عبدالرووف نینگ لوچ و زنجیر گه باغلنگن صورتی نشر ایتیلگنیدن کیین، مملکت شمالیده‌گی ترکمن‌لر قیته‌دن ناراضلیک نمایش یولگه قوییشگن.
بوگون (پنجشنبه ۲۳- دلو) مملکت شمالیده‌گی ترکمن‌لردن یوزلرچه‌سی ۹ یاشر عبدالرووف نینگ قوییب یوباریلمه‌گنی اوچون ناراضلیک نمایش یولگه قوییب و شونینگدیک بلخ ولایتده‌گی حیرتان ایکی یولی، جوزجان-بلخ قتناو یولی و قندز ولایتیده شیرخان بندر نی ترافیک یوزیگه باغله‌گنلر.
جوزجان ولایتیده عبدالرووف نینگ قوییب یوباریلمه‌گنی اوچون، ناراضلیک نمایش یولگه قویگن‌لردن بیر قطاری نینگ ایتیش‌لریچه، ۹ یاشر عبدالرووف نینگ اوغیرلنگنیدن کمیده ۱۰۰ کون اوتماقده، بیراق حکومت بو باله نینگ قوییب یوباریلیشی اوچون ییترلیچه اقدام قیلمه‌گن.
اولرگه کوره، حکومت بو توغریده توجه قیلمه‌گن صورتده، مدنی نافرمانلیک‌لرگه قول اوریب و جمهورلیک ریاستی نینگ ایشگی نی باغله‌یدیلر.
اعتراضچی‌لرنینگ آگاه‌لنتیریشیچه، حکومت عبدالرووف نینگ قوییب یوباریلیشی اوچون تیزلیککه جدی بیر قرار آلمه‌گن صورتده، حکومت گه قرشی توریش‌لری ممکن.
جوزجان ولایتی آقچه تومن ولسوالی غلام سخی سبحانی، اعتراضچیلر جوزجان-بلخ قتناو یولی نی نیچه ساعت باغله‌گنلرینی تصدیقله‌گن.
عین حالده، یوزلرچه موتر قتناویول نینگ ایکی تامانیده بند قالگن و کیتیب-کیلیش اوچون اولرگه رخصت بیریلمه‌گن.
کسل‌دار یولاوچی‌لردن قطاری نینگ ایتیش‌لریچه، حکومت نینگ توجه‌سیزلیگی باعث بو وضعیت یوزبیرگن و بو قیینچلیکلر حل ایتیلیشی اوچون حکومت تیزلیککه اقدام قیلیشی کیره‌ک.
شونده‌ی بیرحالده، بلخ و قندوز یشاوچی‌لری هم ناراضلیک نمایش یولگه قوییش بیلن ۹ یاشر عبدالرووف نینگ قوییب یوباریلیشی نی سوره‌شگن. قندوز ولایتیده اونلرچه ترکمن ۹ یاشر عبدالرووف نینگ قوییب یوباریلمه‌گنی اوچون اعتراض بیلدیریب و شیرخان بندر قتناو یولی نی نیچه ساعت ترافیک یوزیگه یاپگنلر.
قندوز اعتراضچی‌لری نینگ ایتیش‌لریچه، عبدالرووف نینگ اوغیرلنگنیدن ۱۰۰ کوندن آرتیق اوتماقده، بیراق بلخ محلی اداره‌سی و مرکزی حکومت اونینگ قوییب یوباریلیشی اوچون ییترلیچه اقدام قیلمه‌گن.
قندز ولایتی کینگش باشلیغی محمدیوسف ایوبی، حکومتدن اهالی نینگ ایسته‌گی گه توجه قیلیشی نی سوره‌گن. جناب ایوبی گه کوره، اهالی عدالت‌سیزلیک برابریده سیس چیقاریش اوچون حقلی دیر.
شونده‌ی بیرحالده، بلخ حاکمی محمدفرهاد عظیمی بوگون خبری بیر ییغین اوتکزیب ایتیشیچه، اوتگن کیچه عبدالرووف نینگ قوییب یوباریش اوچون ۸ عملیات یولگه قویگنلر و عیاللر، باله‌للر شامل داعش گروهی گه تیگیشلی قطار کیشی‌لرنی قولگه آلگنلر. بیراق بلخ حاکمی قولگه آلینگن کیشی‌لرنینگ کیم‌لیگی توغریسیده معلومات بیرمه‌گن.
بلخ پولیس قومندانی سید معراج‌الدین سادات نینگ ایتیشیچه، عبدالرووف نینگ قوییب یوباریش اوچون حاضرگچه ۲۸ عملیات یولگه قویگنلر و شونینگدیک قطار کیشی‌لرنی قولگه آلگنلر. بیراق قولگه آلینگن کیشیلر توغریسیده ییترلیچه سند و حجت بولمه‌گنی باعث قیته قوییب یوباریلگن.
