نماینده‌لر کینگش اعضالریدن قطاری، مذکور کینگش نینگ بوگونگی (چهارشنبه ۱۲- جوزا) عمومی ییغینیده، کابل غربیده هجوم‌لر دوام تاپیشی گه عکس‌العمل کورسه‌تیب و امنیت نی تأمین‌لش خصوصیده حکومت و امنیتی نهادلرنینگ کوچ‌سیزلیککه عیب‌لشگن.
اولرنینگ ایتیش‌لریچه، بو توغریده حکومت و امنیتی نهادلرنینگ بیللی بیر برنامه‌سی یوق. بو کینگش اعضالری حکومتدن، کابل غربی نینگ امنیتی نی تأمین قیله آلمه‌گن صورتده، بو مسئولیت نی اهالی گه تاپشیریش‌لرینی سوره‌گن.
بیزلرنینگ فیسبوک صحیفه‌میزگه هم باش اورینگ!
نماینده‌لر کینگش اعضالریدن بیری علی اکبری قاسمی، اوتگن کون شام چاغی کابل غربی ۳- خوفسیزلیک حوزه ده کیین‌مه‌کیین یوزبیرگن پارتلش‌لرگه عکس‌العمل کورسه‌تیب ایتیشیچه: «حکومت اهالی نینگ یاردم بیلن اَدیم کوتارمه‌گن صورتده، امنیت تأمین بولمه‌یدی. مینیم ایشانچیم گه کوره، حاضرگی حکومتدن هیچ بیر نرسه توزلمه‌یدی.»
نماینده‌لر کینگشی نینگ باشقه بیر اعضاسی زهره نوروزی نینگ ایتیشیچه: «نیچه مرته شو تربیون آرقه‌لی دولت و امنیتی نهادلردن، امنیتی ریجه‌لری نینگ کیلتیریش‌لرینی سوره‌دیک. بونده‌ی هجوم‌لرنینگ آلدینی آلیش اوچون پلان و ریجه‌لریز بولمه‌گنده، قویینگیزلر که اهالی اوزلری اوز خوفسیزلیک‌لرینی تأمین قیلسین.»
عین حالده، بوگونگی ییغین نی ریاست قیلگن نماینده‌لر کینگشی نینگ بیرینچی اعضاسی احمدجاوید جیحون، حکومتدن کابل غربی نینگ خوفسیزلیگی نی تأمین‌لش اوچون جدی بیر خوفسیزلیک ریجه نی قول آستیده آلیشی نی سوره‌گن.
ایتیش کیره‌ک که اوچ هفته آلدین سیدالشهدا مکتبی برابریده بمب جایلشتیریلگن بیر موتر پارتله‌گنیدن کیین، اوتگن کون شام چاغی کابل غربی ۳- خوفسیزلیک حوزه‌ده کاستر تیپلی ایکی لینی موتر نی نشانگه آلگن ایکی پارتلش ده، ۱۰ کیشی هلاک و باشقه ۱۲ کیشی ایسه یره‌لندی.
بو حادثه قربانی‌لری نینگ برچه‌سی تینچ‌اهالی دیر.
سیدالشهدا مکتبی ده‌گی هجوم ده کمیده ۹۰ کیشی هلاک و ۲۴۰ دن آرتیق کیشی ایسه یره‌لندی. بو حادثه نینگ قربانی‌لریدن کوپینچه‌سی قیز اوقووچی‌لر ایدی.