مملکت‌ده امنیتی وضعیتی خواطرلنترووچی دیر، کوپ قطار ولایت‌لرده آتیشمه شدت‌لنگن و طالبان گروهی هرکون بیرقطار تومن‌لرنی تصرف قیله‌دی. عین‌حالده، بیرقطار سیاسی ایش بیلرمانلرنینگ ایتیش‌لریچه، دولت و سیاستچی‌لر آره‌سیده سیاسی اجماع بولمه‌گنی سبب، طالبان گروهی اوروش میدانی‌گه موفق بوله‌دی.
سیاسی ایش بیلرمان‌لردن بیری فضل‌الرحمان اوریا نینگ ایتیشیچه، ۲۰ ییلدن بویان دولت و سیاستچی‌لر آره‌سیده سیاسی اجماع یوق و اوشبو وضعیت بوگونگچه دوام قیلماقده. اونینگ ایتیشیچه، هر سیاستچی فردی استقلال و فردی منفعت‌نی دنبال قیله‌دی.
اوریا نینگ کوپه‌یتیریشیچه، دولت و سیاستچی‌لر آره‌سیده جنجل‌لر بولگنی سبب، طالبان گروهی کون اوتیش بیلن کوچلی بولماقده.
عین‌حالده، سیاسی ایش بیلرمان‌لردن باشقه بیری نورشاه نورانی نینگ ایتیشیچه، جمهور رییس غنی و دولت باشقه مقام‌لری سیاستچی‌لر و دولت آره‌سیده اجماع کیلتیریش اوچون سعی و حرکت قیلگن و بوتوغریده نسبی یوتوققه قول تاپگن‌لر. اونینگ ایتیشیچه، حاضرده هم بیرقطار موضوعلرخصوصیده دولت و سیاستچی‌لر آره‌سیده اجماع یوق و اوشبو مسله دولت نینگ ضعیف و طالبان نینگ کوچلی بولیشی‌گه سبب بولگن.
جناب نورانی نینگ کوپه‌یتیریشیچه، حکومت نینگ ضعفی سبب، دولت و سیاستچی‌لر آره‌سیده سیاسی اجماع شکل آلمه‌گن.
گزارش‌لرگه کوره، طالبان گروهی حاضرگه‌قدر ۱۴۷ تومن‌نی تصرف قیلیش‌گه موفق بولگن. سیاسی ایش بیلرمان‌لر فکری خصوصیده جمهورلیک ریاستی فکرینی آلیش اوچون سعی و حرکت قیلدیک، لیکن موفق بولمه‌دیک.
جمهورلیک ریاستی نینگ ایتیشیچه، سونگی پیت‌لرده محمداشرف غنی، جهاد سابق قومندانی عبدالرب رسول سیاف بیلن اوچره‌شیب دشمن‌گه قرشی اجماع نینگ کوچلی قیلیشی خصوصیده بحث قیلگن‌لر.
