بوگون (چهارشنبه ۲۹- دلو) پایتخت یشاوچی‌لریدن یوزلرچه‌سی ناراضلیک بیر نمایش یولگه قوییش بیلن، مملکتده ریجه‌لنگن ترورلر رقمی کوپه‌یگنی توغریسیده خواطر بیلدیریب و بو حقده حکومت نینگ توجه‌سیزلیککه عیبله‌گنلر.
مذکور ناراضلیک ییغینده اصلاح جمعیتی نینگ مرکزی کینگش باشلیغی عبدالصبور، حکومتدن ریجه‌لنگن ترورلر دوسیه‌لری تیکشیریلیشی و حادثه عامل‌لری تانیلیب و محکمه قیلینیشی سوره‌گن.
جناب فخری گه کوره، حکومت مذکور حادثه‌لر عامل‌لرینی تانیب و محکمه قیلمه‌گن صورتده، اولر اعتراض‌لریگه دوام بیره‌دی.
شونینگدیک مذکور ناراضلیک ییغین گه شرکت قیلگن شاعر و یازووچی بسم‌الله ذکی نینگ ایتیشیچه، مملکتده ناتینچلیکلر باشقه هر زمان گه نسبتن کوپه‌یگن و اولرنینگ ایسته‌کلریگه توجه بولمه‌گن صورتده، کینگ ناراضلیک نمایش یولگه قویه‌دیلر.
مملکت باش قاره‌لاوچیلیگی سوزلاوچیسی جمشید رسولی نینگ ایتیشیچه، قاره‌لاوچیلیک بو اداره نینگ ایشی آستیده قرار تاپگن هر بیر دوسیه نی تیکشیرگن.
ایتیش کیره‌ک کیم یالغیز سونگی بیر ییل ده کمیده ۲۰ خبرچی، قطار دین عالم‌لری و مملکت مدنی سیمالری ریجه‌لنگن ترورلرده هلاک ایتیلگن. قربانیلر عایله‌لری عزیزلری نینگ دوسیه‌سی حکومت تامانیدن تیکشیریلمه‌گنیدن هر دایم شکایت قیلیشگن.