بوندن آلدین طالبان نظارتیده بولگن منطقه‌لرده اولرنینگ عسکر آلیش‌لری خصوصیده گزارش‌لر ترقه‌تیلگن ایدی. لیکن حاضرده مملکت بیرقطار یشاوچی‌لری نینگ بو مسله‌نی تصدیق‌لب سلام‌وطندارگه ایتیشلریچه، طالبان نینگ آتیشمه‌لرده هلاک ایتیله‌دیگن جنگریلریدن کوپراغی اولر تامانیدن زوردن اوروش‌گه کیلتیریلگن یاش‌لر دیر.
جوزجان یشاوچی‌لریدن بیری نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، طالبان گروهی کیچیک اوغلی‌گه زوردن قورال بیریب اوروش‌گه آلیب کیتگن.
سلام‌وطندار اوزبیک بولیمی‌نی فیسبوک‌ده تعقیب قیلینگ
اوشبو جوزجان‌لیک کیشی نینگ کوپه‌یتیریشیچه، طالبان اهالی‌گه ظلم قیله‌دی و مکتب‌لرده تعلیم بیلن شغللنگن باله‌لرنی زوردن اوروش جبهه‌سیگه آلیب باره‌دی.
شونینگدیک، جوزجان محلی قومندانلریدن بیری نینگ ایتیشیچه، طالبان گروهی مرغاب، حسن تابین، شکرک، افغان‌تپه، قره‌کنت و تونیکه قیشلاقلریدن ۱۶ یاشر و ۱۸ یاشر باله‌لرنی زوردن اوروش بیرینچی خطی‌گه آلیب بارگن.
اوشبو قومندان نینگ ایتیشیچه، امنیتی کوچلر و طالبان آره‌سیده بولگن آتیشمه‌لرده کوپراق طالبان تامانیدن زوردن کیلتیریلگن کیشیلر هلاک ایتیله‌دی.
تخار پولیس قومندانلیگی سوزلاوچیسی خلیل اسیر طالبان گروهی نینگ نظارتیده بولگن منطقه‌لرده زوردن عسکر آلیشی‌نی تصدیق‌له‌یدی. اونینگ ایتیشیچه، طالبان گروهی نظارتیده بولگن منطقه‌لرده یاش‌لردن جهادگه قوشیلیش‌لرینی سوره‌گن و قوشیلمه‌گن کیشیلر اوققه توتیلیشی‌نی بیلدیرگن.
عین‌حالده، بغلان پولیس قومندانی صفی‌الله محزون نینگ ایتیشیچه، طالبان گروهی عسکر آلیش چیککه‌سیده، اهالی نینگ اوی‌لرینی چور قیله‌دیلر.
جناب محزون گه کوره، طالبان گروهی نظارتیده بولگن منطقه‌لرده اهالی نینگ مدنی و شهروندلیک حقوق‌لرینی تامین قیله آلمه‌یدی.
سمنگان ولایتی کینگش عضوی محمدهاشم سروری نینگ ایتیشیچه، اوشبو ولایتده طالبان گروهی اهالی نینگ کونده ۵ دن باشلب ۱۰ طالب گه آذیق بیریش‌گه مجبور قیلگن.
شونینگدیک، بدخشان یشاوچی‌لریدن بیری نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، طالبان گروهی نیچه مرحله‌ده عسکر آله‌دی. بیرینچی مرحله‌ده اهالی نینگ اوز ایستک‌لری اساسیگه قوشیلیش‌لرینی اعلان قیله‌دی، ایکینچی مرحله‌ده قوم بویوکلری بیلن صحبت اوتکزه‌دی و اوچینچی مرحله‌ده زوردن یاش‌لرگه قورال بیریب اوروش‌گه آلیب باره‌دی.
سلام‌وطندار اوزبیک بولیمی‌نی فیسبوک‌ده تعقیب قیلینگ
اونینگ ایتیشیچه، طالبان نینگ زوردن عسکر آلیشی باعث، کوپ‌قطار یاش‌لر بدخشان‌نی ترک قیلیب کابل و ایران‌گه کیتگن.
بیراق، طالبان سوزلاوچیسی ذبیح‌الله مجاهد نینگ ایتیشیچه، اولرنینگ قانون‌لریگه کوره، کیچیک باله‌لرنینگ اوروش‌گه آلیب باریش ممنوع دیر. جناب مجاهد نینگ ادعا قیلیشیچه، طالبان گروهی مملکت هیچ‌بیر منطقه‌سیده زوردن عسکر آلمه‌گن.
