کابل ده تخنیکی و مسلکی تعلیملر ادارهسی مسئوللرینینگ ایتیشلریچه، بوگون (۱۵-اسد، پنجشنبه)، ۳۰۰ دن آرتیق طلبه قیته تیکلش انرژی منبعلری، الکتروتخنیک، ترماق و دیتابیس، برق مهندسی، موترنینگ برق سیستمی، الترونیک همده دیجیتال بولیملریده ایکی ییللیک بیر دورهنی بیتیریشدن کیین، افغان تکنولوژی انستیتوتیدن فارغ بولگنلر.
تخنیکی و مسلکی تعلیملر ادارهسینینگ اوقووچیلر و طلبهلر ایشلری بوییچه باشلیغی رفیعالله حبیبی، اوشبو طلبهلرنینگ فراغت مراسمیده ایتیشیچه، حاضر مسلکی کیشیلر افغانستاننینگ ایش بازاری اساسی نیازلریدن بیری دیر. «افغان تکنولوژی انستیتوتی مهم مرکزلردن بیری دیر. علمی و عملی نقطهی نظریدن تعلیم آلگن ۳۰۰ دن آرتیق کیشی آلتی دیپارتمنتدن فارغ بولدی که ایش بازارینینگ اساسی نیازلریدن بیری دیر.»
افغان تکنولوژی انستیتوتی آمری تاجمحمد تلاش، تخنیکی و مسلکی تعلیملر ادارهسیدن مملکت خصوصی بیلیم یورتلریده اوشبو انستیتوت طلبهلرینینگ تحصیلی دوامی بوییچه امکانیت یرهتیلیشینی سورهگن. «تخنیکی و مسلکی تعلیملر ادارهسیدن، اوقوو دستوریمیزنینگ کریدیتگه اوتکزیلیشی، همده خصوصی بیلیم یورتلرده آز پول بیلن مذکور طلبهلر اوچون عالی اوقوو زمینهسی یرهتیلیشینی ایستهیمیز.»
شوندهی بیرحالده، ینگیلیکده مذکور انستیتوتنی بیتیرگن طلبهلردن قطاری تخنیکی و مسلکی تعلیملر ادارهسیدن، اولرگه عالی اوقوونی دوام بیریش امکانیتلری و ایش فرصتلری یرهتیلیشینی ایستهگنلر. افغان تکنولوژی انستیتوتیده تعلیم کورگن طلبهلردن تواب ابراهیمخیلنینگ ایتیشیچه: «حاضر ایش بازاری وضعیتی یخشی ایمس. ییللر درس اوقیب، علمی و عملی نقطهی نظریدن تعلیم کوردیک. اسلام امیرلیگیدن بیزلرگه ایش زمینهسی یرهتیلیشینی سورهیمیز.»
شونینگدیک اوشبو انستیتوتنی بیتیرگن طلبهلردن باشقه بیری نجیبالله امینگه کوره: «حکومتدن بیزلرگه ایش زمینهسینی یرهتیلیشینی ایستهگنیمیز یانیده، شونینگدیک عالی اوقوو دوامی امکانیتینینگ هم یرهتیلیشینی سورهیمیز.»
تخنیکی و مسلکی تعلیملر ادارهسی مسئوللرینینگ ایتیشلریچه، اوشبو طلبهلر اوچون مملکت خصوصی بیلیم یورتلریده ۵۰ فایز تخفیف بیلن عالی اوقوو گه دوام بیریش امکانیتی یرهتیلیشی ممکن.
