بوگون “دوشنبه” جوزجان ، فاریاب و بلخ ولایت‌لری یشاوچی‌لریدن مینگ‌لرچه‌سی مذکور ولایت‌لرده ناراضلیک نمایش یولگه قوییب، ایکی تامانلمه حرکت‌لر اهالی و حکومت آره‌سیده فاصله ایجاد قیله‌دی دیگنلر.
اعتراضچی‌لرنینگ ایتیش‌لریچه، حکومت شمالی ولایت‌لر یشاوچی‌لری نینگ ایستک‌لریگه ایجابی جواب قیترمه‌گن صورتده، اعتراض‌لرینی مملکت باشکنتی‌گچه ییتیشتیره‌دیلر.
اعتراضچی‌لردن بیری عبدالمجید صمیم نینگ سلام‌وطندارگه ایتیشیچه، حکومت شمالی ولایت‌لر اینیقسه فاریاب ولایتیده‌گی قرارینی قیته‌دن تیکشیرمه‌گن صورتده، اعتراض‌لرینی کینگی‌تیریش‌لری ممکن.
جناب صمیم نینگ کوپه‌یتیریشیچه، شمالی ولایت‌لر یشاوچی‌لری فاریاب ولایتیده ینگی‌دن تعیین‌لنگن حاکمی‌نی قبول قیلمه‌یدیلر و حکومت نینگ بوتوغریده دقت قیلیشی کیره‌ک.
جوزجان‌لیک اعتراضچی‌لردن بیرقطاری نینگ ایتیش‌لریچه، حکومت اهالی ایستک‌لریگه تمکین قیلمهگن صورتده، مدنی نافرمان‌لیکلرگه قول اوره‌دیلر.
اعتراضچی‌لرنینگ آگاهلنتیریشلریچه، وضعیت خواطرلنترووچی بولمسدن آلدین جمهور رییس نینگ بوتوغریده دقت قیلیشی لازم.
شونینگدیک، فاریاب ولایتی نینگ اندخوی قوشمه تومن‌لری یشاوچی‌لری کینگ بیر اعتراض آرقه‌لی، حکومت نینگ اهالی ایسته‌گی گه قرشی بولگن هرقنده‌ی قراریگه قرشی توخته‌یش‌لرینی بیلدیرگنلر.
ملی اسلامی جنبش حزبی اورین باسری مسعوداحمد مسعود نینگ سلام‌وطندارگه ایتیشیچه، فاریاب ولایتیده حکومت تامانیدن ینگی حاکم تعیین‌لنگنی سبب، اعتراض بیلدیرگنلر.
جناب مسعود گه کوره، اوشبو اعتراضده مارشال عبدالرشید دوستم نینگ موقفی‌دن حمایت بیلدیرگنلر و فاریاب ولایتیده اوشبو ولایت کدرلریدن حاکم تعیین ایتیلمه‌گن صورتده، اعتراض‌لریگه دوام بیره‌دیلر.
جوزجان و فاریاب یشاوچی‌لری چیککه‌سیده، بلخ یشاوچی‌لری هم بیر اعتراض یولگه قوییب حکومتدن فاریاب ولایتی خصوصیده‌گی قرارینی قیته‌دن تیکشیریشی‌نی سوره‌گنلر. اولرنینگ ایتیش‌لریچه، ایستک‌لریگه دقت بولمه‌گن صورتده، اعتراض‌لریگه دوام بیره‌دیلر.
بوتوغریده جمهورلیک ریاستی فکرینی آلیش اوچون سعی و حرکت قیلدیک، لیکن موفق بولمه‌دیک.