری نینگ رقمی کوپهیب بارماقده.
بلخ ولایتی بوییچه ساغلیقنی سقلش مسوول لری اوشبو ولایت نینگ دولتآباد تومنیده بولگن کسلخانه ایچیده حربی پوسته بولگنی سبب طالبان تامانیدن باغلنگنینی بیلدیرگنیدن سونگ، اوشبو ولایت یشاوچیلری ناتینچلیک و آدم اوغیرلاوچیلیک واقعهلر کوپهیگنیدن خوطر بیلدیرگنلر.