بادغیس ده یوز بیرگن سونگی کوچلی یاغینگرچیلیکلر و سوو تاشقینلر، ایکینچیلیک ییرلر، باغلر و اهالینینگ سرمایهلری توغریسیده کوپینچه زیان ییتیشتیرگن. بادغیسدهگی دهقانلردن قطارینینگ ایتیشلریچه، مذکور واقعهلر نهفقط اولرنینگ بیر ییللیک زحمتلرینی اورتهدن کیتگزگن، بلکیم عایلهلردن قطارینینگ تیریکچیلیگی و درآمد منبعسینی هم بحران بیلن روپهره قیلگن.
بادغیس ولایتی آبکمری تومنیدهگی دهقانلردن ۳۰ یاشر عبداللهنینگ ایتیشیچه، سونگی سوو تاشقینلر پسته باغلری، میوه باغلری و ایکینچیلیک ییرلرینی جدی شکلده بوزگن. «بو ییل یوز بیرگن سوو تاشقینلر ایکینچیلیک ییرلریمیزگه جودهیم کوپ سلبی تاثیر قویگن. پسته باغلریمیز و میوه باغلریمیزنی جوده کوپ بوزدی. تورت ییرگه بوغدای ایککن ایدیک؛ بیراق یامغیر و ژاله همهسینی اورتهدن کیتگزدی. اوشبو زیانلر حیاتیمیزگه جوده تاثیر قیلگن و کوپینچه قیینچیلیکلر بیلن روپهره بولگنمیز.»
عبداللهنینگ ایتیشیچه، بوزیلگن ییرلردن بو ییل فایدهلنیش ممکن بولمهی و کیلهسی ییلگچه کوتیب توریشگه مجبور دیر. شونینگدیک او، بو توغریدهگی یاردم بیرووچی نهادلردن قطاری آرقهلی کورسهتیلگن یاردملرنی ییترلی بیلمهیدی. «یوباریلگن یاردملر جوده آز و قانیقرلی ایمس ایدی. دولتی نهادلر و موسسهلرنینگ خاص شکلده بیزلرگه اعتبار قرهتیشی و کوپراق یاردم بیریلیشینی سورهیمیز.»
مقر تومنیدهگی دهقانلردن ۳۲ یاشر عبدل، ایکینچیلیک ییرلرنینگ کینگ کولملی شکلده بوزیلگنیدن خبر بیرگن. اونگه کوره، یوز بیرگن سونگی سوو تاشقینلر اهالینینگ برچه ایکینلری جملهدن بوغدای و ارپه ایکیلگن آلتی هکتار ییرینی بوزگن. «مقر تومنیده آلتی هکتار ییریمیز بوزیلدی و ایکینلریمیزدن برچهسی اورتهدن کیتدی. ییرلریمیزگه هر ییلده بیر مرته نرسه ایکلهدی و حاضر موسسهلر یاردمینی کوتیب تورگنمیز؛ لیکن یاردم بیریلمهگن.»
شونینگدیک قادس تومنیدهگی دهقانلردن ۲۹ یاشر محمد میرویسنینگ ایتیشیچه، سونگی سوو تاشقینلر شخصی اوچ جریب ییرینی بوزیب و قیته نرسه ایکیش امکانیتیگه ایگه ایمس. «درآمدیمیزدن کوپینچهسی زراعت آرقهلی دیر. سوو تاشقینلر حیاتیمیزگه یامان تاثیر قویگن. دهقانلردن کوپینچهسینینگ قیته ایکیشگه کوچی ییتیشمهیدی و ایشلاوچیلیک کبی باشقه ایشلرنی تنلشگه مجبور بولهمیز.»
محمد میرویسنینگ ایشانچیگه کوره، کوچلی یاغینگرچیلیکلر و سوو تاشقینلر، اقلیم اوزگریشلری بیلن تیگیشلی دیر. «فکریمیزچه اوشبو یاغینگرچیلیکلر اقلیم اوزگریشلریگه کوپراق سبب بولگن. اوتگن ییللرده مونچه کوچلی و ترتیبسیز یامغیر یاغمس ایدی؛ لیکن حاضر سوو تاشقینلر کوپهیگن و اهالیگه جوده سلبی تاثیر قویگن.»
بادغیس بیلیم یورتی زراعت فاکولتهسی باشلیغی معظم حقملنینگ ایتیشیچه، کوچلی و موسومسیز یاغینگرچیلیکلر اقلیم اوزگریشلری بیلن توغری علاقهسی بار. «بادغیس کبی قوروق و یریم قوروق منطقهلرده اقلیم اوزگریشلری یاغینگرچیلیکنینگ توستدن و ترتیبسیز شکلده یوز بیریشیگه سبب بولگن که بو وضعیت، توپراق آرقهلی سوونی جذب بولیش امکانیتینی کمهیتیرگن و سوو تاشقینلرگه باعث بولگن.»
بادغیس حادثهلرگه قرشی کورهش ریاستی نشرات مدیری سیدفایق مهرباننینگ ایتیشیچه، اوشبو اداره معلوماتی اساسیده سونگی یاغینگرچیلیک و سوو تاشقینلر طفیلی، ۱۴ کیشی اولیب، ایکی کیشی یرهلنگن و بیر مینگدن آرتیق یشش اوی و دکان بوزیلیب همده ۱۳ مینگ جریبدن آرتیق ایکینچیلیک ییر زیان کورگن. «مذکور واقعهلر نتیجهسیده ۱۴ کیشی اولیب و ایکی کیشی یرهلنگن. شونینگدیک بیر منیگدن آرتیق یشش اوی و دکان بوتوتلی و قسمی شکلده بوزیلیب و ۱۳ مینگ جریبدن آرتیق ییر یاغینگرچیلیک و ژاله نتیجهسیده زیان کورگن. شهیدلر و یرهلنگنلر عایلهلریگه نقدی یاردم و باشقه یوزلب عایلهگه آزیق-آوقت یاردملری ترقهتیلگن.»
شوندهی بیرحالده، بادغیس ایکینچیلیک، سووغاریش و چاروهچیلیک ریاستی مطبوعات مسئولی عبدالحلیم حلیمزادنینگ ایتیشیچه، اینگ کوپ زیان بوغدای و نخود ایکینزارلریگه ییتیشگن. شونینگدیک او توستدن و کوچلی یاغینگرچیلیکلر کوپهیگنینی اقلیم اوزگریشلری و اوسیملیک بولگن جایلر کمهیشی نتیجهسی بیلهدی. حلیمزاد، بادغیس حادثهلرگه قرشی کورهش ریاستی آمارینی تصدیقلب و کوپهیتیریشیچه: «سونگی سوو تاشقینلر زیانلرگه سبب بولگن که تومنلردن ییتیشگن تخمینی آمار اساسیده، دهقانلرنینگ قریب ۲۲ مینگ جریب ییری بوزیلگن. ییچیم یول گزینهلری ایسه سوو تاشقینی یولیده کوچت ایکیلیشی، اورمانلر بوزیلیشی آلدی آلینیشی و چیدهملی اوسیملیکلر ایکیلیشی دیر.»
ایتیش کیرهک که، حمل و ثور آیلریده مقر، آبکمری، قادس، سنگآتش، تگاب عالم، بالامرغاب و قلعهی نو تومنلریده یوز بیرگن کوچلی یاغینگرچیلیکلر و ژاله نتیجهسیده، ۱۴ کیشی اولیب، ایکی کیشی یرهلنگن و ایکینچیلیک ییرلردن بیر قسمی، دکانلر و یشش اویلر زیان کورگن.
