فاریاب ولایتی مرکزی میمنه شهری ده تعلیم دن محروم کمبغل بالهلر ایشلاوچیلیک، ایاغ کیېمینی بویش، کارتن و ایچیملیک قوطیلرنی ییغیش کبی شاقه ایشلر بیلن مصروف دیر.
اولر، عایلهلری نینگ اقتصادی قیینچیلیگی و ایشسیزلیک باعث مکتب باره آلمهی و عایله اعضالری نینگ احتیاجلرینی تأمینلش اوچون شاقه ایشلرنی بجریش گه مجبورلیکلرینی معلوم قیلهدیلر.
۱۳ یاشر لالمحمد، آلتی ییل آلدین ایچکی اوروشلر و اقتصادی قیینچیلیک باعث فاریاب ولایتی قیصار تومنیدن اوشبو ولایت نینگ مرکزی میمنه شهری گه باشپنه اېزلب کېلگن ایتیشیچه، آتهسی کېکسه و ایشلهی آلمهیدی.
اونینگ کوپهیتیریشیچه، ایشلش قیین بولسه ده بیراق مجبورلیک و عایله اعضالری نینگ احتیاجلرینی تأمینلش اوچون کیچیک ایناغهسی بیلن بیرگه ایرتندن آخشم گه قدر میمنه شهری نینگ سرکلریده کارتن و قوطی ییغهدی.
اونینگ ایتیشیچه: «بو ییر گه کیلگنیمیزدن آلتی ییل اۉتماقده قوطی ییغهمیز بعضی کونلر ۱۰۰ افغانی و بعضی کونلر ۱۵۰ افغانی ایشلهیمیز، بو پول بیلن عایله اوچون قوروق نان ساتیب آلهمیز و بعضی کونلر هېچ ایشلهی آلمهیمیز. بیز کبی ایشلاوچی بالهلر کوپ ایاغ کییم بویهییدی، تیلنچیلیک قیلهدی، کارتن ییغیشهدی کمبغللیک طفیلی مکتب باره آلمهیدیلر.»
بیزلرنینگ فیسبوک صحیفهمیزگه باش اورینگ!
عینحالده، میمنه شهری ده ایشلاوچی بالهلردن باشقه بیری ۱۲ یاشر سید صبور، یگانه آرزوسی مکتب باریب و درس اوقیش دیر، لېکن اقتصادی قیینچیلیک و عایله اعضالری نینگ ایشسیزلیگی اونی بو نعمت دن محروم اېتگن.
اونگه کوره: «کمبغلمیز مکتب باره آلمهیمیز، ایشلهمسک حیات اۉتمهیدی، ۱۰ یا که ۱۵ ته نان پولینی تاپیش اوچون تلاش قیلهمیز، بیز هم درس اوقیب معلم بولیشنی اېستهیمیز بیراق باشقه چارهمیز یوق.»
اوشبو بالهلر سرپرست حکومت و بالهلرنی قۉللب-قوتلاوچی تشکیلاتلر اولرنی حمایت اېتیب و تعلیم زمینهسینی یرهتگن حالده، اولر درس اوقیش گه تیارلیکلرینی اېتهدیلر.
بیزلرنینگ «ایکس» ترماغی ده هم تعقیب قیلینگ!
عینحالده، فاریاب ولایتی ایش و اجتماعی ایشلر ریاستی رسمیلری، ایچکی اوروشلر، عایلهلر نینگ بالهلر حقوقیدن آگاهیسیزلیگی، کمبغللیک و اقتصادی قیینچیلیک نی مذکور ولایتده ایشلاوچی بالهلر سانی کوپهیش عاملی عنوان قیلهدیلر.
فاریاب ولایتی ایش و اجتماعی ایشلر باشلیغی ریحانالدین متوکل نینگ ایتیشیچه، بو اداره اوشبو ییل ده بیر مینگ ۷۳۴ سرپرستسیز و اېتیم باله گه یاردم کورستگن و شونینگدیک ایکّی مینگ کمبغل و اېتیم باله گه مسلکی کورس و بالهلر باغچهسیده بالهلر نینگ تربیهلش همده اولر نینگ عایلهلری گه کیچیک تجارت ایجاد اېتیش همده کمبغل عایلهلر گه آزیق-آوقت و باشقه نرسه یاردم بیریش مقصدیده سعی-حرکت قیلماقدهلر.
متوکل جنابلری، اوشبو ولایتده ایشلاوچی بالهلر نینگ انیق رقمینی بیللی قیلمسه ده، بیراق ایتیشیچه: «دولتی بالهلر باغچهسیده ۲۵۰ باله سیغه ده تېزلیک بیلن فعال قیلیش اوچون تلاش قیلهیپمیز بو بالهلر باغچهسیده تعلیم و تربیه، مناسب آوقتلنیش، مناسب جای، مناسب تعلیم بیریلهدی.»
عینحالده، مملکت ده سۉنگی سیاسی اوزگریش دن کېین کمبغللر اینیقسه ایشلاوچی بالهلر سانی کوپهیگن.
بوندن آلدین بیرلشگن ملتلر تشکیلاتی نینگ بالهلرنی قۉللب-قوتلاوچی صندیغی اۉز گزارشیده، ۲۰۲۳ ییل نی افغانستان بالهلری اوچون فاجعهلی دیب و بو مملکت ده بالهلر نینگ اوچ دن بیر قسمی شاق ایشلر بیلن مصروفلیگینی بیلدیرگن اېدی.