ننگرهار رسمی‌لری نینگ ایتیش‌لریچه، بو ولایت نینگ رودات تومنیده زهرلی چای ایچیش باعث بیر عایله نینگ ۱۲ اعضاسی زهرلنگن. رسمی‌لرگه کوره، زهرلنگن‌لردن ۲ باله هلاک و باشقه ۱۰ ته‌سی ایسه حاضرگچه مسموم دیر.
مذکور حادثه اوتگن کون (چهارشنبه ۱۳- حوت) توشدن کیین، ننگرهار ولایتی نینگ رودات تومنی گه تیگیشلی آخوند قیشلاغیده یوزبیرگن.
ننگرهار رسانه‌لر دفتری بیر خبرنامه ترقه‌تیب ایتیشیچه، رودات تومنی نینگ آخوند قیشلاق یشاوچیسی قاری ذبیح‌الله نینگ عایله اعضالری زهرلی چای نی ایچگنلر کیم قیناغ سوو ایچیده بیر کلاس توشگن ایکن.
خبرنامه ده کیلیشیچه، بو چای نی ایچگندن کیین اوشبو عایله نینگ ایکی باله‌سی هلاک و ۵ باله و ۴ عیال شامل باشقه ۱۰ کیشی زهرلنگن. خبرنامه اساسیده، زهرلنگن کیشیلر ننگرهار حوزوی کسلخانه‌سیده دارولنیش آستیده دیر.
ننگرهار حوزوی کسلخانه‌سی سوزلاوچیسی نینگ ایتیشیچه، مذکور عایله اعضالری زهرلی چای ایچیش یا-ده باشقه بیر حادثه باعث زهرلنگنی حاضرگچه انیق‌لنمه‌گن.
باشقه بیر تاماندن قاری ذبیح نینگ یقیین اقارب‌لریدن بیری عرفان‌الله بیدار نینگ ایتیشیچه، تاغه‌سی نینگ عایله اعضاسی کلاس نینگ زهرلی چایی نی ایچمه‌گن، بلکیم بوزوغ شکر نی ایچگنلر. اونگه کوره، تاغه‌سی بو شکر نی بازاردن ساتیب آلگن ایکن کیم اونینگ بوزوغ‌لیگی باعث بو عایله نینگ برچه اعضاسی زهرلنگن.
بیراق ننگرهار ولایتی رودات تومن مسئوللری، مذکور کیشیلر کلاس توشگن زهرلی چای نی ایچیش بیلن زهرلنگن‌لرینی تصدیقله‌گن.
