بوگون “چهارشنبه” افغانستان خصوصیده منطقه مملکت‌لری نینگ نماینده‌لری حضوری بیلن هندوستانده امنیتی بیر ییغین یولگه قوییلدی.
اوشبو ییغینده افغانستاندن دعوت قیلینمه‌گن و پاکستان و چین مملکت‌لری نینگ نماینده‌لری هم بو ییغینده اشتراک قیلمه‌گن، بیراق ایران، روسیه، اوزبیکستان و باشقه بیرقطار مملکت‌لرنینگ امنیتی مصلحتچی‌‍لری حضور تاپیب افغانستان وضعیتی خصوصیده بحث قیلگنلر.
اسلامی امارت مسوول‌لری، بو ییغین یولگه قوییلگنی‌نی خوش قرشی‌لگن. اسلامی امارت سوزلاوچیسی ذبیحالله مجاهد نینگ تاکید قیلیشیچه، منطقه‌ده امنیت و اقتصاد خصوصیده یولگه قوییله‌دیگن هرقنده‌ی ییغین اسلامی امارت تامانیدن خوش قرشی‌لنه‌دی.
بیراق، سیاسی ایش بیلرمانلردن بیرقطاری، افغانستان حکومتی اشتراک قیلمه‌گن ییغین‌نی افغانستان منفعتی‌گه بیلمه‌یدیلر.
سیاسی ایش بیلرمانلردن بیری محمدحسن حقیار نینگ ایتیشیچه، هند ییغینی هم ایران ییغینی کبی هرتامانلمه و قناعت‌لی ایمس و پاکستان و چین نینگ نماینده‌لری بو ییغینده اشترک قیلمه‌گن.
جناب حقیار گه کوره، اولر افغانستان‌گه قرشی بیر جبهه ایجاد قیلیش‌نی ایسته‌یدی و بیرقطار مملکت‌لرنینگ افغانستان خصوصیده‌گی خواطرلری کوپه‌یگن. اونینگ ایتیشیچه، بو ییغین چین و پاکستان منفعتی‌گه هم ایمس.
ایتیلیشیچه، اسلامی امارت بیر هیاتی تشقی ایشلر وزیرلیگی سرپرستی امیرخان متقی رهبرلیگی گه پاکستانگه سفر قیلگن و پاکستان رسمی‌لری بیلن ایریم موضوعلر خصوصیده بحث قیلیش‌لری ممکن. شونینگدیک، ایرته “پنجشنبه” روسیه، چین و پاکستان نماینده‌لری نینگ حضوری بیلن افغانستان خصوصیده پاکستانده بیر ییغین یولگه قوییلیشی ممکن.