قطر ده طالبان سیاسی دفتری سوزلاوچیسی محمد نعیم، مذکور گروه سیاسی اورین‌باسری ملاعبدالغنی برادر و اونینگ یولداشلیک قیله‌دیگن هیأت، ایران تشقی ایشلر وزیری محمدجواد ظریف بیلن اوچره‌شگنیدن خبر بیرگن.
او، بوگون (یکشنبه ۱۲- دلو) توشدن کیین بیر توییت آرقه‌لی یازیشیچه، ایکی تامان بو اوچره‌شووده ایکی مملکت گه تیگیشلی موضوعلر، افغانستان وضعیتی، افغانستان‌لیکلرارا سوزلشوولر، دوحه کیلیشوونامه‌سی بوتونلی عملی ایتیلیشی و افغانستان و منطقه‌ده تینچلیک نینگ کیره‌کلیگی خصوصیده سوزلشگن.
ایران نینگ تسنیم خبرگزارلیگی نی گزارشی اساسیده، جناب ظریف طالبان سیاسی هیأتی بیلن اوتکزگن صحبتی‌ده ایتیشیچه، افغانستان ده «برچه قوم‌لر، مذهب‌لر و تامان‌لرنینگ حضوری بولگن اسلامی بیر دولت» دن حمایت قیله‌دی.
مذکور خبرگزارلیک نینگ معلوماتی اساسیده، محمدجواد ظریف طالبان گه ایتیشیچه، آمریکا یخشی بیر «میانجی» ایمس.
طالبان هیأتی ملاعبدالغنی برادر نینگ ییتکچیلیگیده (اوتگن هفته سه‌شنبه کونی ۷- دلو) ایران سفر قیلدی. مذکور هیأت حاضرگچه ایران تشقی ایشلر وزیری محمدجواد ظریف گه علاوه، بو مملکت ملی خوفسیزلیک کینگش کاتبی علی شمخانی بیلن هم اوچره‌شگن.
مملکت تشقی ایشلر وزیرلیگی طالبان هیأتی نینگ ایران گه قیلگن سفری خصوصیده عکس‌العمل کورسه‌تیب ایتیشیچه، افغانستان دولتی طالبان هیأتی نینگ سفریدن باخبر دیر و مذکور هیأت سفر قیلمسدن آلدین ایران دولتی رسمی‌لری افغانستان رسمی‌لرینی باخبر قیلگن ایدی.
شونینگدیک مصالحه عالی کینگش باشلیغی عبدالله عبدالله نینگ ایتیشیچه، بو سفر افغانستان دولتی نینگ اویغونلیگی بیلن صورت تاپگن.
