آمریکالیک تدقیقاتچیلر تامانیدن ترقه‌تیلگن گزارش اساسیده، اوتگن اوچ ییل ده افغانستان ده آمریکا و بیرلشیک‌لری نینگ هوایی هجوملری کوپه‌یگنی عاقبتیده، تینچ‌اهالی تلفاتی ۳۳۰ فایز کوپه‌یگن.
بروان بیلیم‌یورتی نینگ «اوروش خره‌جت‌لری نینگ پروژه‌لری» بولیمی تامانیدن ترقه‌تیلگن تدقیق گه کیلیشیچه، افغانستان توغریسیده آمریکا سیاستی نینگ اوزگریشی و طالبان گه قرشی هجوملر کوپه‌یگنی باعث، مذکور مملکتده تینچ‌اهالی نینگ تلفات رقمی یوقاری کیتگن.
مذکور گزارش ده کیلیشیچه، میلادی ۲۰۱۷- ییل ده آمریکا طالبان گه قرشی هجوم‌لرینی کوپه‌یتیریش گه قرار آلگن بیرحالده، تینچ‌اهالی نینگ تلفات رقمی یوقاری کیتدی کیم یالغیز اوتگن ییل ده ۷۰۰ کیشی هلاک ایتیلگن.
مذکور تحقیق بیرلشگن ملتلر تشکیلاتی نینگ گزارش‌لری اساسیده تیارلنگن و میلادی ۲۰۰۱- ییل ده آمریکا افغانستان گه هجوم قیلگنیدن کیین، تینچ‌اهالی کوپینچه تلفات کورگن.
مذکور تدقیقاتچی‌لرگه کوره، افغانستان ده آمریکا کوچلرنینگ سانی کمه‌یشی و تینچلیک پروسه‌سیگه قتنه‌شیش اوچون طالبان گروهی گه باسیم کیلتیریش، تینچ اهالی تلفات رقمی کوپه‌یشی نینگ ایکی اونملی عاملی دیر.
مذکور گزارش اساسیده، دوحه ده آمریکا و طالبان گروهی آره‌سیده کیلیشوونامه امضالنگنیدن کیین، آمریکا حربی‌لری نینگ هجومی کمه‌یگن، بیراق افغانستان حربی‌لری نینگ هجومی نیچه برابر کوپه‌یگن و ادعا قیلینیشیچه، افغانستان امنیتی کوچلری باشقه زمان‌لرگه نسبتن تینچ‌اهالی تلفات رقمی کوپه‌یشی گه سبب بولگن.
بیراق مملکت مدافعه وزیرلیگی نینگ ادعا قیلیشیچه، هوایی هجوملر کوپ دقت بیلن اویوشتیریله‌دی و هر بیر هجوم دن آلدین منطقه تیکشیریله‌دی.
مدافعه وزیرلیگی سوزلاوچیسی فواد امان نینگ ایتیشیچه، اولر هوایی هجوم اویوشتیرمه‌سدن آلدین منطقه نی یخشی تیکشیره‌دیلر و منطقه‌ده بیر تینچ‌اهالی موجود بولگن بیر حالده هم عملیات نی توختته‌دیلر.
مدافعه وزیرلیگی مسئوللری نینگ ایتیش‌لریچه، افغانستان ده تینچ‌اهالی تلفاتی نینگ اصلی عاملی، طالبان دیر. اولرنینگ ایتیش‌لریچه، طالبان اهالی نینگ اویلریده جایلشه‌دی و تینچ‌اهالیدن سپر صفتیده فایده‌لنه‌دی.
افغانستان بوییچه بیرلشگن ملتلر تشکیلاتی نینگ اورین باسرلیک هیأتی (یوناما) نینگ سونگی گزارشی ده کیلیشیچه، جاری میلادی ییل نینگ بیرینچی ۹ آیی‌ده تینچ‌اهالی نینگ تلفات رقمی ۵ مینگ و ۹۳۹ کیشی ایکن کیم بولردن ۲ مینگ و ۱۱۷ ته‌سی هلاک و ۳ مینگ و ۸۲۲ ته‌سی یره‌دار دیر.
