هرات ولایتیده زعفران سوداگرلریدن بیری فرید احمد احمدی نینگ ایتیشیچه، کرونا ویروسی ترقه‌لگنی و خلق ارا پروازلر توخته‌تیلیشی سبب، اوشبو ولایتده زعفران بهاسی اوتگن ییل‌لرگه نسبتن قویی توشگن.
یالغیز فرید احمد زعفران بهاسی قویی توشگنیدن خواطر بیلدیرگن سوداگرلردن ایمس. شونینگدیک، هرات ولایتیده زعفران سوداگرلریدن باشقه بیری عبدالوکیل اکبری نینگ ایتیشیچه، سونگی تحولات، خلق ارا پروازلر توخته‌تیلیشی و سوو یوق‌لیگی ایشی نینگ اوستیگه سلبی تاثیر قوییگن.
هرات ولایتیده زعفران ایشلری بیلن شغللنه‌دیگنلردن بیرقطاری نینگ ایتیش‌لریچه، سابق لرده بیر کیلوو زعفران نینگ بهاسی ۷۰ مینگ افغانی ایدی، لیکن حاضرده ۲۵ مینگ افغانی‌گه کمه‌یگن.
هرات ده زعفران ایشلری بیلن شغللنه‌دیگنلر ملی بیرلشمه‌سی اورین باسری سید عبدالواحد سادات، اوشبو ولایتده زعفران وضعیتیدن خواطر بیلدیرگن.
عین‌حالده، هرات حاکمی اورین باسری سیدشیراحمد عمار مهاجر نینگ ایتیشیچه، اوشبو ولایتده زعفران سوداگرلیگی گه زمینه یره‌تیش اوچون سعی و حرکت قیله‌دیلر.
هرات ولایتی بوییچه ایکینچیلیک و چارواچیلیک ریاستی معلوماتی گه کوره، اوتگن ییل اوشبو ولایتده ۸ مینگ هکتار ییر گه زعفران ایکیلگن ایدی و ۲۰ تُن زعفران توپلنگن ایدی.
