کابل یشاوچیلریدن قطاری ایشسیزلیک و کمبغللیکدن شکایت قیلیب، اسلام امیرلیگی سرپرست حکومتیدن اولر گه ایش زمینهسی یرهتیلیشی نی ایستهگنلر. کابل شهری یشاوچیلریدن و سرکلردن بیری نینگ چیککهسیده اولتیرگن ۷۷ یاشر عبدالرحیم نینگ ایتیشیچه، ۳۰ ییلدن بیری بوت تیکووچیلیک ایشی بیلن شغللنگن.
اونینگ کوپهیتیریشیچه، کونده قریب ۵۰ افغانی درآمدی بار و سرپرست حکومتدن اهالیگه ایش زمینهسی یرهتیلیشی نی ایستهگن. عبدالرحیم نینگ اورغولشیچه: «کونده ۲۰-۳۰ افغانی درآمدم بار و بیران کون ایسه ۵۰ افغانی بولهدی. سرپرست حکومتدن اهالی گه یاردم بیریلیشینی ایستهیمیز.»
کابل یشاوچیلریدن و پلتخنیک بیلیم یورتی طلبهلریدن بیری محمد حسین نینگ ایتیشیچه، ایکی ییلدن بیری ایشسیزلیکدن زیریککن. شونینگدیک او هم سرپرست حکومتدن ییگیتلر گه ایش زمینهسی یرهتیلیشی نی ایستهگن.
بیزلرنینگ «ایکس» ترماغی ده هم تعقیب قیلینگ!
کابل یشاوچیسی و ایشچیلردن بیری محمد امین هم ایشسیزلیکدن شکایت قیلیب و ایتیشیچه: «بوگون ایش تاپه آلمهدیم و بیران کیشی گه ایش تاپیلسه کیتهدی. عموم شکلده ایش یوق که برچه کیشی ایشلسه. بیران مرته ایش تاپیلهدی که بیر کیشی کیتسه کیتهدی و کیتمسه ایسه آخشمگچه ایش تاپه آلمهی قالهدی. نانیمیز نی یریم آلیش گه هم مجبور بولهمیز.»
شوندهی بیرحالده، اقتصاد وزیرلیگی مسئوللری بانکی توزوم نینگ تحریمی، ترقیاتی لایحهلر نینگ توختهتیلگنی و افغانستان سرمایهلری نینگ موزلهتیلیشی، مملکتده قشاقلیک کوپهیشی اصلی سببلریدن دیگنلر.
اقتصاد وزیرلیگی سوزلاوچیسی عبدالرحمان حبیب نینگ ایتیشیچه، اسلام امیرلیگی ایش زمینهسینی یرهتیش بیلن مملکتده قشاقلیک نی کمهیتیریش خصوصیده سعیوحرکت قیلماقده. «اسلام امیرلیگی اقتصاد وزیرلیگی ایش زمینهسی خصوصیده سعیوحرکت قیلماقده. بیزلر ترقیاتی و آستقورمه لایحهلر نینگ عملگه آشیریلیشی خصوصیده توجه قیلیش اوچون تورلی ادارهلر برنامهلری و پالیسیلری آرقهلی سعیوحرکت قیلدیک که بو رقم اهالی گه ایش زمینهسی یرهتیلسه.»
اقتصاد وزیرلیگی نینگ معلوماتی اساسیده، حاضر ایسه افغانستان اهالیسیدن ۵۰ فایزی قشاقلیک چیزیغی آستیده حیات کیچیرماقده.
عین حالده، بیرلشگن ملتلر تشکیلاتی نینگ خلقارا آزیق-آوقت دستوری ینگیلیکده اعلام قیلیشیچه، بریتانیا شاشلینچ برنامه اوچون افغانستان گه انسانپرورلیک۴۰ میلیون پوند یاردم بیرگن.
بیزلرنینگ فیسبوک صحیفهمیزگه باش اورینگ!
خلقارا آزیق-آوقت دستوری نینگ ایتیشیچه، اوشبو نهاد مذکور یاردمدن قوللنیش بیلن توییب آوقتلنمسلیککه چلینگن قریب ۱۴۰ مینگ سوت بیرهدیگن و حامله عیال بیلن ۱۵۰ مینگ بالهدن حمایت قیلیش گه علاوه، افغانستان ده ۱.۲ میلیون نیازمند گه هم یاردم بیریشی ممکن.
بیرلشگن ملتلر تشکیلاتی نینگ خلقارا آزیق-آوقت دستوری سوزلاوچیسی ضیاءالدین صافی نینگ سلاموطندار گه ایتیشیچه: «بو یاردم بیلن آزیق-آوقت دستوری ۱.۲ میلیون کیشی اوچون شاشیلینچ یاردم ییتکزیشگه قادر بولهدی. بونگه قوشیمچه آزیق – آوقت دستوری ۱۵۰ مینگ باله ۱۴۰ مینگ حامله عیال اوچون توییب آوقتلنمسلیک کسللیگی آلدینی آلیش خصوصیده یاردم بیریشنی ریجهلشتیرگن، نهایت آزیق-آوقت دستوری، آزیق-آوقت خوفسیزلیگی اوچون ۷۷ مینگ قشاق کیشیگه عامل المنفعه لایحهلریده قتنهشیش اوچون زمینه یرهتدی.»
ایتیش کیرهک که، جاری هفته یکشنبه کونی خلقارا یاردم ییتکزیش ۱۰ نهاد نینگ بیر اعلامیه آرقهلی ایتیشلریچه، اسلام امیرلیگی نینگ افغانستان ده قدرت گه ایریشگنیدن کیین اوشبو مملکت یشاوچیلری جدی شکلده انسانپرورلیک یاردملر گه نیازمندلر.
