سلام‌وطندار نینگ مملکت ۲۲ ولایتیده ۷۴ عیال بیلن اوتکزگن صحبتی اساسیده، اوشبو عیاللر نینگ ۵۵ فایزی اوروش و ناتینچلیک و باشقه ۴۵ فایزی، طبیعی واقعه‌لر و کسل‌لیکلر طفیلی ایرلرینی قولدن بیرگنلر.
اوروش و ناتینچلیک باعث ایرلرینی قولدن بیرگن ۱۷ فایز عیاللر گه، طبیعی و کسل‌لیک طفیلی ایرلرینی قولدن بیرگن ۲۰ فایز عیاللر گه یاردم کورسه‌تیلگن.
اوشبو عیاللر نینگ ۸۰ فایزی گه حاضرگچه هیچ یاردم کورسه‌تیلمه‌گن و باشقه ۲۰ فایزی گه یاردم بیرووچی نهادلر تامانیدن نسبی یاردم بیریلگن.
برچه‌سی بیلن، افغانستان ده سرپرست حکومت حاکمیتیدن ایکی ییل اوتماقده، سلام‌وطندار بیلن صحبت اوتکزگن مذکور عیاللردن هیچ بیری گه حاضرگی حکومت تامانیدن هیچ یاردم کورسه‌تیلمه‌گن.
سلام‌وطندار نینگ تیکشیرووی اساسیده، صحبت اوتکزگن‌لردن ۵۰ فایز دن آرتیغی نینگ سرپرستی یوق و عایله اعضالری نینگ خرجتینی تأمینلش اوچون شاقه ایشلر و تیلنچیلیک قیلیش گه مجبور بولگنلر.
اوشبو تیکشیرو کابل، بدخشان، بادغیس، غور، نیمروز، بلخ، کنر، نورستان، بغلان، پروان، غزنی، کاپیسا، لغمان، ننگرهار، سرپل، تخار، فراه، قندوز، جوزجان، بامیان، دایکندی و پنجشیر ولایت‌لریده اوتکزیلگن.
ایتیش کیره‌ک که، مصاحبه بولگنلر تصادفی اساسیده تنلنگن و برچه‌سی ۲۵ و ۵۰ یاشر دیر.
کاپیسا ولایتی یشاوچیسی بولمیش ۲۵ یاشر بزیری، ایکی باله نینگ آنه‌سی دیر. اونینگ ایتیشیچه، تورموش اورتاغی ماین پارتلشی عاقبتیده وفات ایتگن.
مذکور یاش عیال، یامان اقتصادی وضعیتی‌دن صحبت قیلیب و حاضرگچه یاردم قولگه کیلتیرمه‌گنینی بیان قیله‌دی. بزیری نینگ کوپه‌یتیریشیچه، آچلیک‌دن باله‌لری نینگ قوتقریش اوچون یشاوچیلر اوی گه باریب ایشله‌یدی: «یامان اقتصادی وضعیت‌ده حیات کیچیره‌میز، هیچ قنده‌ی یاردم بیریلمه‌گن. هیچ بیر نهاد و حکومت آرقه‌لی یاردم آلگنی‌میز یوق. قشاق‌میز، بیچاره‌میز، هیچ کیم بیزلر گه یاردم بیرمه‌گن.»
باشقه بیر تاماندن، نیمروز ولایتی یشاوچیسی بولمیش ۳۵ یاشر حبیبه نینگ ایتیشیچه، تورت باله نینگ آنه‌سی دیر. تورموش اورتاغی حربی ایکن، تورت ییل آلدین، دلارام تومنیده سابق حکومت مخالف کوچلری بیلن اوروش جریانیده اولگن دیر.
اونینگ کوپه‌یتیریشیچه، تورموش اورتاغی نینگ اولگنی باش ییلی‌ده، سابق حکومت تامانیدن معاش توله‌نیلر ایکن؛ بیراق اوچ ییل‌دن بیری هیچ قنده‌ی یاردم بیریلمه‌گن.
بیزلرنینگ فیسبوک صحیفه‌میزگه باش اورینگ!
حبیبه گه کوره، جمهوریت توزومی قوللشی ییلی‌ده، بیر ییل‌گچه تورموش اورتاغی نینگ معاشی توخته‌گن ایکن و جمهوریت توزومی قوللشی‌دن کیین، مملکت‌ده‌گی حاضرگی حکومت تامانیدن هیچ قنده‌ی معاش و یاردم تولنمه‌گن.
اونینگ سلام‌وطندار گه ایتیشیچه: «عسکر ایدی، اونچه درآمدی هم یوق ایدی، بیراق اوشبو معاشی بیلن اوی خرچی نی چیقر‌ر ایدی. اوندن هیچ نرسه قالمه‌گن که، قوللنسک و حیاتی‌میز نی کیچیرسک. والله هیچ نرسه گه قول تاپه آلمه‌گن‌میز، هیچ قنده‌ی یاردم صورت تاپمه‌گن و هیچ کیم بیز گه یاردم بیرمه‌گن.»
شونینگدیک پروان ولایتیده ۵-۱۰ یاش آره‌لریده بولگن اوچ باله آنه‌سی ۳۵ یاشر بی‌بی حوا نینگ تورموش اورتاغی، جمهوریت توزومی‌ده حربی ایکن و اوچ ییل آلدین اوروش نتیجه‌سیده هلاک بولگن.
بی‌بی حوا نینگ ایتیشیچه، تورموش اورتاغی نینگ اولگنی‌دن کیین، بیرینچی ییل‌ده قرینداش‌لری آرقه‌لی یاردم قولگه کیلتیرگن، بیراق جمهوریت توزومی نینگ قوللشی‌دن کیین، ایکی ییل‌دن بیری باله‌لری بیلن سرک‌لرده تیلنچیلیک قیلماقده.
شونده‌ی بیرحالده، بی‌بی حوا هیچ قنده‌ی یاردم قولگه کیلتیرمه‌گنینی بیان قیلیب ایتیشیچه: «تیلنچیلیک اوچون هیچ ثبت نام بولگنی‌میز یوق، اهالی کوپینچه قیین‌چیلیک بیلن روپه‌ره دیر. عایله سرپرستی‌میز یوق، باله‌لریم نی سرک‌لرده ایش قیلیش یا-ده تیلنچیلیک اوچون یوباریش گه مجبور‌من، چونکه حکومت و هیچ بیر نهاد آرقه‌لی یاردم قولگه کیلتیرگنی‌میز یوق.»
شونینگدیک، غور ولایتی یشاوچیسی بولمیش ۳۰ یاشر فضیله نینگ ایتیشیچه، کیچیک اوچ باله آنه‌سی دیر، تورموش اورتاغی کسل‌لیک طفیلی وفات قیلگن و حاضر ایسه تیلنچی‌لیککه مجبور دیر.
مذکور آنه نینگ کوپه‌یتیریشیچه،سرپرستی یوقلیگی بیرحالده، عیاللر برابریده ایش زمینه‌لری کمه‌یگن و هیچ بیر دولتی و خصوصی نهاد تامانیدن یاردم قولگه کیلتیرمه‌گن.
فضیله، تیلنچیلیک بیلن عایله خره‌جتی نی تامین‌لش نی بیان قیلیب ایتیشیچه: «شام‌گچه تیلنچیلیک قیله‌من، ایرتنگ و آخشم نانی‌میز یوق. هیچ قنده‌ی یاردم بیریلمه‌گن. مذکور تومن‌ده اسلام امیرلیگی کوچلری باشقه بو ییر گه کیلمه، یاش عیاللر نی تومن ایشیگی‌ده نیمه ایشی بار دیدیلر.»
عین‌حالده، مصاحبه بولگن ۷۴ عیال‌دن، یالغیز ۲۰ فایزی نادولتی نهادلر آرقه‌لی نسبی یاردم قولگه کیلتیرگن‌لر؛ بیراق اوشبو یاردم‌لر وقتینچه‌لیک بولیب و مذکور عیاللر اوچون ییترلی بولمه‌گن دیر.
۳۲ یاشر سمیه، بدخشان ولایتی فیض‌آباد تومنی یشاوچیسی دیر، او اوچ باله نینگ آنه‌سی و ۶ آی آلدیم بدخشان ده یوز بیرگن ترافیکی حادثه نتیجه‌سیده تورموش اورتاغی نی قولدن بیرگن. سمیه نینگ ایتیشیچه، نیچه مدت آلدین خلق‌ارا آزیق-آوقات دستوری یا-ده WFP آرقه‌لی یاردم قولگه کیلتیرگن؛ بیراق حکومت آرقه‌لی هیچ قنده‌ی یاردم قولگه کیلتیرمه‌گن دیر.
اونینگ کوپه‌یتیریشیچه: «حاضر ایسه اوچ بالم بیلن قالگن‌من. تورموش اورتاغیم نینگ اولمه‌گنی‌دن آلدین حیاتی‌میز یخشی ایدی، چونکه برچه صرف-خره‌جت نی تامین قیلر ایدی. حاضر ایسه یامان اقتصادی وضعیت‌ده قرار تاپگن‌میز، خلق‌ارا دستوری کبی خارجی دفترلر یاردمی بولمه‌گن صورت‌ده، اوزیم بیلن باله‌لریم نینگ آچ قالیشی ممکن. اوشبو یاردم‌لر نینگ آز بولگنی بیلن بیراق چاره بوله‌دی.»
عین حالده، بادغیس ولایتی یشاوچیسی بولمیش ۳۷ یاشر گل بی‌بی نینگ ایتیشیچه، تورموش اورتاغی سابق حکومت‌ده ایشلاوچی ایکن و ۸ ییل آلدین ماین پارتلشی عاقبتیده هلاک بولگن. اوشبو عیال نینگ کوپه‌یتیریشیچه، حاضرگی حکومت تامانیدن هیچ یاردم کورسه‌تیلمه‌گن.
گل بی‌بی گه کوره، خارجی نهاد‌لردن قطاری وقتینچه‌لیک شکلده یاردم بیرگنلر، باله‌لری نینگ صرف-خره‌جتی اوچون ییترلی بولمه‌گن. «بیر مرته ۳۶ مینگ بیرگنلر باشقه یاردم بیریلمه‌گن. اوچ مرته بیر بوجی، ایکی بوجی و بیر بوجی اون آلگن‌من و بیر مرته ایسه، بیش کیلو یاغ بیردیلر، کیین ایسه کارت‌لر قید بولدی و باشقه یاردم بیرمه‌دی و حاضر ایسه یاردم‌لر کیسیلگن و کوپینچه قیین‌چیلیک بیلن روپه‌ره‌میز. قرض‌دارمیز. الله یاردم بیرسین که معاش آلیب قیین‌چیلیک‌لریمیز نی حل قیله‌یلیک.»
شونده‌ی بیرحالده، عیال حقوقی فعاللریدن قطاری نینگ ایتیشلریچه، بیوه عیاللر شامل عیاللردن قطاری، توزوم اوزگریشی و ایشلرینی قولدن بیریش بیلن، تیلنچی‌لیککه یوز کیلتیریش گه مجبور بولیب و یامان اقتصادی وضعیت‌ده قرار تاپگنلر. اولر نینگ کوپه‌یتیریشلریچه، یاردم بیریش خصوصیده چیکلاو‌لر و اوشبو نهادلرده عیاللر ایش قیله آلمسلیگی، بیوه عیاللر قیین‌چیلیکلری نینگ کوپه‌یشی گه سبب بولگن.
عیال حقوقی فعاللریدن خاطره راسخ، عیاللر برابریده حکومت نینگ برنامه‌سیزلیگی نی بیان قیلیب ایتیشیچه: «حکومت هیچ بیر عیال نینگ قیین‌چیلیگینی حل قیلمه‌گن و عیاللر و ییتیم باله‌لر اوچون هیچ بیر برنامه‌سی یوق. سرک‌لرده ییتیم باله‌لر و سرپرست‌سیز عیاللر تیلنچیلیک قیلیشی نی کوره‌سیزلر، بیراق حکومت اولر اوچون هیچ برنامه‌سی یوق دیر.»
عیال حقوقی فعاللریدن ویسنا سیدی نینگ ایتیشیچه: «بیوه عیاللر گه دولتی و نادولتی نهادلرده ایش زمینه‌سی یره‌تیلگن ایدی و مذکور عیاللر ایش بیلن عایله خرجتینی تامین قیلر ایدیلر. اسلام امیرلیگی نینگ قدرت گه ایریشگنی‌دن بویان، بیوه عیاللر اوچون کوپ قیین بیر وضعیت دیر.»
عین‌حالده، افغانستان نینگ بیکار قیلینگن انسان حقلری کمیسیونی رئیسی شهرزاد اکبر نینگ بو توغریده ایتیشیچه: «قیغو بیلن افغان‌لر نینگ خلق‌ارا و انسان‌پرورلیک یاردم‌لر گه احتیاجی بولگنی بیر وضعیت‌ده، حاکم رسمی‌لر خیریه نهادلرده عیاللر ایشی برابریده چیکلاو‌لر نی وضع قیلدیلر، او بیلن انسان پرورلیک یاردم‌لر کمه‌یگن.»
مملکت بویلب سرپرست‌سیز و بیوه عیاللر رقمی حقیده حاضرگچه بیللی معلومات بیریلمه‌گن.
بیزلرنینگ توییترده هم تعقیب قیلینگ!
سره‌میاشت، بیوه عیاللر رقمی نی ۲۴ مینگ و شهید‌لر و ناگران‌لر وزیرلیگی بیوه عیاللر رقمی نی ۸۰ مینگ دیگنلر.
سره‌میاشت نینگ نشرات و معلومات رئیسی سوزلاوچیسی عرفان‌الله شرفزوی گه کوره، بیر آی جریانیده، ۲۴۰۰۰ بیوه عیال گه نقدی یاردم بیرگنلر، و هر بیر بیوه عیال گه ۸۵۰۰ یاردم کورسه‌تیلگن.
باشقه بیر تاماندن، ایش و اجتماعی ایشلر وزیرلیگی سوزلاوچیسی سمیع‌الله ابراهیمی نینگ سلام‌وطندار گه ایتیشیچه، اولر مملکت‌ده‌گی بیوه عیاللر اوچون، مسلکی برنامه‌لر نی یولگه قوییشلری ممکن، کیله‌جک‌ده بو یول آرقه‌لی بیوه عیاللر ایشله‌سینلر.
اونینگ کوپه‌یتیریشیچه، حاضرگچه ۵۰۰ عیال ایش و اجتماعی ایشلر وزیرلیگی نینگ مسلک برنامه‌سیده تعلیم کورماقده‌لر. «سرپرست‌سیز و بیوه عیاللر گه، ایش و اجتماعی ایشلر وزیرلیگی تامانیدن مسلکی برنامه‌لر یولگه قوییله‌دی، اوشبو برنامه‌دن فارغ بوله‌دیگن عیاللر گه ایش زمینه‌سی یره تیله‌دی.»
عین‌حالده، سرپرست حکومت نینگ شهید‌لر و ناگران‌لر وزیرلیگی سوزلاوچیسی مفتی‌فیصل خاموش نینگ سلام‌وطندار گه ایتیشیچه، اوشبو نهاد ده ثبت بولگن بیوه عیاللر سانی، ۸۰۰۰۰ گه ییتیشه‌دی، آیی‌ده اولر بیلن باله‌لری گه نقدی یاردم بیریله‌دی.
اونینگ کوپه‌یتیریشیچه، سرپرست‌سیز بیوه عیاللر گه ۵۰۰۰ افغانی، سرپرستی بولگن بیوه عیاللر گه ۲۰۰۰ افغانی و ییتیم باله‌لر اوچون آیی‌ده ۲۰۰۰ افغانی نقدی پول یاردم بیره‌دیلر. «ثبت بولگن بیوه عیاللر سانی ۸۰ مینگ دیر، بلکیم بو رقم نینگ کوپه‌یشی ممکن، چونکه بیوه‌لردن قطاری ثبت قیلمه‌گنلر. بو رقم‌لرده اوتگن ییل حربی‌لری، تینچ اهالی و اسلام امیرلیگی بیوه‌لری موجود دیر. هیچ قنده‌ی فرق یوق، برچه ثبت بولگن. جاری ییل‌ده نیچه کون آلدین معاش‌لر نینگ تولنیشی باشلنگن و انشاءالله تیزلیک بیلن معاش‌لری پروسه‌سی یکونلنیب و آیی‌ده سرپرست‌سیز بیوه عیال گه ۵۰۰۰ بیره‌میز.»
ایتیش کیره‌ک که، نظام اوزگریشیدن کیین، بیوه عیاللر گه بیریله‌دیگن یاردم‌لر کمه‌یب، ایچکی و خارجی نهادلر نینگ عیال ایشلاوچیلری ایش دن محروم بولگن بیرحالده، بو مسئله برچه عیاللر اینیقسه بیوه عیاللر نینگ اقتصادی اوستیگه سلبی تأثیر قیلگن.
