تخار مرکزی تالقان شهری حدودلریده جایلشگن «شورچه» قیشلاغی، تالقان شهری‌دن اونچه‌لیک اوزاق ایمس؛ لیکن مذکور قیشلاق یشاوچیلری ایچیم‌لیک سوودن فایده‌لنه آلمسلیک‌دن شکایت قیله‌دیلر.
اولر نینگ سلام‌وطندار گه ایتیشلریچه، ایچیم‌لیک سوودن فایده‌لنه آلمسلیک سبب، مذکور قیشلاق یشاوچیلریدن کوپینچه‌سی بویره‌ک، جگر و تنفسی کسل‌لیک‌لر گه چلینگن.
مذکور قیشلاق یشاوچیلری نینگ کوپه‌یتیریشلریچه، قشاق‌لیک و کمبغل‌لیک سبب تاغ‌لر آره‌سیده قالیب و حیات نینگ دستلبکی امکانیت‌لریدن محروم‌لر.
بیزلرنینگ فیسبوک صحیفه‌میزگه باش اورینگ!
شورچه قیشلاغی یشاوچیلریدن محمدصالح نینگ ایتیشیچه: «اوشبو قودوق نی کوره‌سیزلر اوستینی یاپیپ قویگن‌میز و اونگه یامغیر سووی جمع‌لنه‌دی. ۱۰۰ فایز‌دن ۲۰ فایزی هم قوللنیش امکانیتی گه ایگه ایمس. مجبور قالیب قوللنه‌میز. بیر قطار کیشی نینگ جگر قیین‌چیلیگی بار، بعضی نینگ بویره‌گی‌ده تاشی بار و شو رقم تنفسی کسل‌لیگی بار که اوشبو سوولر اوچون اورته گه کیلگن.»
شونینگدیک شورچه قیشلاغی یشاوچیلریدن باشقه بیری محمدنبی نینگ ایتیشلریچه: «سووی‌میز نینگ لایی بار. لای‌لی سوو ایچه‌میز. جگرم‌ده تاشی بار و بعضی وقت هم اوزاق منطقه‌لردن سوو کیلتیره‌میز و او هم پاک ایمس.»
شونینگدیک مذکور قیشلاق یشاوچیلری گه کوره، سوو تاشقینی یوز بیره‌دیگن قسمت‌لرده قودوق قازگنلر که کوپراق یامغیر سووی و سوو تاشقینی ذخیره بوله‌دی. اولر نینگ ایتیشلریچه، گرچند بو سوولر ساغلام ایمس و ریگی بار؛ لیکن بو سوودن فایده‌لنیش گه مجبورلر.
محل بویوک‌لری نینگ ایتیشلریچه، یامغیر سووی‌دن یالغیز قیش و بهار موسومی‌ده قوللنیشلری ممکن و یاز موسومی‌ده یامغیر یاغمسلیگی سبب، ذخیره‌لری قوریب و بو موسوم‌ده ایچیم‌لیک سوو تاپیش اوچون ایشکلرگه بینیب سوو اختریش اوچون تاغ‌لر و وادی‌لر گه کیته‌دیلر.
مذکور قیشلاق یشاوچیلریدن محمدعمر نینگ ایتیشیچه: «شورچه دره‌سیده بیش مسجد اوشبو جمع‌لنگن سوودن قوللنه‌‌دی و یاز موسومی‌ده اهالی سوو اوچون کیله‌دیلر که سوو یوق و یاز موسومی‌ده سوو یوقلیگی قیین‌چیلیگی کوپه‌یه‌دی.»
شونینگدیک شورچه قیشلاغی یشاوچیلریدن باشقه بیری خال‌بی‌بی نینگ ایتیشیچه: «ایشک نی آلیب و خورجین نی تشله‌یمیز و قیرگه سوو تاپسه‌ک آلیب کیله‌میز که او هم شور دیر و بوغیزیمیز‌دن هم اوتمه‌یدی. شو رقم ییمک پیشیریش اوچون هم بو سوودن قوللنه‌میز.»
شونده‌ی بیرحالده، شفاکارلر نینگ ایتیشلریچه، تخار ده یوزلب کیشی نینگ حیاتی نی جدی خواطر بیلن روپه‌ره قیله‌دیگن قیین‌چیلیک‌لردن بیری، افلاسلنگن سوو نینگ ایچیش عاقبتیده یوز بیره‌دی. شفاکارلر گه کوره، ایچیم‌لیک سوودن فایده‌لنه آلمه‌‌گن کیشی‌لر، ایچیش اوچون یامغیرلر نینگ جمع بولگن سوولریدن قوللنه‌دیلر.
بو توغریده داخله بولیمی شفاکاری سلطان محمود نینگ ایتیشیچه: «سوو شور بولگنی‌ده فشار، بویره‌ک و حتا جگر گه ضرر ییتیشتیره‌دی. سوو نینگ افلاسلنگن بولسه و او سوودن حیوان و انسان قوللنگن بولسه، تورلی مکروب‌لر گه چلینه‌دی انسان و معده مکروب‌لری گه هم سبب بوله‌دی.»
بیزلرنینگ «ایکس» ترماغی ده هم تعقیب قیلینگ!
عین حالده، تخار قیشلاق‌لر نی رواجلنتیریش و قیته قوریش ریاستی سوزلاوچیسی سمیع‌الله صمیمی نینگ ایتیشیچه، شورچه قیشلاغی یشاوچیلری گه همکار موسسه‌لر یاردمی بیلن ایچیم‌لیک سوو تامین‌لش خصوصیده سعی‌وحرکت قیله‌دیلر.
اونینگ کوپه‌یتیریشیچه: «قیشلاق‌لر نی رواجلنتیریش اداره‌سی شورچه ساحه‌سیده ایچیم‌لیک سوو تامین‌لنیشی توغریسیده یشاوچیلر اوچون همکار موسسه‌لر و دونرلر نی قانع قیلیش گه سعی‌وحرکت قیلماقده. انه شوو سبب قیشلاق‌لرنی رواجلنتیریش اداره‌سی بو توغریده تلاش قیله‌دی که یشاوچیلر گه ایچیم‌لیک سوو تامین‌لنسه.»
ایتیش کیره‌ک که، ۳۰ کیچیک و بویوک قیشلاق‌لردن عبارت بولگن شورچه قیشلاغی، تخار ولایتی مرکزی تالقان شهری نینگ ۳۰ کیلومترلیگی‌ده جایلشگن دیر و بو محل یشاوچیلری حیات نینگ دستلبکی امکانیتلری جمله‌دن ایچیم‌لیک سوو، درمانی مرکز و سرک‌دن مکمل شکلده فایده‌لنه آلمه‌یدیلر.
