آنلاین فعالیتلر کوپهیشی بیلن، اینترنت یشاوچیلردن قطاری اوچون اساسی ایش وسیلهلریدن بیریگه اَیلنگن؛ لیکن اینترنت سرعتی ضعیفلیگی بو بولیمده ایشلهیدیگنلردن قطارینی جدی قیینچیلیکلر بیلن روپهره قیلگن.
گوزهللیک اوسکونهلری، بیزهتووچی برقی جهازلر همده تحفه تیارلش بولیمیده آنلاین شکلده فعالیت قیلهدیگن کابل یشاوچیسی بولمیش ۲۳ یاشر بهشتهنینگ ایتیشیچه، اینترنت کوندهلیک ایشی اوچون کوپ مهم بولیب، اونینگ سرعتی قویی بولیشی درآمد و مشتریلری بیلن علاقه قوریش توغریسیده مستقیم شکلده تاثیر قویگن. «ایشیمیزنینگ قریب ۵۰ فایزی اینترنت سرعتی ضعیفلیگی اوچون کمهیگن. بعضا ضروری ایشلریمیزتی کیچه یا-ده ایرتنگگه قویهمیز، چونکه اوشه پیتده اینترنت سرعتی نسبتاً یخشیراق بولهدی. شونینگدیک قیمتراق بستهلردن فایدهلنیشگه مجبور بولهمیز. بعضا مشتریلر محصول صورتی و ویدیوسینی ایستهگنیده، وقتیده آپلود بولمهی و بو وضعیت مشتری ایشانچینینگ کمهیشیگه سبب بولهدی.»
بو وضعیت، یالغیز آنلاین شکلده فعالیت قیلهدیگن کیشیلرنینگ روپهره بولگن قیینچیلیک ایمس. دیزاین و گرافیکی خذمتلر بولیمیده فعالیت قیلهدیگن بلخ مرکزی مزارشریف شهری یشاوچیسی بولمیش ۲۸ یاشر میلادگه کوره، اینترنت سرعتی ضعیفلیگی پروژهلرنینگ توزهتیشی جریانینی قیینچیلیک بیلن دوچ قیلیب و بعضا مشتریلرینینگ قولدن بیریشیگه سبب بولگن.
اونینگ کوپهیتیریشیچه: «اینترنت سرعتی قویی بولگنیده فایللرنی وقتیده مشتریلرگه یوباره آلمهی و قیینچیلیک بیلن روپهره بولهمن. بعضا مشتریلرنینگ عجلهسی بولهدی؛ بیراق اینترنت سرعتی اوچون بعضا حتا پروژهنی قولدن بیرگنمین. یخشیراق خذمتلرنی کورسته آلیش اوچون اینترنت توغریسیده کوپینچه خرهجت صرفلهیمن، لیکن ینه هم بعضا صفتی مناسب ایمس.»
شونینگدیک سیاحت خذمتلری بولیمیده هم بو کبی قیینچیلیکلر کوزگه کوریلهدی. سیاحتی کمپنیهلردن بیریده فعالیت قیلهدیگن ۳۰ یاشر سلیماننینگ ایتیشیچه، مذکور کمپنیهنینگ فعالیتلریدن کوپینچهسی اینترنتگه تیگیشلی بولیب و اونینگ قویی سرعتی، ایشلریده قیینچیلیککه سبب بولگن. «ایشیمیزدن برچهسی اینترنتگه تیگیشلی دیر. اینترنت ایشلمهگنیده وقتیده مشتریلریمیزگه تکت آلالمهیمیز و اولر باشقه شرکتگه مراجعت قیلهدی. یخشیراق ایشلهیشی اوچون کوپینچه پول تولهیمیز.»
شوندهی بیرحالده، آنلاین شکلده درس بیرهدیگن هرات یشاوچیسی ۲۸ یاشر شیلانینگ ایتیشیچه، اینترنت سرعتی قوییلیگی اوقووچیلری بیلن علاقه قوریش و درس بیریش جریانیگه سلبی تاثیر قویگن.
شیلا، روپهره بولهدیگن قیینچیلیکلری توغریسیده شوندهی دیدی: «اینترنت سرعتی قویی بولیشی پیتده، وقتیده درس بیره آلمهیمن، فایللر و ویدیولرنی هم یوباریشده قیینچیلیک بیلن روپهره بولهمیز. بعضا اوقووچیلر کوتیب تورهدی، بیراق اینترنت سرعتی ضعیفلیگی سبب صنفلر کیچ باشلنهدی یا-ده درس اورتهسیده اینترنت کیسیلهدی. بو وضعیت حلی اوچون یوقاری بستهلرنی هم فعال قیلگنمیز، ینه هم صفتی مناسب ایمس.»
شوندهی بیرحالده، معلوماتی تکنالوژی و مخابرات وزیرلیگی مسئوللرینینگ ایتیشلریچه، اینترنت سرعتی و صفتی یخشیلنیشی اوچون بیر قطار برنامهلرنی قولگه آلگنلر. مذکور وزیرلیک سوزلاوچیسی عنایتالله الکوزینینگ ایتیشیچه، مذکور برنامهلرنینگ بیر بولیمی کابل و ولایتلردن قطاریده عملگه آشیریلگن. «اوشبو وزیرلیک دایمی شکلده افغانستاننینگ تورلی زونلریده تخنیکی تیکشیروولر آرقهلی خذمتلر صفتینی کورگنلر و تیکشیریشدن کیین کمپنیهلر صفتی قویی بولگن حدودلرنینگ تخنیکی قیینچیلیکلرینی حل قیلیشلری کیرهک.»
آنلاین خذمتلریگه یشاوچیلرنینگ تیگیشلی بولیشی کوپهیشی بیلن بو بولیمده فعالیت قیلهدیگنلرنینگ ایتیشلریچه، اینترنت سرعتی و صفتی یخشیلنیشی نهفقط کسب-کارلری رواجلنیشیگه یاردم بیرهدی، بلکیم مشتریلر ایشانچینی سقلش، فایدهلنیش آشیشی و ایش فرصتلری یرهتیلیشیده هم مهم رول اوینه آلهدی.
