ایکی کون آلدین افغانستان سوداگرلیک و سرمایه یاتقزیش اتاقی، خصوصی سکتور بولیمی و نماینده‌لر کینگشی اعضالریدن قطاری هرات نینگ اسلام‌قلعه گمرکی ده یوزبیرگن یانغین ضررلرینی تیکشیریش اوچون مذکور ولایت گه بارگن. اولر بوگون (پنجشنبه ۳۰- دلو) بیر ییغین آرقه‌لی تیکشیروولری نینگ نتیجه‌سینی اعلام قیلگن.
مذکور ییغینده افغانستان سوداگرلیک و سرمایه یاتقزیش اتاق باشلیغی سیدزمان هاشمی نینگ ایتیشیچه، اولرنینگ تیکشیرووی اساسیده، اسلام‌قلعه گمرکی ده یوزبیرگن یانغین ده ۳۷۰ نفت تانکری شامل بیر مینگ‌دن آرتیق وارداتی توارلر موتری بوتونلی کویگن و ۷۰ دن آرتیق توارلی موتر و اونلرچه کانتینر درک‌سیز یوقالگن.
جناب هاشمی گه کوره، تیکشیروولر مذکور حادثه‌ده سوداگرلر و موتردارلرگه یوزلرچه میلیون دالر ضرر ییتیشگنی نی کورسته‌دی.
افغانستان سوداگرلیک و سرمایه یاتقزیش اتاق باشلیغی خان‌جان الکوزی، نورم و استندرد اداره‌سی، گمرک و گمرک نی تیکشیریش اوچون حکومت تامانیدن تعیین‌لنگن هیأت ده‌گی کینگ فساد اسلام‌قلعه گمرکی ده یوزبیرگن یانغین نینگ اصلی دلیلی دیگن. مذکور ییغینده جناب الکوزی حکومت اینیقسه جمهوررئیس دن تنقید قیلیب ایتیشیچه، اسلام‌قلعه گمرکی ده فاجعه یوزبیرگن بیرحالده، حکومت بو حادثه نی جدی آلمه‌ی و بو حادثه نی تیکشیریش اوچون اورین باسرلریدن بیری یا-ده مالیه و سوداگرلیک وزیرلریدن بیری نی یوباریش اورنی گه بیر معین نی یوبارگن.
سوداگرلیک و سرمایه یاتقزیش اتاق باشلیغی نینگ کوپه‌یتیریشیچه، سوداگرلرنینگ معلوماتی اساسیده، یانغین یوزبیرمسدن آلدین بو گمرک نی تیکشیریش اوچون بیر هیأت کیلگن ایکن و توارلر موترلری و نفت تانکرلرینی چیقاریش اوچون سوداگرلردن ۸۰۰ مینگ دالر سوره‌گن ایکن و شو یوزه‌دن چیقیش اوچون موترلرگه ایکی هفته رخصت بیریلمه‌گن.
جناب الکوزی گه کوره، نهایتده مرکز تامانیدن یوباریلگن هیأت یانغین یوزبیرگن ایرته‌سی ۵۰۰ مینگ دالر آلیش بیلن کیلیشگن؛ بیراق بو حادثه یوزبیرگن. خان‌جان الکوزی نینگ اورغولشیچه، اوتگن بیر ییل ده مذکور گمرک نی تیکشیریش اوچون ۲۵ هیأت مرکزدن کیلگن.
اوشبو ییغینده نماینده‌لر کینگش اعضاسی محمدصادق قادری، اسلام‌قلعه گمرکی ده کینگ فساد و مالیه وزیرلیگی نینگ توجه‌سیزلیگیدن تنقید قیلیب ایتیشیچه، بو گمرک ده هر کیم اوزی اوچون بیر یول توزه‌تیب و هیداوچی‌لردن باج آلیشه‌دی. اونگه کوره، گمرک نی تیکشیریش اوچون کابل دن کیلگن هیأت‌لردن برچه‌سی وضعیتی نی یخشی‌لنتیرگنی اورنیده فساد نی کینگه‌یتیرگن.
شونده‌ی بیرحالده، حادثه نی تیکشیریش اوچون هرات کیلگن ایچکی ایشلر وزیرلیگی نینگ جنایی جرم‌لرگه قرشی کوره‌ش باشلیغی زلمی منگل نینگ سلام‌وطندارگه ایتیشیچه، تیکشیروولر اوتکزیلگنیدن کیین ۱۲ کیشی قولگه آلینیب و قاره‌لاوچیلیککه تانیشتیریلگن.
جناب منگل گه کوره، یانغین یوزبیرگن کونی ۴ مینگ و ۲۲۶ موتر گمرک ده توخته‌گن ایکن کیم بولردن، ۹۷۵ ته‌سی اوت آلگن و باشقه ۳ مینگ ۲۵۱ ته‌سی امنیتی کوچلر آرقه‌لی حادثه محلیدن چیقاریلگن.
