کابل بیلیم یورتی‌دن فارغ بولگن طلبه‌لردن قطاری، دیپلوم آلیشه آلمه‌گنلریدن شکایت قیلیب ایتیشلریچه، نیچه مرته دیپلوم آلیش اوچون فاکولته‌لریگه مراجعت قیلگنلر؛ بیراق دیپلوم ورقی یوقلیگی سبب، تحصیلی حجتلرینی آلالمه‌گنلر.
اوتگن ییل کابل بیلیم یورتی نینگ ژورنالیزم فاکولته‌سیدن فارغ بولگن مرتضا نینگ ایتیشیچه، دیپلوم آلالمسلیگی سبب، باشقه مملکت‌لر نینگ تحصیلی بورسیه‌لری گه باش اوره آلمه‌گن. اونینگ کوپه‌یتیریشیچه: «نیچه مرته فاکولته گه باردیم ورق یوق یا که عالی اوقوو وزیرلیگی تامانیدن دیپلوم ترقه‌تیلیشی کیله‌سی امر‌گچه توخته‌تیلگنینی ایته‌دیلر. باشقه حجت‌لریمیز قیین‌چیلیکلریمیز نی حل قیلمه‌یدی. انه شوو سبب، تحصیلی‌میز نینگ دوام بیریش اوچون بورسیه گه باش اوره آلمه‌دیم، چونکه یراقلی تحصیلی حجتیم یوق.»
بیزلرنینگ توییترده هم تعقیب قیلینگ!
کابل بیلیم یورتی نینگ تیل و ادبیات فاکولته‌سیدن فارغ بولگن ویس‌احمد نینگ ایتیشیچه، دیپلومی یوقلیگی سبب نیچه ایش فرصتی نی قول‌دن بیرگن. ویس احمد نینگ کوپه‌یتیریشیچه: «فارغ بولگنیم‌دن بیر ییل بوله‌دی و نیچه مدت آلدین فاکولته گه باردیم که، ورق یوق دیدیلر. بو ایش‌لر گه قره‌گنده تحصیلی حجتی‌میز نینگ آلیش اوچون قنچه آی یا-ده ییل کوتیب توریشی‌میز لازم. دیپلوم آلالمه‌سلیک اوچون ایش تاپه آلمه‌یمن.»
باشقه بیر تامان‌دن، کابل بیلیم یورتی‌ده تحصیل قیلگن قیزلردن قطاری نینگ ایتیشلریچه، قیزلر یوزیگه بیلیم یورت‌لر نینگ یاپیلگنی‌دن کیین، تحصیلی حجت‌لری اینیقسه دیپلوم‌لری نی آلالمه‌گنلر. حقوق بیلیم یورتی طلبه‌سی مروه، تحصیلی حجتی نی قولگه کیلتیره آلمه‌گنی نی بیان قیلیب ایتیشیچه: «قیزلر نینگ باره آلمه‌سلیگی اوچون آته‌م باره‌دی و حمل آیی‌دن بیری دیپلومی اوچون نیچه مرته بیلیم یورت گه بارگن، بیراق حاضرگچه حجت‌لریم نی قولگه کیلتیره آلمه‌گن و بو حجت‌لر نیچه ییل‌لیک زحمت‌لریم نینگ نتیجه‌سی دیر.»
مذکور طلبه‌لر عالی اوقوو وزیرلیگی تامانیدن اوشبو قیین‌چیلیک نینگ حل قیلینیشی نی ایسته‌یدیلر. کابل بیلیم یورتی ژورنالیزم فاکولته طلبه‌سی صنم نینگ ایتیشیچه: «اوشبو قیین‌چیلیک نینگ عالی اوقوو وزیرلیگی آرقه‌لی حل بولینیشی نی کوتیب تورگن‌مین، چونکه تحصیلی حجت گه نیازیم بار، چونکه تحصیلی حجت ایش و بورسیه اوچون کیره‌ک دیر.»
عین حالده، عالی اوقوو وزیرلیگی مسئوللری نینگ ایتیشلریچه، بیلیم یورت‌دن فارغ بولگن‌لر اوچون دیپلوم ترقه‌تیلیش پروسه‌سی نینگ دوامی بار و مذکور وزیرلیک اوتگن ایکی ییل‌ده ۲۴۵۵۲ قطعه دیپلوم نی ترقه‌تگن. مذکور وزیرلیک نینگ عامه رابطه‌لر و نشرات بولیمی رئیسی سلیمان شریفی نینگ ایتیشیچه: «عالی اوقوو وزیرلیگی نینگ جنسی مدیریتی بویروغی و دولتی طلبه‌لر ایشلری نینگ قراری اساسیده، بیر مرته برچه بیلیم یورت‌لر و دولتی تحصیلی موسسه‌لر گه، سهیمه ترتیب و دیپلم ترقه‌تیلگن و اوشبو پروسه نینگ دوامی بار و قیزلر هم دیپلوم‌لری نینگ آلیشلری ممکن.»
بیزلرنینگ فیسبوک صحیفه‌میزگه باش اورینگ!
ایتیش کیره‌ک که، ترقه‌تیلگن آمارلر اساسیده، مملکت بویلب ییل‌ده ۳۶ مینگ ۶۰۰دن آرتیق طلبه دولتی بیلیم یورت‌لر و ۱۷ مینگ ۶۰۰دن آرتیق طلبه خصوصی بیلیم یورت‌لردن فارغ بوله‌دی؛ بیراق اولردن قطاری دیپلوم ورقی کم‌لیگی سبب، نیچه ییل اوتیشی بیلن، دیپلوم آلالمه‌گنلر.
