کنر‌ده محلی منبع‌لر نینگ ایتیش‌لریچه، بوگون شام چاغی پاکستانی حربیلری اوشبو ولایت سرکانو تومنی گه موشکی هجوملر قیلگنلر. منبع‌لر گه کوره، مذکور هجوملر بوگون شام‌گچه دوامی بار ایدی.
سرکانو تومن یشاوچیلریدن بیری بشیراحمد نینگ سلاموطندار گه ایتیشیچه، موشکلردن بعضی‌سی یشش اویلری گه اصابت قیلیب و عایله‌لردن قطاری جان‌لری نی سقلش اوچون اویلری نی ترک قیلگنلر.
بیراق بشیراحمد نینگ کوپه‌یتیریشیچه، حاضرگچه اوشبو هجوملر عاقبتیده، اهالی گه ضرر ییتیشیب، ییتیشمه‌گنی بیللی ایمس.
شونینگدیک کنر محلی مسئوللری اوشبو ولایت سرکانو تومنی گه پاکستان حربیلری نینگ موشکی هجوملری نی تصدیق قیلگنلر.
کنر معلومات و مدنیت ریاست رئیسی نجیب‌الله حنیف نینگ ایتیشیچه، مذکور هجوملر تلفاتی و ضررلری توغریسیده، حاضرگچه دقیق معلومات قولگه یوق.
اسلامی امارت رسمی‌لری حاضرگچه پاکستانی حربیلری نینگ هجوملری خصوصیده، هیچ بیر نرسه دیمه‌گن.
مملکت چیگره تومنلریگه پاکستانی حربیلری نینگ موشکی هجوملری نظیری کوریلمه‌گن ایمس. بلکیم مذکور مملکت حربیلری ییل‌لردن بیری کنر تومنلری اوستیگه موشکی هجوملر یولگه قویگن که نتیجه‌ده، مالی ضررلر گه علاوه، شونینگدیک جانی تلفات هم ییتیشتیرگن.
