افغانستان‌ده تاپی لایحهسینینگ لوله تارتیش ایشی ینگی باسقیچ گه کیرگن و اسلام امیرلیگی هرات ولایتیده اوشبو لایحه‌نینگ ایریم ایش‌لری توگه‌گنیدن خبر بیره‌دی.
اسلام امیرلیگی کانلر و پترولیم وزیرلیگی سوزلاوچیسی همایون افغان‌نینگ ایتیشیچه، هرات ولایتیده تاپی لایحهسینینگ لوله تارتیش یونه‌لیشیگه عاید ایش‌لر دوام ایتماقده و حاضرگچه ۱۵۰ کیلومتردن کوپراق یونه‌لیش لوله تارتیش اوچون تیارلنگن و ۱۳۴ کیلومترنینگ نظارت ایشی عملگه آشیریلگن.
شو بیلن بیرگه، افغانستان ایچیده ۱۲۲ کیلومتر یونه‌لیشده لوله تارتیلگنینی قوشیمچه قیله‌دی، کانلر و پترولیم وزیرلیگی سوزلاوچیسی همایون افغان.
اونینگ ایتیشیچه، هرات شهریده گاز ترماغینی کینگه‌یتیریش لایحه‌سی هم یکونلنگن. اوشبو ترماق شهر تورلی حدودلریگه جمله‌دن صناعت، سودا و تورر جای‌لر گه ییتکزیلیب بیریله‌دی. او شونده‌ی دییدی: «هرات‌ده تاپی لایحهسینینگ ۱۲۲ کیلومتر یولَگی‌ده لوله تارتیلگن و هرات شهریده گاز ییتکزیب بیریلیش ریجه‌سی هم توگه‌گن.»
کانلر و پترولیم وزیرلیگی سوزلاوچیسی‌نینگ کوپه‌یتیریشیچه، حاضر اولکه ایریم یشاوچیلری بولایحه‌نینگ امنیتی، اداری و تخنیک بولیملریده ایش بیلن تأمینلنگن.
شو بیلن بیرگه، پاکستان‌ده تورکمنستان ایلچیسی اتاجان مولاموف، اسلام‌آبادده اوتکزیلگن ییغیلیش‌ده، سرحدآباد-هرات بولیمیده لوله تارتیش ایش‌لری جاری ییل آخریگچه یکونلنیشیگه امیدوار ایکنلرینی بیلدیرگن.
اونگه کوره، مذکور لایحه‌نینگ کتته قسمی یکونلنیشی بیلن، تورکمنستان‌نینگ طبیعی گازینی میلادی ۲۰۲۷-ییلده افغانستان و اوندن کیین ایسه پاکستان گه انتقال بیریش جریانی باشلنیشی ممکن.
ایریم اقتصادشناس‌لر، تاپی لایحه‌سی انرژی تشیش لایحه‌سیدن کوره کینگ‌راق اهمیت گه ایگه ایکنینی ایته‌دیلر. اولرنینگ فکریچه، بو لایحه افغانستان گه ترانزیت درآمدلری، انرژی تأمیناتی و ایش اورین‌لرینی یره‌تیش امکانینی بیریشی ممکن.
اقتصاد شناس امیدالله قاسم‌زی شونده‌ی دییدی: «تاپی لایحه‌سی منطقه‌ده‌گی ییریک لایحه‌لردن بیری صفتیده ملی درآمدلرنینگ آشیشی‌ده مهم رول اوینه‌یدی. اوشبو لایحه آرقه‌لی گازگه بولگن طلب قاندیریله‌دی و حلی عملی باسقیچ گه اوتمه‌گن باشقه لایحه‌لر گه هم ایشانچ و تورتکی بیره‌دی.»
تاپی لایحهسینینگ افغانستان حدودی‌ده یونه‌لیشی قریب بیرمینگ ۸۰۰ کیلومترنی تشکیل ایته‌دی. اوشبو لایحه آرقه‌لی تورکمنستان‌دن افغانستان، پاکستان و هندوستان گه ییلیگه ۳۳ میلیارد مترمکعب گاز ییتکزیب بیریش امکانیتی بار. لایحه هرات، نیمروز، هلمند و قندهار ولایت‌لریدن اوته‌دی.
افغانستان تاپی لایحهسینینگ اساسی ترانزیت یولَگی صفتیده هر ییلی میلیونلب دالر ترانزیت تولاولریدن تشقری، ارزان گاز و مینگلب ایش اورین‌لریدن فایده‌لنیشی ممکن.
