اسلامی دولت (داعش) گروهی نینگ خراسان شاخه‌سی، اوتگن کون کابل ده روسیه ایلچیخانهسی یقینیده اویوشتریلگن خودکش هجوم مسئولیتینی زمه‌سیگه آلگن.
خارجی میدیالر نینگ گزارشی اساسیده، داعش گروهی اوز تیلگرامیده بیر بیانیه ترقه‌تیب یازیشیچه، مذکور گروه نینگ بیر جنگریسی انتحاری واسکتینی روسیه ایلچخانه‌سی نینگ ایشلاوچیلری حضوری بولگن توپلم ده پارتلتگن.
کابل امنیه قوماندان‌لیگی نینگ سوزلاوچیسی خالد زدران گه کوره، اوشبو هجوم ده افغانستان‌لیک تورت کیشی و روسیه ایلچیخانهسی نینگ ایکی ایشلاوچیسی هلاک بولیب و باشقه ۱۰ کیشی یره‌لنگن.
بیزلرنینگ فیسبوک صحیفه‌میزگه باش اورینگ!
روسیه تشقی ایشلر وزیرلیگی هم، اوتگن کون توش دن آلدین کابل ده اوشبو مملکت نینگ ایلچیخانهسی یقینیده اویوشتیریلگن پارتلش ده مذکور ایلچیخانه نینگ ایکی ایشلاوچیسی جان بیریب و باشقه بیر قطار کیشی‌لر یره‌لنگنینی تصدیق قیلگن. روسیه تشقی ایشلر وزیرلیگی اولگن کیشی‌لر روسی دیپلومات‌لر می یوق، معلوم قیلمه‌گن.
روسیه تشقی ایشلر وزیرلیگی نینگ ایتیشیچه، خودکش هجومچی پارتلش ماده‌نی اوشبو ایلچیخانه نینگ ایشیگی یقینیده، آدم‌لر توپلنگن بیر جای ده پارتلتگن.
کابل امنیه قوماندان‌لیگی نینگ سوزلاوچیسی خالد زدران گه کوره، خودکش هجومچی ایلچیخانه گه ایتیشمسدن آلدین، اسلامی امارت کوچلری تامانیدن نشانگه آلینیب و پارتلش ماده‌سی ایسه پارتله‌گن. اونگه کوره، اسلامی امارت نینگ خوفسیزلیک و کشفی نهادلری بو هجوم باره‌سیده تدقیقات‌لرینی باشلشگن.
داعش گروهی نینگ خراسان شاخه‌سی هجومچی کیشینی «وقاص المهاجر» دیب، اوشبو هجوم ده «اسلامی امارت اعضالری، جاسوس‌لر و اسلامی امارت خوفسیزلیک کوچلری» شامل ۲۵ کیشی هلاک بولیب و یره‌لنگن. شونینگدیک مذکور گروه گه کوره، اوشبو هجوم ده روسیه نینگ کمیده ایکی یشاوچیسی هلاک بولگن.
بیزلرنینگ توییترده هم تعقیب قیلینگ!
روسیه، پاکستان، یوناما، حامدکرزی شامل افغانستان نینگ سابق جمهور باشلیغی و سابق دولت ده ملی مصالحه عالی کینگش باشلیغی عبدالله عبدالله و باشقه قطار کیشی‌لر اوشبو هجوم نی قاره‌لشگن.
شونینگدیک مملکت تشقی ایشلر وزیرلیگی مذکور هجوم نی قتیق قاره‌لب، روسیه دولتی و خلقی و حادثه طفیلی قربان بولگن‌لر نینگ عایله اعضالری گه اوز قیغوداشلیگینی بیلدیرگن. اوشبو وزیرلیک نینگ ایتیشیچه: «امنیتی نهادلر هجوم گه دایر برچه تامانلمه تدقیقات نی باشلشگن و روسیه ایلچیخانهسی اوز ایشیگه دوام بیریش اوچون جدی خوفسیزلیک چاره تدبیر کوریله‌دی.»
تشقی ایشلر وزیرلیگی نینگ کوپه‌یتریشیچه، افغانستان اسلامی امارت سرپرست حکومتی روسیه بیلن یقین مناسبتده دیر و «ایکی مملکت نینگ مناسبتی اوستیگه تأثیر قیلیش اوچون یاولر نینگ بو گَل اقدام‌لری گه رخصت بیرمه‌یدیلر.»
