اوتگن کونی (پنج‌شنبه، ۱ ثور) بلخ ولایتی نینگ مرکزی مزارشریف شهری شیعه‌لرگه تیگیشلی «سه دکان» مسجدی اوستیگه اویوشتیریلگن قانلی هجوم‌دن کیین، اسلامی امارت کوچلری و بلخ ولایتی نینگ سابق حاکمی عطامحمد نور نینگ جیینی سهیل زمری آره‌سیده توقنشوو یوز بیردی که بری-بیر سهیل زمری نینگ هلاک ایتیلیشی بیلن بو توقنشوو یکونلندی. اوشبو توقنشوو اوتگن کونی شام چاغی ساعت ۷ اطرافیده باشلنگن ایدی.
بلخ امنیه قوماندن‌لیگی نینگ سوزلاوچیسی محمد آصف وزیری گه کوره، اوتگن کونی شام چاغی ساعت ۷ اطرافیده مزارشریف شهری نینگ ایکینچی خوفسیزلیک حوزه‌سیگه قره‌شلی «بابه قمبر» کوچه‌سیده اسلامی امارت کوچلری و عطامحمد نور گه تیگیشلی کیشی‌لر آره‌سیده آتیشمه یوز بیردی که نتیجه‌ده سهیل زمری نینگ هلاک ایتیلیشی بیلن اوشبو توقنشوو یکونلندی.
بیزلرنینگ فیسبوک صحیفه‌میزگه باش اورینگ!
جناب وزیری نینگ ایتیشیچه، بابه قمبر ساحه‌سی اسلامی امارت کوچلری تامانیدن بوتونلی تازه‌لنگن.
بلخ امنیه قوماندان‌لیگی سوزلاوچیسی نینگ کوپه‌یتیریشیچه، اسلامی امارت کوچلری مذکور کیشی‌لر آلدیدن اوچ کرانکوف قورال، بیر راکت و بیر تفنگچه تاپگن‌لر.
عین‌حالده، اسلامی امارت سوزلاوچیسی نینگ اورین باسرلریدن بلال کریمی، اوتگن کیچه کیچ قورون اوز توییتری‌ده یازیشیچه، پنچ‌شنبه کونی شام چاغی مزارشریف شهری ایکینچی خوفسیزلیک حوزه‌گه قره‌شلی «بابه قمبر» منطقه‌سیده، تورر اویی‌دن اسلامی امارت گه قره‌ته اوق آتگن کیشی، اسلامی امارت کوچلری نینگ کیسکین جوابی بیلن روپه‌رو بولیب هلاک ایتیلگن و تورت میل قورال، بیر دوربین و بیر مقدار یراغ اسلامی امارت کوچلری نینگ قولیگه توشگن.
شو بیلن بیرگه بلخ ده‌گی محلی منبع‌لر نینگ ایتیشلریچه، مذکور توقنشووده مزارشریف شهری نینگ تورتینچی خوفسیزلیک حوزه آمری و اسلامی امارت کوچلریدن قطاری هلاک ایتیلگن. بیراق بلخ امنیه قوماندان‌لیگی نینگ سوزلاوچیسی بو موضوع‌نی رد قیلیب، اسلامی امارت کوچلری گه تلفات ییتمه‌گنینی ایته‌دی.
بو عین‌حالده، اوتگن کونی مزارشریف شهری قانلی واقعه گواهی ایدی. اوتگن کونی توش چاغی ساعت ۱۲:۴۰ اطرافیده مزارشریف نینگ روضه شمالی‌ده جایلشگن «سه دکان» مسجدی ایچیده پارتلش یوز بیردی. اوشبو مسجد شیعه‌لر گه تیگیشلی دییلگن.
بیزلرنینگ توییترده هم تعقیب قیلینگ!
منبع‌لرگه کوره، مذکور پارتلش نتیجه‌سیده قریب ۴۰ کیشی هلاک و باشقه اونلب انسان یره‌لنگن. بو هجوم مسئولیتینی اسلامی دولت (داعش) گروهی زمه‌سیگه آلیب و ۱۰۰ کیشی هلاک بولگنینی ادعا قیلگن.
اوشبو پارتلش ایچکی و تشقی عکس‌العمل‌لر گه روپه‌رو بولگن. اوتگن کونی کابل، ننگرهار و قندوز ولایت‌لری‌ده هم پارتلش یوز بیریب و نتیجه‌ده اونلرچه کیشی اولیب و یره‌لندیلر.
