ایکی هفته‌دن بویان کندهار ولایتی نینگ ارغنداب، پنجوایی، میوند و ژری تومنلریده امنیتی‌کوچلر بیلن طالبان گروهی آره‌سیده آتیشمه‌لرده دوام ایتیب کیلماقده.
کندهار ولایتی میرویس حوزه‌وی کسل‌خانه‌سی نینگ جراح‌لیک بولیمی مسوولی قدرت‌الله حکیمی گه کوره، آتیشمه‌لر باشلنگنیدن بیری باله و عیاللر شامل ۱۱۵ یره‌لنگن تینچ‌اهالی کسل‌خانه‌گه انتقال بیریلگن. او نینگ کوپه‌یتیریشیچه، یره‌لنگنلردن قطاری ساغلیک وضعیتی‌لری یمان بولگنی باعث جان بیرگنلر.
جناب حکیمی نینگ ایتیشیچه، حاضر هم یره‌دار کیشیلر کسل‌خانه‌گه انتقال بیریله‌دی. لیکن کندهار ده میرویس حوزه‌وی کسل‌خانه‌سی مسووللری، تینچ‌اهالی نینگ تلفاتی رقمی حقیده معلومات بیرمه‌یدیلر؛ اما کسل‌خانه‌دن بیر منبع آتی فاش ایتیلیشی نی ایستمه‌ی سلام‌وطندارگه ایتیشیچه، آتیشمه‌لر جریانیده ۲۰ تینچ‌اهالی جان بیرگن.
ارغنداب تومنی یشاوچیسی لعل‌محمد نینگ ایتیشیچه، بیر موشک اویگه توشگنی باعث تورموش اورتاغی (خاتینی) و ۳ باله‌سی یره‌لنگن و اوروش وضعیتیده یره‌لنگن‌لرنی کسل‌خانه‌گه انتقال بیرگن.
کندهار یشاوچی‌لری، دولت و طالبان گروهیدن اوروش نی توخته‌تیب، آتیش کیسین قیلیش‌لرینی سوره‌دیلر. مذکور یشاوچی‌لرگه کوره، آتیشمه‌لر تینچ‌اهالیدن کوپینچه قربانلیک آله‌دی.
انه‌شوحالده کندهار محلی مسووللری نینگ ایتیش‌لریچه، اوتگن ایکی هفته جریانیده طالبان نینگ قطار قومندان‌لری شامل ۲۰۰ تروریست هلاک و طالبان نظارتیده بولگن ایریم منطقه‌لر آزاد ایتیلگن.
لیکن طالبان گروهی، کندهار امنیتی مسووللری نینگ سوزلرینی رد ایتیب ایتیش‌لریچه، کندهار ولایتی ارغنداب، ژری، پنجوایی و میوند تومنلری نینگ قطار قشلاقلری و دولتی پوسته‌لر اولرنینگ نظاتیگه اوتیب و امنیتی کوچلرگه کوپینچه تلفات ییتکیزیلگن.
کندهار ولایتی ارغنداب تومنیگه طالبان هجوم اویوشتیرگنیدن کیین، میوند، پنجوایی و ژری تومنلریده امنیتی کوچلر بیلن طالبان آره‌سیده‌گی اوروش شدت تاپگن. اوروش جریانیده ۶۰ مینگ عایله کندهار شهریگه آواره بولگن.
