تخار ولایتی اینیقسه رستاق تومنی یشاوچیلری، ایچیملیک سوولری یوق‌لیگیدن نالیب ایتیشلریچه، چاروه‌لرینی ساتیب و بیر قطاری یشش اوی‌لرینی ترک قیلیش گه مجبور بولگن.
تخار ولایتی رستاق تومنی «سنگ‌علی سقابه» قیشلاغی یشاوچیلری، اوشبو تومن نینگ سوو تنقیص‌لیگی بیلن روپه‌ره بولگن باشقه اونلب قیشلاق مثالی دیر. مذکور تومن اهالیسی بیر بوشکه سوو اوچون ایکی کون کوته‌دیلر، حتا عیاللر و باله‌لر سوو آلیش اوچون بو ییرده کیچه‌لر قالیش گه مجبور.
رستاق تومنی سنگ‌علی سقابه قیشلاغی یشاوچیسی لیلما نینگ سلام‌وطندار گه ایتیشیچه: «نوبت اوچون تانگ چاغی باریب توش گچه اولتیره‌میز، اوی گه قیتیب کیلگن حالده چقه‌لاق‌لریمیز بیشیک دن توشیب کیتگن یا که ییغلب کوییب قالگن، ینه توش دن کیین کیلیب کیچ قورونگچه اولتیره‌میز، کیچه‌لر اویخیدن قاله‌میز، سوویمیز یوق زوروان ایرکک‌لر کیلسه بیز گه تیزلیک بیلن نوبت بیرمه‌یدیلر.»
بیزلرنینگ فیسبوک صحیفه‌میزگه باش اورینگ!
تخار رستاق تومنی سنگ‌علی سقابه قیشلاغی یشاوچیلریدن باشقه بیری جارالله گه کوره: «ایکینچی صنف مکتب اوقووچیسی ایدیم سوو آزلیگی و اوی قیینچیلیگی باعث مکتب نی قویباردیم، ایناغم بیلن سوو اوچون کیلگن من، ایکی کیچه دن بیری بوشکه‌لریم بیلن بولاق یانیده کوتیب تورگن‌میز.»
مذکور قیشلاق یشاوچیلری آره‌سیده انده_سنده سوو اوستیده جنجل یوز بیره‌دی و بو جنجل حتا دولت اداره‌لری گه قدر چوزیلیب و حل ایتیله‌دی.
اوشبو قیشلاق یشاوچیلری سوو آزلیگی باعث چاروه‌لرینی ساتیب و چاروه‌چلیک قیلمه‌یدیلر. اولردن بیرقطاری اوی_جای‌لرینی ترک ایتیش گه مجبور بولگن.
سان‌لری ۵۰۰۰ دن آرتیق بولگن «سنگ‌علی سقابه» قیشلاغی یشاوچیلری نینگ ایتیشلریچه، مذکور قیشلاق نینگ قریب ۳۰ فایز یاش‌لری ایچیملیک سوو تنقیص‌لیگی باعث، سرطان کبی کسل‌لیک‌لر گه چلینیب و وفات ایتگنلر.
اولر، حکومت بوتوغریده دقت قیلمه‌گن حالده، ایریم قیینچیلیک‌لر بیلن روپه‌ره بولیش‌لریدن آگاه‌لنتیره‌دیلر.
محلی شورا باشلیغی محمدهاشم نینگ ایتیشیچه: «بو ییرده‌گی قودوق‌لر سووینی استعمال قیلیب بولمه‌یدی، یشاوچیلر ۲۰ یا که ۲۵ کیلومتر یول یوریب سوو کیلتیریشه‌دی او هم صحی ایمس، اهالی حیوان‌لردن قالگن سوونی استعمال قیله‌دی. خوفلی کسل‌لیک‌لرگه چلینگنلر قریب ۲۰ یا که ۳۰ فایز یاش‌لرنی سرطان یا باشقه کسل‌لیک‌لر طفیلی قولدن بیردیک.»
محل یشاوچیسی و جامع مسجد امامی عبدالغنی گه کوره: «بیر قطار کیشی‌لر ییر و امکانیت‌لرینی ساتیب بو ییرنی ترک قیلیب ایران و مملکت نینگ باشقه ولایت‌لری گه بارگنلر.»
بیزلرنینگ «ایکس» ترماغی ده هم تعقیب قیلینگ!
رستاق تومنی محلی مسئوللری نینگ ایتیشلریچه، بیر قطار قیشلاق‌لر نینگ یشاوچیلری ایچیملیک سوو بیلن تأمینلنگنلر و مذکور تومن نینگ کوپ سانده قیشلاق یشاوچیلری، حاضرگچه ایچیملیک سوو آزلیگی بیلن روپه‌ره بولیب و اولر اوشبو قیینچیلیک حلی اوچون تلاش قیلماقده‌لر.
رستاق تومنی اولسوالی اورین باسری و سرپرستی عبدالودود قادری نینگ ایتیشیچه: «قیشلاق‌لرده ایشک (مرکب) بیلن سوو آلیب کیلیشه‌دی و یوللر بوزوق حتا مرکب یوره آلمه‌یدی، اوشبو قیشلاق‌لر اهالیسی سوو نقطه‌ی نظر دن کوپ قیینچیلیک بیلن روپه‌ره‌لر.»
شو بیلن بیرگه، تخار ساغلیق‌نی سقلش ریاستی مسئوللری، مذکور ولایت نینگ اوزاق منطقه‌لریده‌گی قیینچیلیک‌لرنی قبول قیلسه ده، بیراق صحی بولمه‌گن سوولر استعمالی باعث قطار کیشی‌لر نینگ اولیمی حقیده هیچ نرسه دیمه‌یدیلر.
تخار ساغلیق‌نی سقلش ریاستی نینگ اطراف_محیط نی قوریقلش مدیری سلطان‌محمد احمدی نینگ ایتیشیچه: «بو مسئله گه دایر منطقه یشاوچیلری یا که شورا باشلیغی تامانیدن ولایت مقامی گه عریضه یوباریلسه، ولایت مقامی عریضه نی باغلیق اداره یعنی ساغلیق‌نی سقلش ریاستی نینگ اطراف_محیط نی قوریقلش اداره‌سی گه یوللـه‌یدی، تیم بار یشاوچیلر قیینچیلیگی حلی اوچون محل گه یوباره‌میز.»
رستاق تومنی، تخار نینگ ۱۶ تومنی ارا نفوسلی و مساحتی کتته و مذکور ولایت نینگ بیرینچی درجه تومنی سنلسه ده، بیراق اوشبو تومن یشاوچیلری حاضرگچه سوو تنقیص‌لیگی شامل باشقه اونلب قیینچیلیک بیلن روپه‌ره دیر.
