سلام افغانستان میدیا مؤسسهسی (سلاموطندار رادیوسی)، اوتگن کون اسلام امیرلیگی رسمیلرینینگ حضوریده، «۲۰۲۲-۲۰۲۵ ییللریده افغانستان بیلیم یورت بیتیرووچیلرینینگ ایش بیلن شغللنیش و ایشسیزلیک وضعیتی» بوییچه سوراو نتیجهسینی معلوم قیلدی.
اوشبو سوراوده ۲۰۲۲-۲۰۲۵ ییللری ایچیده ۲۵ ولایتده دولتی و خصوصی بیلیم یورتنی بیتیرگن بیر مینگ ۵۰۹ طلبه بیلن صحبت اوتکزیلگن. قولگه کیلگن معلومات اساسیده، جواب بیرگنلردن ۶۵.۹ فایزی ایشسیز و ۳۴.۱ فایزی ایسه ایش گه ایگه دیر.
اوشبو سوراونی تقدیم قیلگن محمدامین حبیبیتبارنینگ ایتیشیچه، جواب بیرگنلر ایش امکانیتلری یوقلیگی، ایش تجربهسی کملیگی، آیلیک آزلیگی و مهاجرتنینگ ایشسیزلیک بوییچه اینگ مهم عامللر دیب عنوان قیلگنلر. «۳۴ فایز ایشگه ایگه بولگنلرینی ایتگنلر. ۶۵.۹۰ فایز ایسه بیلیم یورتنی بیتیرگنلریدن کیین ایشسیز بولگنلرینی بیان قیلگنلر که بو تدقیقاتنینگ اصلی سوراقلریدن بیرینی شکللنتیرهدی. اولردن ایشسیزلیک اصلی سببینی سورهدیم. ۵۸ فایز، ایش امکانیتلری یوقلیگینی ایتدی.»
مذکور سوراو نتیجهلریگه کوره، جواب بیرگنلردن ۲۰.۲ فایزی آلتیدن بیر ییل، ۵۶ فایزی ایکیدن اوچ ییل و ۲۳.۸ فایز ایسه اوچ ییلدن کوپراق مدتده ایشسیزلیک وضعیتیده قرار تاپگن. اوشبو موسسهنینگ مصلحت کینگشی اعضاسی بولمیش عبدالهادی راشد، مذکور سوراو اوتکزیلگنیدن مقصد، سونگی تورت ییلده بیلیم یورت بیتیرووچیلرنینگ ایش بیلن شغللنیش وضعیتینی تیکشیریش عنوان قیلگن. او مملکت ترقیاتیده تخصص و تعهد اورنیگه تاکیدلب و ایتیشیچه، بیلیم یورت بیتیرووچیلریگه ایش امکانیتلری یرهتیلیشی، ایشنی متخصص کیشیلرگه تاپشیریش و کسبی تعلیمنی کوچهیتیریشنی طلب قیلهدی.
بو سرواودن قولگه کیلگن معلومات اساسیده، جواب بیرگنلردن ۷۷.۷ فایزی ایشسیزلیک اولرنینگ روح و روان ساغلیگیگه جوده کوپ سلبی تاثیر قویگنی، ۱۸.۴ فایزی کوپ سلبی تاثیر قویگنی و یالغیز ۰.۹ فایز ایسه اولرنینگ روحی وضعیتیگه هیچ تاثیر قویمهگنینی ایتگنلر.
اسلام امیرلیگی اقتصاد وزیرلیگی مسلکی معینی عبداللطیف نظرینینگ ایتیشیچه، میلیونلب قاچقیننینگ مملکت گه قیتیشی و بازار نیازلری بیلن تحصیل قیلینگن بولیملر ماس کیلمسلیگی، افغانستان ده ایشسیزلیکنینگ اینگ مهم عامللریدن دیر. اونینگ کوپهیتیریشیچه، تدبیکارلیک کوچهیشی، سرمایه یاتقیزیش امکانیتلری یرهتیلیشی، ریسکنی قبول قیلیش فرهنگی رواجلنیشی و دولت آرقهلی آستقورمهلر کینگهیشی، ایشسیزلیک کمهیشی و ایش امکانیتلر یرهتیلیشیگه یاردم بیره آلهدی. نظریگه کوره: «ایشسیزلیک اینیقسه بوگون بحث گه آلینگن ملکهلی کدرلر ایشسیزلیگی مسئلهسی بیلن باغلیق تورلی عامللر و سببلر موجود. بیرتهسی قاچقینلرنینگ مملکتگه قیتیشی دیر که سونگی ییلرده قوشنی مملکتلردن قیتهدیلر. ایشسیزلیک اینیقسه کدرلر ایشسیزلیگیگه رول اوینهگن باشقه بیر مسئله، تحصیل بولگن بولیملرده نیازنی بیلمسلیک دیر.»
بو سوراو نتیجهلریگه کوره، جواب بیرگنلردن یالغیز ۳۴.۵ فایزی تحصیل قیلگنلری بولیم بیلن تیگیشلی ایشلرده فعالیت قیلماقده. عکسینچه حالده، ۴۴.۳ فایزنینگ ایتیشیچه، ایشلری تحصیل قیلگنلر بولیم بیلن بیراز تیگیشلی بولیب و ۲۱.۲ فایز ایسه تحصیل قیلگنلری بولیم بیلن بوتونلی ماس بولمهگن ایشلر بیلن شغللنگن.
بیلیم یورت استادی رحیمه نعیمی، شونینگدیک اوشبو برنامهده اقتصاد ترقیاتیده عیاللر اورنیگه تاکیدلب و ایتیشیچه، اقتصادی فعالیتلرده عیاللر حضوری کوپهیشی اوچون برابر ایش و تعلیم امکانیتلری یرهتیلیشی کیرهک. «ترقیات، ایش کوچی و انسانی کوچ ییترلی بولگنیده یوز بیرهدی. اینیقسه انسان کوچی حقیده سوزلشیلگنیدن بو جریانده ایرککلر و عیاللر اوزیگه خاص مهم رول و اورینگه ایگه دیر. بیر مملکت عیاللر هم ایرککلر کبی هر ایشگه حصه قوشه آلگنلری پیتده، رواجلنه آلهدی.»
افغانستان، سونگی ییلرده اینیقسه یاشلر و بیلیم یورت بیتیرووچیلری آرهسیده ایشسیز کوپهیشی بیلن روپهره بولگن. ایش امکانیتلری کمهیشی، قاچقینلرنینگ کینگ کولملی شکلده مملکت گه قیتیشی و تحصیل بولگن بولیم بیلن ایش بازاری نیازلری آرهسیده هماهنگسیزلیک، بو بولیم اصلی قیینچیلیکلریدن حسابلنهدی.
