بیرلشکن ملت‌لر تشکیلاتی نینگ افغانستانده‌گی اورین باسرلیک هیات دفتری یا یوناما، اسلامی امارت تامانیدن میدیالرنینگ مطبوعاتی ییغینی لغو ایتیلیشی‌گه عکس‌العمل کورسه‌تیب بو ایش‌نی سوز ایرکینلیگیگه چیکلاو یره‌تیش عنوان قیلگن. مذکور جمغرمه بوگون اوز فیسبوک صحیفه سیده اسلامی امارت‌دن فرقلی فکرلری بولگن‌لرگه چیکلاو یره‌تیش اوچون سعی-حرکت قیلمسلیک‌لرینی سوره‌گن.
شونینگدیک یوناما اسلامی امارت‌دن، افغانستان‌لیک‌لر ارا مذاکره‌نی قوللب قوتلشینی طلب قیلگن. عین‌حالده اوتکن کونی ممکتده‌گی ییتکیرمه‌لر و ژورنالیست‌لر وضعیتینی تیکشیریش خصوصیده مطبوعاتی ییغین ژورنالیست‌لر و افغانستان میدیالری فدراسیونی تامانیدن کابل‌ده اوتکزیلیشی کوتیلر ایدی، بیراق مذکور فدراسیون اعضالری نینگ ایتیشلریچه، اولرگه اوشبو ییغین اوتکزیلیشی‌گه رخصت بیریلمه‌گن و اسلامی امارت متصدی‌لری بو ییغین‌نی لغو قیلگن‌لر.
اوشبو فدراسیون نینگ رهبریت عضوی سید علی‌اصغر اکبرزاده اوتکن کونی ایتیشیچه: «بوگون ژورنالیست‌لر و افغانستان میدیالری فدراسیونی تامانیدن مطبوعاتی ییغین اوتکزیلیشی کوتیلر ایدی ایچکی و تشقی برچه میدیالر خبرنی پوشش بیریش مقصدیده حضور تاپکن ایدیلر، لیکن تاسف بیلن اسلامی امارت نینگ شفاهی بویروغ‌لری‌گه بناً بو کنفرانس لغو بولدی و اوتکزیلیشی‌گه رخصت بیرمه‌دیلر.»
بیزلرنینگ فیسبوک صحیفه‌میزگه باش اورینگ!
عین‌حالده، خلق‌ارا کیچیریم تشکیلاتی اسلامی امارت نینگ بو حرکتی‌نی سوز ایرکین‌لیگی و خبرچی‌لرگه چیکلاو یره‌تیش عنوان قیلگن. اوشبو تشکیلات بوگون تویتری‌ده یازیشیچه، میدیالر دنیا بویلب افغانستان وضعیتی خصوصیده معلومات بیریش اوچون اساسی رول‌لری بار. مذکور نهاد نینگ تاکیدلشیچه، افغنستانده‌گی میدیا ایشلاوچیلری و ژورنالیست‌لر ایرکین‌لیک بیلن ایشلب و اولر قوریقله‌نیشی کیره‌ک.
سوز ایرکین‌لیگی اوی، بوگون بیر اعلامیه آرقه‌لی اسلامی امارت تامانیدن ژورنالیست‌لر نهادلری و افغانستان میدیالری فدراسیونی نینگ مطبوعاتی ییغینی بیکار قیلینیشینی سوز ایرکینلیگیگه انیق زورلش عنوان قیلیب و اسلامی امارت‌دن بوندن آرتیق سوز ایرکین‌لیگی برابریده بی فرق بولمسلیگینی طلب قیلگن. سوز ایرکین‌لیگی اوی نینگ اورغولشیچه، اسلامی امارت نینگ بو گَل ایشی اسلو ییغینی‌ده اسلامی امارت رهبرلری نینگ بیرگن وعده‌لری‌گه قرشی دیر.
اوشبو نهاد اسلامی امارت‌دن، افغانستان خلقی نینگ قوشمه یوتوقی سنه‌لگن سوز ایرکین‌لیگینی ایاغ آستی قیلمسلیگینی ایسته‌گن. شونینگدیک سوز ایرکین‌لیگی اوی دنیا جماعه‌چیلیگی، اروپا اتفاقی نینگ کابل ده‌گی ایلچیلیگی و بیرلشکن ملت‌لر تشکیلاتی نینگ افغانستانده‌گی اورین باسرلیک هیات دفتری‌دن، دیپلوماتیک یول‌لر آرقه‌لی سوز ایرکین‌لیگی بوغیلیش‌نی آلدینی آلیشینی سوره‌گن.
بیزلرنینگ توییترده هم تعقیب قیلینگ!
اسلامی امارت رسمی‌لری، خبرچی‌لر نهادلری و افغانستان میدیالری فدراسیونی نینگ مطبوعاتی ییغینی بیکار قیلینیشی خصوصیده حاضرگه‌قدر هیچ نرسه دیمه‌گن.
۱۶ نهاد دن عبارت ژورنالیست‌لر نهادلری و افغانستان ییتکیرمه‌لری فدراسیونی تخمیناً بیر سنه‌دن بویان فعالیت قیلیب کیلماقده. اوتکن کونگی ییغین اوشبو فدراسیون‌گه اعضا ۱۶ نهاد اشتراکی بیلن اوتکزیلیشی کوتیلر ایدی.
ژورنالیست‌لرنهادلری و افغانستان میدیالری فدراسیونی اعضالری نینگ ایتیشلریچه، اسلامی امارت تامانیدن اولرگه کیینگی خبرلری‌گچه هیچ قنده‌ی ییغین اوتکزیش‌که حق‌لری یوق لیگی باره سیده بویروغو بیریلگن. اولر اسلامی امارت‌دن بو‌گَل قیینچیلیکلر آلدی آلینیشی اوچون تیزلیک بیلن بوتوغریده طرزالعمل یا قانون ایجاد ایتیش خصوصیده نهایی قرارلرینی اعلان ایتیشنی سوره‌گنلر.
