ساغلیق‌نی سقلش وزیرلیگی سوزلاوچیسی نینگ اورین باسری میرویس علی‌زی نینگ ایتیشیچه، کرونا ویروسی کون اوتیش بیلن کوپه‌یب بارماقده، لیکن اوشبو وزارت اونینگ مهار قیلیش اوچون تیارگرلیک آلگن.
او، کرونا اوچینچی تولقینی‌نی خطرلی عنوان قیلیب و یشاوچی‌لردن اوشبو ویروس‌گه توسیق بولیش اوچون ساغلیک توصیه‌لر جمله‌دن ماسک‌دن فایده‌لنیش و اجتماعی فاصله‌لرنی رعایت قیلیش‌لرینی سوره‌گن.
جناب علی‌زی گه کوره، عمومی قرنطین قیلیش اوچون هیچ‌قنده‌ی برنامه آلینمه‌گن، لیکن ایجابی واقعه‌لر کوپه‌یگن حالده، بیرقطار بولیم‌لرنی قرنطین ایتیلیشی ممکن.
ساغلیق‌نی سقلش وزیرلیگی سوزلاوچیسی نینگ اورین باسریگه کوره، چین مملکتی تامانیدن یاردم بیریلگن ۷۰۰ مینگ دوز واکسین‌نی تیزلیککه مملکت‌گه انتقال بیریلیشی ممکن و دنیا بوییچه ساغلیک تشکیلاتی تامانیدن وعده بیریلگن ۱۶ میلیون دوز واکسین‌نی قولگه کیلتیریش اوچون سعی و حرکت‌لرنی دوامی بار.
عین‌حالده، کابل داکترلریدن بیرقطاری نینگ ایتیش‌لریچه، یشاوچی‌لر ساغلیک توصیه‌لرنی رعایت قیلمه‌گن صورتده، وضعیت‌نی کنترل دن چیقیشی ممکن.
اولرنینگ ایتیش‌لریچه، کرونا ویروسی نینگ اوچینچی تولقینی‌نی نشانه‌لری بیریچی تولقینی نشانه‌لریگه آخشه‌یدی و تفاوتی کم دیر.
داکترلردن بیری نجیب نثار نینگ ایتیشیچه، کرونا ویروسی نینگ ایجابی واقعه‌لری مملکت نینگ اوزاقده بولگن منطقه‌لریگه کوپ دیر و ساغلیق‌نی سقلش وزیرلیگی اختیاریده بیللی بیر آمار یوق.
ساغلیق‌نی سقلش وزیرلیگی نینگ اعلان قیلیشیچه، اوتگن بیر کیچه و کوندوز ده مملکت بوییچه کرونا ویروسی دن ۱۰۴۵ ینگی ایجابی واقعه قید ایتیلیب و باشقه ۳۳ کسل دنیا دن اوتگن.
اوشبو وزارت تامانیدن بیریلگن آمارلرگه کوره، اوتگن ۲۴ ساعت جریانیده کرونا ویروسی‌گه چلینگن‌لردن ۱۱۲ ته‌سی درمان‌لنگن دیر.
