یشش جای یقینیده سپورت جای‌لری‌نینگ یوق‌لیگی، یوقاری خره‌جت‌لر و سپورت امکانیت‌لریدن آز فایده‌لنیش، کوپلب یاش‌لر اوچون سپورت بیلن شغللنیش‌نی قیین‌لشتیرگن. شونگه قره‌می، یاش‌لر همان سپورت قیلیش گه دوام بیرماقده. ایریم یاش‌لر اوزاق‌راق‌ده‌گی سپورت کلوب‌لریگه باره‌دی، بعضی‌لری اوی‌ده مشق قیله‌دی، باشقه‌لری ایسه بار امکانیت‌لردن فایده‌لنیب، سپورت بیلن شغللنیش‌ده دوام بیرماقده.
اوشبو گزارش‌ده ۱۵ ولایتده ۲۷ نفر قیز و ۲۳ نفر اوغیل، جمعی ۵۰ نفر یاش بیلن صحبت اوتکزیلگن. اولردن ۲۹ نفری فوتبال، والیبال، فوتسال، بسکتبال، کریکت، بادی‌بیلدینگ (پرورش اندام) فتنس و تکواندو کبی سپورت تورلری بیلن سپورت کلوب‌لریده شغللنه‌دی. قالگن ۲۱ نفری ایسه یوگوریش، پیاده یوریش همده اوی‌ده یا کی موجود شرایط‌لرده سپورت مشق‌لرینی بجره‌دی. اوشبو یاش‌لرنینگ یاشی ۱۸ دن ۳۵ یاش‌گچه.
بیراق، ایریم یاش‌لر اوچون سپورت امکانیت‌لریدن فایده‌لنیش آسان ایمس. ۲۸ نفر یاش یشه‌یدیگن حدودلریده سپورت کلوب‌لری یوق‌لیگینی و سپورت بیلن شغللنیش اوچون اوزاق‌راق جای‌لر گه باریشگه مجبور ایکنینی بیلدیرگن. ینه ۱۳ نفری یشش جای‌ده سپورت کلوبی بولسه-ده، یوقاری نرخ‌لر اوشبو امکانیت‌لردن فایده‌لنیشگه توسقین‌لیک قیله‌یاتگنینی ایتگن. قالگن ۹ نفری ایسه قیزلر اوچون سپورت چیکلاولرنی اساسی معمالردن بیری صفتیده کورستگن.
پروان‌لیک ۳۳ یاشلی اوقیتووچی نثاراحمد نایل‌نینگ ایتیشیچه، اونینگ اینگ سیوملی سپورت توری بادی‌بیلدینگ بولیب، او هر کونی بیر ساعت مشق قیلردی؛ بیراق حاضر اقتصادی قیینچیلیک‌لر سببلی سیوملی سپورتینی دوام بیره آلمه‌یدی و فقط یوگوریش بیلن شغللنیش گه مجبور. او شونده‌ی دییدی: «مین بادی‌بیلدینگ بیلن شغللنیش‌نی یخشی کوره‌من. ایرته‌لب نمازدن کیین بیر ساعت مشق قیلردیم. حاضر ایسه سپورت خره‌جت‌لرینی قاپله‌ی آلمه‌یمن. فقط یوگوره‌من و ایرکین مشق‌لرنی بجره‌من.»
کابل‌دن بولگن ۲۲ یاشلی محمدشعیب رستمی، سپورت کلوب‌لری نرخی یوقاری ایکنینی و عایله‌لرنینگ اقتصادی احوالی بو خره‌جت‌لرنی کوتریشگه امکانی یوق‌لیگینی بیلدیره‌دی. اونینگ سوزلریگه کوره: «دوست‌لریم بیلن بیرگه چهارشنبه و پنج‌شنبه کون‌لری بیلیم یورت‌ده سپورت بیلن شغللنه‌من؛ بیراق افسوس بیلن جیم گه بارمه‌ی من چونکی نرخی یوقاری و یشاوچیلرنینگ اقتصادی احوالی ضعیف و قاپله‌ی آلمه‌یدی.»
سپورتچی یاش‌لرنینگ معمالری فقط خره‌جت‌لر بیلن چیکلنمه‌یدی؛ ایریم‌لری سپورت کلوب‌لری‌نینگ یوق‌لیگی یا کی یشش جای‌دن اوزاق‌ده جایلشگنی هم سپورت بیلن شغللنیش‌نی قیین‌لشتیره‌یاتگنینی ایته‌دیلر.
بلخ ولایتیدن بولگن ۲۸ یاشلی زهرا صدیقی، سپورت مشق‌لرینی اوی‌ده بجره‌دی. او شونده‌ی دییدی: «اینگ یخشی کوره‌دیگن مشغولات پیاده یوریش دیر، یینگیل مشق‌لر و اوی شرایطی‌ده مشق‌لر جمله‌دن یوگا. تشقری‌ده یا کی کلوب‌ده بجره آلمه‌یدیگن ایریم مشق‌لرنی ایسه اوی‌ده بجره‌من.»
هرات ولایتیدن بولگن ۲۵ یاشلی اوقیتووچی تفسیره اکبری‌نینگ ایتیشیچه، سپورت جای‌لریدن مناسب نرخ‌ده و آسان فایده‌لنیش امکانیتی بولسه، کوپراق یاش‌لرنی سپورت گه جلب قیلیشی ممکن. او شونده‌ی دییدی: «یاش‌لر اوچون قولی و بی‌پول جای‌لر بولیشی کیره‌ک. اگر خره‌جت‌لری کم‌راق بولسه، ینه‌ده یخشی. یاش‌لر سپورت امکانیت‌لریدن آسان فایده‌لنیشی اوچون سپورت کلوب‌لرینی کوپه‌یتیریش آرقه‌لی اهالی اورته‌سیده سپورت مدنیتینی رواجلنتیریش کیره‌ک.»
شو بیلن بیرگه، سپورت متخصص‌لری سپورت یاش‌لرنی کم‌حرکت‌لیکدن اوزاق‌لشتیریب، اولرنینگ اوزی و جمعیت اوچون فعال همده فایده‌لی بولیشیگه یاردم بیریشینی ایته‌دیلر. شونینگدیک، سپورت یاش‌لرده مسئولیت، ساغلام رقابت و همجهت‌لیک تویغولرینی کوچه‌یتیره‌دی.
سپورت ساحه‌سیده بیلرمان عبدالبصیر نیرومند شونده‌ی دییدی: «سپورت اینیقسه یاش‌لر اوچون جسمانی و روحی سلامت‌لیک‌نی تأمینلش‌نینگ اینگ مهم عامللریدن بیری دیر. سپورت یاش‌لر اورته‌سیده همکارلیک، ترتیب-تنظیم، مسئولیت، دوست‌لیک و همجهت‌لیک، بوش وقت‌نی مضمونلی اوتکزیش، ساغلام رقابت و اوزارا حرمت‌نی رواجلنتیره‌دی.»
شو بیلن بیرگه، اسلام امیرلیگی المپیک، جسمانی تربیه‌لش و سپورت ریاستی مسئوللری سلام‌وطندار بیلن صحبتده ایتیشلریچه، افغانستانده ۶۰ ته سپورت فدراسیونی فعالیت یوریتماقده و اوشبو ریاست نظارتی آستیده سانی بیر میلیون ۳۰۰ مینگ نفر گه ییته‌دی.
المپیک، جسمانی تربیه‌لش و سپورت ریاستی سوزلاوچیسی اتل مشوانی گه کوره: «مملکت مرکزی و ولایت‌لرده ۶۰ ته یقین فعال سپورت نماینده‌لیک‌لری بار. هر بیر فدراسیون‌ده سپورت کلوب‌لری سانی یوزلب و مینگلب‌نی تشکیل ایته‌دی.»
جاری ییلده، بیرقطار افغانستان‌لیک یاش سپورتچیلر خلق‌ارا مسابقه‌لرده قتنشیب، مداللر گه هم سزاوار بولدی. مصطفی وکیلی قزاقستان‌نینگ آلماتی شهریده اوتکزیلگن «جوجیتسو» مسابقه‌سیده برنز مدالینی قولگه کیریتگن. اونینگ یوتوغی حقیده‌گی خبر میلادی ۲۰۲۶-ییل ۱۶ سپتمبرده اعلان قیلینگن. شونینگدیک، روهید استانکزی، میلادی ۲۰۲۶-ییل، ۲۰ می کونی اوزبیکستان‌ده اوتکزیلگن آسیا یاش‌لر رزمی هنرلر مسابقه‌سیده کوموش مدال‌نی قولگه کیریتگن.
