زابل ولایتی شینکی تومنی یشاوچیلری نینگ ایتیشلریچه، حاضرگچه حیات نینگ دستلبکی آسایشته‌لیک‌لریدن فایدهلنه آلمه‌یدیلر. اولر نینگ ایتیشلریچه، اوتگن نیچه دهه‌ده حکومت‌لر نینگ توجه‌سیزلیگی سبب، حاضرگچه ساغلیق خذمتلردن فایدهلنه آلمه‌یدیلر.
اوشبو تومن یشاوچیسی محمدعثمان نینگ ایتیشچیه: «بو ییرده ساغلیق خذمتلر بار؛ لیکن بیزلردن اوزاق و بیزلر قیین‌چیلیک‌لر بیلن روپه‌ره‌میز؛ بیر قطار نسخه‌لرنی بازاردن ساتیب آله‌میز.»
شونینگدیک مذکور تومن یشاوچیلریدن باشقه بیری شیر احمد نینگ ایتیشچیه، درمانی خذمتلر یوقلیگی سبب، مذکور تومن یشاوچیلری کسل‌لرینی اوشبو ولایت مرکزی قلات شهری گه آلیب کیته‌دیلر. اونینگ کوپه‌یتیریشیچه: «بیر کیشی کسل بولگنی‌ده، کوپینچه قیینچیلیک بیلن روپه‌ره بوله‌میز؛ بو ییرده بولگن درمانی مرکز دریا نینگ او طرفی‌ده دیر؛ کوپینچه پیت کسلی‌میز نی قلات شهری گه آلیب کیته‌میز.»
بیزلرنینگ «ایکس» ترماغی ده هم تعقیب قیلینگ!
زابل ساغلیق‌نی سقلش باشلیغی میرویس افغان نینگ ایتیشیچه، شینکی شامل مذکور ولایت نینگ هر تومنی‌ده، اوچ کلینیک نینگ فعالیتی بار؛ لیکن او شینکی تومنی‌ده اهالی نیازی گه قدر ساغلیق خذمتلر نینگ ارائه بولمسلیگی نی قبول قیله‌دی. «درمانی مرکزی بولمه‌گن تومن یوق؛ هر تومن‌ده نیچه درمانی مرکز بار که درمانی خذمتلرنی ارائه قیله‌دی؛ لیکن برچه تومن‌لرده ارائه بولیشی کیره‌ک بولگن خذمتلر اوچون امکانیت یوق.»
زابل مرکزی قلات شهری نینگ ۶۳ کیلومتریلیگی‌ده جایلشگن شینکی تومنی یشاوچیلری ساغلیق خذمتلردن فایدهلنه آلمسلیک یانیده، قشاق‌لیک و تعلیمی خذمتلردن فایدهلنه آلمسلیک‌دن هم زیریککنلر.
شینکی تومنی یشاوچیلریدن بیری عبدالعزیز نینگ ایتیشیچه، اوشبو تومن یشاوچیلری اینگ آز امکانیت بیلن حیات کیچیره‌دیلر. اونینگ کوپه‌یتیریشیچه: «بو ییرده قشاق عایله‌لر حیات کیچیره‌دیلر که هیچ نرسه‌لری یوق؛ نیچه افغانی بیلن حیاتلری نی اوتکزه‌دیلر.»
شونینگدیک اوشبو تومن یشاوچیلریدن باشقه بیری محمد‌الله نینگ ایتیشیچه: «بو ییرده هیچ نرسه یوق؛ حاضرگچه هیچ بیر لایحه عمل گه آشیریلمه‌گن؛ کوپینچه ییرلرنی هم اهالی قرض پولی بیلن قورگن.»
بیزلرنینگ فیسبوک صحیفه‌میزگه باش اورینگ!
شونده‌ی بیرحالده، زابل اقتصاد بوییچه باشلیغی عزت‌الله نینگ ایتیشیچه، یاردم بیرووچی بیر قطار موسسه‌لر نینگ هماهنگ‌لیگی‌ده شینکی تومنی گه علاوه اوشبو ولایت نینگ باشقه بیر قطار تومن‌لریده هم، اهالی گه ایش زمینه‌سی یره‌تیلیشی و اولر نینگ اقتصادی قیین‌‌چیلیگی کمه‌یشی اوچون لایحه‌لر نینگ عمل گه آشیریلیش زمینه‌سی یره‌تیلیشی خصوصیده سعی‌وحرکت بوله‌دی.
اونینگ کوپه‌یتیریشیچه: «شینکی تومنی‌ده و باشقه بیر قطار تومن‌لرده قیینچیلیک بار و اقتصادی وضعیتلری خراب دیر، بونی قبول قیله‌میز؛ بو موضوع گه فکریمیز بار و اونینگ حل بولیشی اوچون سعی‌وحرکت قیله‌میز.»
عین حالده، افغانستان نینگ اوزاق بولیم‌لریدن کوپینچه‌سی نینگ یشاوچیلری ساغلیق و تعلیمی خذمتلردن فایدهلنه آلمسلیک‌دن شکایت قیلیب و قشاق‌لیک‌دن زیریککنلر.
